ភ្នំពេញ: ជានិស្សិតព័ត៌មានវិទ្យាម្នាក់ដែលគ្រាន់តែចូលចិត្តគូរគំនូរឌីជីថល សមិទ្ធផលពីចំណូលចិត្តជាង៥ឆ្នាំនេះបានបើកទំព័រជីវិតដ៏គួរឱ្យចងចាំមួយរបស់ នរោត្តម រ៉េតវិរៈបុត្រ ដោយស្នាដៃទាំងនោះត្រូវដាក់តាំងពិព័រណ៍ក្រោមប្រធានបទ «ចង្វាក់សិល្បៈ» លើជញ្ជាំងវិចិត្រសាល Drops កាលពីថ្ងៃទី ៤ ខែកញ្ញា។
ជោគជ័យនៃជំហានដំបូងរបស់វិចិត្រករឌីជីថលរូបនេះ បានជម្នះសម័យកូវីដ និងភាពក្មេងខ្ចី ដោយទាក់ទាញភ្ញៀវជាតិ និងអន្តរជាតិមកទស្សនាសិល្បៈឌីជីថលបង្កប់គំនិតថ្មីប្លែក។
ដើមឡើយ រ៉េតវិរៈបុត្រ បានចាប់ផ្ដើមដោយគ្រាន់តែបង្ហោះស្នាដៃលើបណ្ដាញសង្គម ហើយលោកក៏ទទួលបានការចាប់អារម្មណ៍ច្រើន ដែលក្នុងនោះក៏មានលោក Alexandre Barth ដែលជាអ្នកគ្រប់គ្រងវិចិត្រសាល Drops។
សិល្បករឌីជីថលរលកថ្មី រ៉េតវិរៈបុត្រ រៀបរាប់ទាំងរំភើបថា៖ «ខ្ញុំត្រេកអរខ្លាំងណាស់។ ខ្ញុំពិតជាអរគុណដល់បងអេឡិច ដែលផ្ដល់ឱកាសឱ្យខ្ញុំ ព្រោះបើនិយាយពីឆាកអន្តរជាតិគំនូរឌីជីថលគេមិនសូវពេញនិយមទេ គេពេញចិត្តបែបសិល្បៈទម្រង់បុរាណ ប្រើដៃច្រើនជាង»។
តាមរយៈពិព័រណ៍ «ចង្វាក់សិល្បៈ» រ៉េតវិរៈបុត្រ ចង់បង្ហាញពីមនោអារម្មណ៍របស់វិចិត្រករផ្ទាល់ក្នុងការដាក់មនោសញ្ចេតនាទៅលើស្នាដៃនីមួយៗ។ រូបគំនូរ ១៥ សន្លឹករបស់លោកបានចុះហត្ថលេខា និងលេខទាំងអស់ហើយត្រូវបានព្រីនចេញ សម្រាប់ពិព័រណ៍កាលពីដើមខែ។
ខណៈពិធីបិទការតាំងពិព័រណ៍របស់លោកនៅថ្ងៃទី ២៣ ខែកញ្ញា ប៉ុន្តែការបោះពុម្ពស្នាដៃនឹងបន្តមាននៅស្ទូឌីយោរបស់ Drops និងតាមរយៈអនឡាញសម្រាប់ការលក់ជិត ២ ខែ។
ស្ថិតក្នុងសាលពិព័រណ៍ មតិកោតសរសើរត្រូវបានបង្ហាញលើទឹកមុខរបស់ទស្សនិកជនដែលពុំសូវស៊ាំភ្នែកនឹងសិល្បៈឌីជីថល ហើយស្ញប់ស្ញែងនឹងរូបភាពស្អាតដូចរូបគូរដោយដៃ។
រ៉េតវិរៈបុត្រ ប្រាប់ ភ្នំពេញ ប៉ុស្តិ៍ ថា៖ «មិនមែនតែការគូរទេដែលខ្ញុំចូលចិត្ត គឺខ្ញុំស្រឡាញ់សិល្បៈទាំងការរាំ ការលេងភ្លេង ការសូនរូប គ្រាន់តែការគូរខ្ញុំមានជំនាញជាងគេ ហើយផ្សេងៗខ្ញុំមិនអាចធ្វើបានព្រោះខ្ញុំខ្វះធនធាន»។
ឈានមកដល់គំនូរឌីជីថលលោកបន្តថា៖ «បើផ្ដោតលើការគូរអាចថា តាំងពីមុនចូលថ្នាក់ទី១។ ចាំបានថា កាលណោះពេលយាយខ្ញុំបង្រៀន ខ្ញុំតែងចូលចិត្តសរសេរអក្សរហើយគូររូបពីនេះពីនោះរហូតដល់ខ្ញុំធំ។ តែ ៥ ឆ្នាំមុនខ្ញុំចាប់ផ្ដើមផ្លាស់មកជាគំនូរឌីជីថល ព្រោះវាស្រួល អាចធ្វើបានភ្លាមៗ មិនចាំបាច់ត្រូវការក្រដាស ទឹកថ្នាំ ឬជក់ វាមានតម្លៃថោក ហើយទុកដាក់បានស្រួល និងរក្សាទុកបានយូរ»។
សិល្បករវិវឌ្ឍឧបនិស្ស័យគំនូរ ផ្សែផ្សំនឹងការបង្រៀនខ្លួនឯងតាមអ៊ីនធឺណិត បានសម្គាល់ពីភាពរីកចម្រើនរបស់ខ្លួននៅពេលដែលលោករៀបចំស្នាដៃសម្រាប់ពិព័រណ៍លើកដំបូង។
វិចិត្រករវ័យ ២០ ឆ្នាំរូបនេះថា៖ «មុនដំបូងខ្ញុំចេះតែគូររូបមនុស្សបែបធម្មតា។ តែពេលយូរៗទៅខ្ញុំអាចគូររូបដែលមានកាយវិការស្មុគស្មាញ ដែលពីមុនមិនគិតថាខ្លួនឯងអាចធ្វើបាន។ ខ្ញុំអាចទាញទំហំដោយខ្លួនឯងដោយមិនបាច់កូពី [ចម្លង] ពីគេដូចពេលដំបូង ដែលត្រូវធ្វើអ៊ីចឹងឱ្យដឹងពីតិចនិកព្រោះមិនមានអ្នកបង្រៀន តែឥឡូវបើខ្ញុំមានអារម្មណ៍ចង់គូររូបអី ខ្ញុំអាចគូរបាន»។
លោកទទួលបានការជំរុញចិត្តពី គំនូរបុរាណ គំនូរក្នុងហ្គេម និង Pin up art ដែលច្រើនគូរពីនារីម៉ូដែល។ លោកផ្ដោតទៅលើវប្បធម៌ប្រជាប្រិយ ក៏ដូចជាការវិវឌ្ឍគំនូររបស់ខ្មែរ។
រូបនេះថា លោកចង់យកគំនូរបែបក្រិក ឬអឺរ៉ុបមកអនុវត្តគំនូរក្នុងវប្បធម៌របស់កម្ពុជា ព្រោះលោកឃើញមានគំនូរពីអក្សរសិល្ប៍ ឬរឿងបុរាណ បែបប្រវត្តិសាស្ត្របានបង្ហាញឱ្យឃើញដូចទៅនឹងតថភាពជាក់ស្ដែង។
សិល្បករវ័យក្មេងរូបនេះយល់ថា គំនូរខ្មែរហាក់បង្កប់នូវភាពទន់ភ្លន់ ដែលនេះជាអត្តសញ្ញាណពិសេសមួយ អាចប្រើក្នុងការផ្សព្វផ្សាយវប្បធម៌ អរិយធម៌ខ្មែរដល់បរទេស។
យ៉ាងណាមិញក្ដីប្រាថ្នារបស់ រ៉េតវិរៈបុត្រ នៅតែអាជីពបច្ចេកវិទ្យា ដោយលោករំពឹងថានឹងប្រឡូកក្នុងសិល្បៈសម្រាប់ហ្គេម។
និស្សិតឆ្នាំទី១ ព័ត៌មានវិទ្យារូបនេះថា៖ «ហ្គេមក៏ជាសិល្បៈដោយសារយើងត្រូវធ្វើគំរូ 3D បង្កើតតួអង្គ សរសេរសាច់រឿង និងច្រើនទៀត។ ហ្គេមដែលឆ្នើមមិនប្រាកដថាលេងសប្បាយតែម្យ៉ាងទេ ទាល់តែមានដំណើររឿងល្អដែរ»។
ក្ដីសុបិនធំបំផុត រ៉េតវិរៈបុត្រ គឺចង់ឃើញស្នាដៃរបស់លោករំលេចរូបនៅទីក្រុងញូវយ៉ក និងបង្ហាញពីវប្បធម៌ប្រពៃណីរបស់ខ្មែរទៅកាន់ពិភពលោកតាមរយៈទម្រង់សិល្បៈឌីជីថល។
ទោះជាផ្ដោតលើសិល្បៈទំនើប សិល្បករដែលរមែងយកសិល្បៈបុរាណរំលេចផ្សារភ្ជាប់វប្បធម៌ជាតិសាសន៍ដទៃលើផ្ទៃអេក្រង់គំនូររបស់ខ្លួន រូបនេះបញ្ជាក់ថា៖ «យើងត្រូវមានទិសដៅបង្កើតអ្វីឱ្យមានភាពលេចធ្លោ ដើម្បីមានឱកាសទៅឆាក-អន្តរជាតិ ហើយដើម្បីបង្កើតថ្មីបាន គឺត្រូវមានទាំងឡូហ្ស៊ិក និងគំនិតច្នៃប្រឌិតទាំងការអភិវឌ្ឍ និងអភិរក្សដើម្បីកុំឱ្យបាត់បង់វប្បធម៌យើង»។
ការទស្សនាស្នាដៃសិល្បៈរបស់សិល្បករវ័យក្មេង រ៉េតវិរៈបុត្រ សូមចូលទៅកាន់ https://onlyidols.asia/Ousider។ សម្រាប់ព័ត៌មានពិព័រណ៍នៅ Drops សូមចូលទៅកាន់ទំព័រហ្វេសប៊ុក @DropsKH៕