ទីក្រុងឡាអេ៖ ប្រទេសដែលល្បីមានប្រជាជនខ្ពស់ៗជាងគេបំផុតនៅលើពិភពលោក បាននឹងកំពុងធ្លាក់ចុះកម្ពស់។
ការសិក្សារបស់ការិយាល័យស្ថិតិរបស់ប្រទេសនេះបានឱ្យដឹងកាលពីសប្ដាហ៍មុនថា ជនជាតិហូឡង់ដែលកើតជំនាន់ក្រោយចាប់ពីឆ្នាំ ២០០១ មានកម្ពស់ទាបជាងអ្នកដែលកើតកំឡុងទសវត្សរ៍ឆ្នាំ ១៩៨០។
បុរសជនជាតិហូឡង់អាយុ ១៩ ឆ្នាំ បច្ចុប្បន្នមានកម្ពស់ជាមធ្យម ១៨២,៩ សង់ទីម៉ែត្រ រីឯស្ត្រីមានកម្ពស់ជាមធ្យម ១៦៩,៣ សង់ទីម៉ែត្រ។
ការស្រាវជ្រាវបាននិយាយថា កត្តារួមចំណែកឱ្យតួលេខកម្ពស់ជាមធ្យមធ្លាក់ចុះនេះ រួមមានចំនួនជនអន្តោប្រវេសន៍ និងរបបអាហារ ដែលធ្វើឱ្យថមថយការលូតលាស់កម្ពស់ ខណៈជនជាតិនេះធ្លាប់ត្រូវបានគេសម្គាល់ពីការលូតលាស់កម្ពស់យ៉ាងលឿននៅ ១ សតវត្សកន្លះចុងក្រោយ។
របាយការណ៍បាននិយាយថា៖ «ក្នុងកំឡុងសតវត្សចុងក្រោយយើង ប្រជាជនយើងមានកំណើនលូតកម្ពស់យ៉ាងលឿន ប៉ុន្តែចាប់តាំងពីឆ្នាំ ១៩៨០ កំណើនតួលេខកម្ពស់នេះបានឈប់»។
បុរសដែលកើតនៅឆ្នាំ ២០០១ ជាមធ្យមមានប្រវែងខ្លីជាង ១ សង់ទីម៉ែត្រ បើធៀបនឹងបុរសកើតជំនាន់ឆ្នាំ ១៩៨០ រីឯស្ត្រីវិញមានកម្ពស់មធ្យមទាបជាង ១,៤សង់ទីម៉ែត្រ បើធៀបនឹងស្ត្រីកើតជំនាន់ឆ្នាំ ១៩៨០។
ថ្វីត្បិតតែតួលេខកម្ពស់នេះធ្លាក់ចុះ តែហូឡង់មិនបានបាត់បង់ដំណែងជាប្រទេសមានពលរដ្ឋខ្ពស់ជាងគេក្នុងលោកនោះទេ។
ការិយាល័យស្ថិតិកណ្តាលបាននិយាយនៅក្នុងសេចក្តីថ្លែងការណ៍មួយថា៖ «ហូឡង់នៅតែជាប្រទេសខ្ពស់ជាងគេបំផុតនៅលើពិភពលោក»។
ជនជាតិហូឡង់ឈរនៅលំដាប់ទី១ នៅពីលើម៉ុងតេណេហ្គ្រោ អេស្តូនី និងបូស្នី។ ចំណាត់ថ្នាក់កម្ពស់សម្រាប់ស្ត្រី គឺស្ត្រីហូឡង់ ឈរនៅលើម៉ុងតេណេហ្គ្រោ ដាណឺម៉ាក និងអ៊ីស្លង់។
តួលេខកម្ពស់ពិភពលោកបានបង្ហាញថា បុរសដែលទាបជាងគេគឺនៅទីម័រខាងកើត ចំណែកឯស្ត្រីដែលតូចជាងគេគឺនៅក្វាតេម៉ាឡា។
ទម្លាប់នៃការញ៉ាំអាហារដែលមិនមានសុខភាពល្អ
ពុំមានហេតុផលណាច្បាស់លាស់ដែលបញ្ជាក់ពីដើមចមនៃការលូតខ្ពស់នៃរាងកាយ និងការធ្លាក់ចុះនៃកម្ពស់នោះទេ។
មូលហេតុមួយគឺជនអន្តោប្រវេសន៍ ជាពិសេសចំពោះមនុស្សដែលមានប្រវត្តិមិនមែនជាជាតិសាសន៍លោកខាងលិច។
កត្តាមួយទៀតដែលនាំឱ្យតួលេខកម្ពស់ធ្លាក់ចុះចាប់ពីឆ្នាំ ១៩៨០ គឺអាចមកពីទម្លាប់នៃការញ៉ាំអាហារមិនល្អចំពោះសុខភាព ការទទួលទានអាហារកាឡូរីខ្ពស់ហួសប្រមាណនៅក្នុងដំណាក់កាលលូតលាស់។
ការសិក្សានេះផ្អែកលើការវាស់កម្ពស់ដងខ្លួនប្រជាជនហូឡង់ ៧១៩០០០ នាក់ដែលមានអាយុពី ១៩ ទៅ ៦០ ឆ្នាំ។
ប្រវត្តិសាស្ត្រមុនគ្រងកំណត់ត្រាកម្ពស់
ដើមឡើយជនជាតិហូឡង់មិនមែនជាអ្នកមានកម្ពស់លេចធ្លោដូចសព្វថ្ងៃទេ។ នៅដើមសតវត្សរ៍ទី ១៩ ពួកគេមានមាឌតូចតាមស្តង់ដារអឺរ៉ុបធម្មតា ហើយអត្រាកម្ពស់បានចាប់ផ្តើមស្ទុះខ្លាំងនៅទសវត្សឆ្នាំ ១៨៤០។
កាលពី ១ សតវត្សរ៍មុន សហរដ្ឋអាមេរិក និងពលរដ្ឋនៅតំបន់ស្កេនឌីណាវី ជាទឹកដីមានបុរសខ្ពស់ៗបំផុត តែកំណត់ត្រានេះត្រូវបានផ្ដួលដោយជនជាតិហូឡង់នៅចុងទសវត្សឆ្នាំ ១៩៥០។
សំណួរថាហេតុអ្វីបានជាជនជាតិហូឡង់ចាប់ផ្ដើមស្ទុះខ្ពស់ដូច្នេះ? ចម្លើយនៅតែមិនច្បាស់។
មានការដំណាលតៗគ្នាថា ជនជាតិហូឡង់ចូលចិត្តឈីស និងប្រើប្រាស់ផលិតផលទឹកដោះគោច្រើន តែអ្នកវិទ្យាសាស្ត្រអះអាងថា ទាំងនេះពុំមែនជាមូលហេតុនៃការលូតកម្ពស់គួរឱ្យកត់សម្គាល់នោះទេ។
ការិយាល័យស្ថិតិបាននិយាយថា កត្តានៃការលូតកម្ពស់អាចមកពីជម្រើសធម្មជាតិ ដែលបុរស និងស្ត្រីខ្ពស់ទំនងជាគូដែលមានកូនច្រើនជាងគូស្នេហ៍មិនសូវបានកម្ពស់។ ពួកគេជឿថា នេះទំនងជាហេតុផលពិតប្រាកដ ដោយសារឪពុកម្ដាយសុទ្ធតែខ្ពស់ៗ ហើយបង្កើតបានកូនរឹតតែខ្ពស់ទៀតនោះ៕ AFP/HR