ក្រុងញូវយ៉ក៖ មិនប្រាកដថានឹងមានសម្រែកមហាជនដូចការសម្ដែងរបស់ក្រុមចម្រៀង BTS ដូចរាល់ដងឬយ៉ាងណា តែក្រុមចម្រៀង K-pop ដ៏ល្បីល្បាញនេះបានបង្ហាញសមត្ថភាពលើឆាកតន្ដ្រីពិភពលោកមួយបែបទៀតកាលពីថ្ងៃចន្ទ ខណៈពួកគេថ្លែងសារនៅកិច្ចប្រជុំរបស់អង្គការសហប្រជាជាតិ។
ក្រុមចម្រៀងសមាជិក ៧ នាក់ គ្រងឈុតខ្មៅ បាននិយាយថា ពួកគេសង្ឃឹមថា នឹងកៀរគរយុវជនឱ្យយកចិត្ដទុកដាក់ចំពោះកិច្ចការឆ្ពោះទៅកាន់គោលដៅ អភិវឌ្ឍចីរភាព ជាយុទ្ធនាការរបស់អង្គការសហប្រជាជាតិ ស្ដីពីកង្វល់ចំពោះភពផែនដី។
ដោយសារតែការរឹតបន្ដឹងទប់ស្កាត់ជំងឺកូវីដ ក្រុម BTS ថ្លែងសារក្នុងមហាសន្និបាតរបស់អង្គការសហប្រជាជាតិដែលកៅអីភាគច្រើនទំនេ ដោយគណប្រតិភូអង្គុយជួរមុខ ស្ដាប់ដោយស្ងៀមស្ងាត់ និងទាញទូរស័ព្ទថតម្ដងកាល។
ក្រោយពីថ្លែងសាររួច ពួកគេបានចាក់បញ្ចាំងចម្រៀងថតទុកនូវបទ «Permission to Dance» ឬ «សុំរាំម្ដង» ខណៈពួកគេបង្ហាញក្បាច់រាំពេញសាលមហាសន្និបាត និងរានហាលនៃអគារពិភពលោកដែលស្ថិតនៅទល់មុខទន្លេខាងកើតផងដែរ។
សមាជិក BTS បានថ្លែងក្នុងឱកាសនោះថា ពួកគេមានការសោកស្ដាយដែលបានលប់ចោលនូវដំណើរចុងក្រោយរបស់ខ្លួនដោយសារតែវិបត្ដិកូវីដ ហើយពួកគេបានស្នើយុវជនដទៃចែករំលែកទស្សនៈផ្ទាល់ខ្លួនជុំវិញប្រធានបទ «ការបាត់បង់ដោយសារកូវីដ» ដោយជីវិតរស់នៅត្រូវបានរំខានតាំងពីដើមឆ្នាំ ២០២០។
ជីន បាននិយាយពេលរំឭកពីការឆ្លើយតបរបស់យុវជនថា៖ «អំឡុងពីរឆ្នាំចុងក្រោយ ខ្ញុំមានអារម្មណ៍ច្របូកច្របល់ និងរងការប៉ះពាល់ ទេយើងនៅតែអាចឮសំឡេងសម្រែកស្រែកយំថា ត្រូវរស់បន្ដ និងព្យាយាមឱ្យអស់លទ្ធភាព។ យើងមិនអាចនៅបន្ដទទួលយកឧបសគ្គជីវិតថ្មីៗនោះទេ ពេលយើងមានជីវិតដ៏ល្អប្រសើរហើយនោះ»។
ក្រុមចម្រៀងនេះបានបន្ដថា ពួកគេបានទទួលចាក់វ៉ាក់សាំង និងកត់សម្គាល់ឃើញថា យុវជននៅតែស្វះស្វែងរកចម្លើយអំពីរបៀបប្រយុទ្ធប្រឆាំងនឹងបម្រែបម្រួលអាកាសធាតុ។
BTS ត្រូវបានណែនាំដោយប្រធានាធិបតីកូរ៉េខាងត្បូង លោក មូន ជេអ៊ីន ដែលបានផ្ដល់ដល់ពួកគេនូវលិខិតឆ្លងដែនកាទូត ជាកិច្ចខិតខំប្រឹងប្រែងចុងក្រោយដោយរដ្ឋាភិបាលក្រុងសេអ៊ូលដើម្បីប្រើប្រាស់ឥទ្ធិពលប្រជាប្រិយភាព K-pop។
គោលដៅអភិវឌ្ឍចីរភាព រួមមានការលប់បំបាត់ភាពក្រីក្រធ្ងន់ធ្ងរនៅជុំវិញពិភពលោកនៅត្រឹមឆ្នាំ ២០៣០។ ប៉ុន្ដែអង្គការសហប្រជាជាតិ បានឱ្យដឹងថា វិបត្ដិកូវីដ បានបង្អាក់កិច្ចខិតខំប្រឹងប្រែងឱ្យដើរថយក្រោយជាច្រើនឆ្នាំ ដោយមនុស្សជាង ១០០ លាននាក់ បានធ្លាក់ទៅក្នុងភាពក្រីក្រ និងស្រេកឃ្លាន ដែលបន្ថែមលើមនុស្សជាង ៤,៥ លាននាក់ដែលបានស្លាប់។
អគ្គលេខាធិការអង្គការសហប្រជាជាតិ លោក តង់តូនីញ៉ូ ហ្គូតេរ៉េស បានថ្លែងថា៖ «បាត់បង់ក្ដីសង្ឃឹម វាងាយទេ តែយើងមិនអស់សង្ឃឹម ឬមិនជួយនោះទេ។ យើងមានវិធីកែខៃស្ថានភាព បើយើងពិតជាមានឆន្ទះ»៕ AFP/HR