ក្រុងតូក្យូ: សារ ១ សិស្សវិទ្យាល័យជប៉ុនសរសេរញាត់ក្នុងដបចោលក្នុងសមុទ្រតាំងពី ៣៧ ឆ្នាំមុន ត្រូវបានរកឃើញនៅចម្ងាយប្រមាណ ៦ ០០០ គីឡូម៉ែត្រទៅដល់កោះហាវ៉ៃ។
សមាជិកក្លិបវិទ្យាសាស្ដ្រធម្មជាតិ នៅវិទ្យាល័យឆូស៊ិ ខេត្ដឈីបា ភាគខាងកើតទីក្រុងតូក្យូ បានបណ្ដែតដបចំនួន ៧៥០ ចូលក្នុងសមុទ្រចន្លោះឆ្នាំ ១៩៨៤ និងឆ្នាំ ១៩៨៥ ដើម្បីសិក្សាពីចរន្ដទឹកមហាសមុទ្រ។
ដបដែលផ្ទុកសារជាភាសាជប៉ុន អង់គ្លេស និងព័រទុយហ្គាល់ ដែលស្នើសុំអ្នកទទួលបានជួយទាក់ទងមកកាន់អ្នកបញ្ជូនផង បានរសាត់អណ្ដែតទៅសែនឆ្ងាយរហូតដល់ហ្វីលីពីន កាណាដា និងរដ្ឋអាឡាស្កា។
ប៉ុន្ដែគ្មានដបណាមួយត្រូវបានប្រទះឃើញនោះទេតាំងពីដបចំនួន ៥០ ត្រូវាបានរកឃើញក្នុងឆ្នាំ ២០០២ នៅភាគនិរតីខេត្ដកាហ្គូស៊ីម៉ា ប្រទេសជប៉ុន។ ដបទី៥១ ត្រូវបានរកឃើញដោយកុមារីអាយុ ៩ ឆ្នាំនៅលើឆ្នេរកោះហាវ៉ៃ កាលពីខែមិថុនា ដោយមានការប្រកាសពីសាលារៀន ជាមួយសារប៉ុនក្រដាសប្រៃសណីយ៍។
នាយករងសាលារៀនលោក ជុន ហាយ៉ាស៊ិ បានប្រាប់ AFP ថា៖ «ខ្ញុំពិតជាមានការភ្ញាក់ផ្អើលយ៉ាងខ្លាំង។ ដបទី៥០ ត្រូវបានរកឃើញកាលពី ១៩ ឆ្នាំមុន។ ដូច្នេះ ខ្ញុំគិតថា វាអស់ទៅហើយ។ ខ្ញុំមិនគិតថា យើងអាចរកឃើញដបបន្ដទៀតសោះ វាគួរតែលិចអស់ហើយ។ រំភើបមែនដែលរកឃើញដបទី៥១។ សង្ឃឹមថា នឹងមានអ្នករកឃើញដបទី៥២ បន្ដទៀត»។
ម៉ាយូមិ កុនដុ ជាសមាជិកក្លិបវិទ្យាសាស្ដ្រធម្មជាតិ ក្នុងឆ្នាំ ១៩៨៤ បាននិយាយថា ការរកឃើញដបទាំងនោះបានរំឭកពីអតីតកាលដ៏អាឡោះអាល័យនៃជីវិតសិស្សសាលារបស់អ្នកស្រីអំឡុងពេលស្រាវជ្រាវ។
អ្នកស្រីបាននិយាយថា៖ «៣៧ ឆ្នាំ ពិតជាយូរសម្រាប់ជីវិតមនុស្ស តែម្យ៉ាងវិញទៀត វានៅតែវិលមកកន្លែងដើមមិនថា ផែនដីនេះធំប៉ុនណា អាថ៌កំបាំងប៉ុនណា ហើយធម្មជាតិពិតជាអស្ចារ្យមែន»៕ AFP/HR