ក្រុងប៉ារីស: កូនស្រីរបស់វិចិត្រករ ពីកាសូ ម្នាក់ បានប្រគល់ស្នាដៃគំនូរចំនួន ៨ ផ្ទាំង និងសៀវភៅគំនូរ ១ ក្បាល ទៅកាន់រដ្ឋក្នុងប្រទេសបារាំង ជំនួសពន្ធលើមរតក កាលពីថ្ងៃចន្ទ។
គំនូរ ៦ ផ្ទាំង និងចម្លាក់ ២ ពីស្នាដៃវិចិត្រករអេស្ប៉ាញ ត្រូវបានប្រគល់ទៅឱ្យសារមន្ទីររដ្ឋ Picasso Museum ដោយកូនស្រីឈ្មោះ ម៉ាយ៉ា រុស ពីកាសូ ជាដំណក់ឈាមរួមនឹងម៉ូដែលជនជាតិបារាំង ម៉ារី ធេរ៉េស វ៉ាល់ធ័រ។
ស្នាដៃសិល្បៈ រួមទាំងគំនូរ «កុមារកាន់ស្ករគ្រាប់អង្គុយលើកៅអី» ដែលទំនងជាបង្ហាញពីជីវិត ម៉ាយ៉ា ពីកុមារភាព និងតំណាងឱ្យពិភពលោកដ៏គួរឱ្យភ័យខ្លាចនៅគ្រាមុនពេលទៅធ្លាក់ក្នុងសង្គ្រាមលោកលើកទី២។ នេះបើយោងតាមចៅប្រុសរបស់លោកឈ្មោះ អូលីវៀរ វីដវ៉ៃយើរ ពីកាសូ។
លោកស្ថិតនៅសន្និសីទកាសែតនៅសារមន្ទីររួមជាមួយរដ្ឋមន្ដ្រីវប្បធម៌ រ៉ូសេលីន បាឆេឡុត ដែលបានអំពាវ-នាវកម្មវិធីបរិច្ចាគ «ដ៏មានសារៈសំខាន់មួយប្រចាំទសវត្សរ៍ចុងក្រោយ»។
ស្នាដៃទាំងនេះជាមរតកសម្រាប់កូនរបស់វិចិត្រករដ៏ល្បីក្នុងប្រវត្តិសាស្ត្ររូបនេះ និងរួមទាំងចម្លាក់មួយក្នុងទម្រង់ស្ទីលប៉ូលីនេស៊ី ដែលត្រូវបានរក្សាទុកនៅក្នុងស្ទូឌីយោរបស់លោក។ ស្នាដៃចំណាស់បំផុតស្ថិតនៅក្នុងឆ្នាំ ១៨៩៥ ជាគំនូររូបឪពុកលោក «Don Jose Ruiz» ក៏ជាវិចិត្រករម្នាក់ផងដែរ។
គំនូរថ្មីបំផុតគឺ «ក្បាលបុរសម្នាក់» ជាគំនូរបែបប្រអប់ ដែលគូរកាលពីរដូវក្ដៅ ឆ្នាំ ១៩៧១ រយៈពេល ២ ឆ្នាំមុនពេលមរណភាពរបស់លោកនៅអាយុ ៩១ ឆ្នាំ។
ស្នាដៃទាំងនោះ នឹងត្រូវបានដាក់តាំងបង្ហាញសារមន្ទីរ Picasso Museum ដែលមានស្នាដៃប្រមូលផ្ដុំធំបំផុតរបស់វិចិត្រករល្បីល្បាញក្នុងពិភពលោករូបនេះ ចាប់ពីខែមេសា ឆ្នាំ ២០២២ ខាងមុខ។
តម្លៃនៃស្នាដៃសិល្បៈមិនត្រូវបានបញ្ជាក់ដោយហេតុផលអាថ៌កំបាំង តែការបរិច្ចាគអនុញ្ញាតឱ្យអ្នកស្រី រុស ពីកាសូ វ័យ ៨៦ ឆ្នាំ ចំណាយលើប្រាក់បង់ពន្ធមរតកបាន៕ AFP/HR