.jpg)
កញ្ញា នី មុនីនាថ លេចមុខក្នុងភាពយន្តភាគបែបកំសត់រឿង «បដាចារ» នៅសាស្ត្រាហ្វីម។ កញ្ញា នី មុនីនាថ នៅតែរក្សាតំណែងជាតួសម្តែងរាជិនីសម្រក់ទឹកភ្នែក។ រូបថត ហ្វេសប៊ុក
ភ្នំពេញៈ នាពេលថ្មីៗនេះ តារាស្រីដែលមានរហស្សនាម «រាជិនីសម្រក់ទឹកភ្នែក» កញ្ញា នី មុនីនាថ បង្កើតភាពភ្ញាក់ផ្អើលម្តងទៀត តាមរយៈការលេចមុខសម្តែងខ្សែភាពយន្តបែបកម្សត់ សោកសៅខ្លាំង ក្នុងផលិតកម្មសាស្ត្រាហ្វីម គឺរឿង «បដាចារ»។
បើតាមបណ្តុំរូបភាពប្លង់ថតខ្លះៗនៃសាច់រឿងអេដមីននៃផេចហ្វេសប៊ុកផលិតកម្មសាស្ត្រាហ្វីមបង្ហើរសារសរសើរពីទេពកោសល្យកញ្ញា នី មុនីនាថ ថា៖ «តារាសម្តែងស្រីដ៏ល្បី ពោរពេញដោយសមត្ថភាព និងទេពកោសល្យរបស់ប្រទេសកម្ពុជាយើងកញ្ញា នី មុនីនាថ Ny Monyneath ជាផ្លូវការពេលនេះបានក្លាយជាតួឯកស្រីសំខាន់ម្នាក់ក្នុងរឿងព្រេងអក្សរសិល្ប៍ខ្មែរ គឺរឿងនាងបដាចារ។
គួរបញ្ជាក់ផងដែរថា ខ្សែភាពយន្ដរឿង នាងបដាចារមួយនេះ គឺត្រូវបានលើកយកមកថតម្ដងទៀត ដោយផលិតកម្ម Sastra Film។ កញ្ញា នី មុនីនាថ លះបង់ធំណាស់សម្រាប់មួយរឿងនេះ កុំភ្លេចណា នឹងចេញផ្សាយនាពេលឆាប់ៗខាងមុខនេះ ថ្ងៃទី ១០ ខែ តុលា ២០២១»។
ខណៈទស្សនិកជនទាំងក្នុង និងក្រៅប្រទេស ព្រមទាំងផលិតករភាគច្រើន បានទទួលស្គាល់ថា តារាសម្តែងស្រីកញ្ញា នី មុនីនាថ គឺជាតួឯកស្រី ១ ដួង ដែលមានទេពកោសល្យពេញទីដែលស្រូបបានចិត្តអ្នកទស្សនាយ៉ាងច្រើន ជាពិសេសការសម្តែងនូវឈុតបែបមនោសញ្ចេតនាគឺសមជាមួយទឹកមុខ និងជាតួសម្តែងស្រីពូកែខាងចូលតួសម្រក់ទឹកភ្នែកបានភ្លាមៗតែម្តង។
ដោយឡែកនាអំឡុងរយាលស្ងាត់ពីសិល្បៈនោះ ស្រាប់តែកញ្ញា នី មុនីនាថ បង្ហើរសារមួយឃ្លាហាក់ដូចជាចង់ប្រាប់ថា ខ្លួនកំពុងមានម្ចាស់ស្នេហ៍ថ្មី មកស្អំបេះដូងជាមួយនឹងចំណងស្នេហ៍ខ្សែក ១ ខ្សែ។ កញ្ញា នី មុនីនាថ បានសរសេរថា៖ «អរគុណណាដែលនៅក្នុងជីវិតរបស់ខ្ញុំ គ្រប់ពេលវេលា! នេះហើយគឺជាសេចក្តីសុខសម្រាប់ជីវិត» និងសារថា៖ «ម្ចាស់ខ្សែក នេះហើយគឺជាម្ចាស់បេះដូង ជាកែវភ្នែករបស់ខ្ញុំ»។
តែកញ្ញា នី មុនីនាថ បែរជាបកស្រាយពង្វាងដានដូច្នេះវិញថា៖ «សារនោះ គឺគ្រាន់តែជាប៉ារ៉ូលកុនប៉ុណ្ណោះ ហើយខ្ញុំក៏តែងតែបង្ហោះលេងក្រោយពេលថតរូបតាមហេ្វសប៊ុកផងដែរ។ សព្វថ្ងៃនេះ ចំពោះរូបនាងខ្ញុំ សម្រាប់អ្នកតាមស្រឡាញ់នោះ គឺមានច្រើនណាស់ គ្រាន់តែថា ខ្ញុំមិនទាន់សម្រេចទទួលយកស្នេហ៍ពីអ្នកណាម្នាក់នៅឡើយទេ»៕
