.jpg)
ម្ហូបអាហារ Hengmart ត្រូវបានចម្អិនថ្មីស្រស់ភ្លាមៗ ប្រកបដោយអនាម័យ និងគុណភាពខ្ពស់។ រូបថត យូសុះ អាប់ឌុលរ៉ាស់ហ៊ីម
ភ្នំពេញ: ជាមួយកេរ្តិ៍ឈ្មោះ បោះសំឡេងជាច្រើនឆ្នាំមកហើយ សេង ហុកហេង ដែលល្បីល្បាញពីសេវាកម្មល្អ បម្រើអាហារឆ្ងាញ់ក្នុងកម្មវិធីមង្គល បុណ្យទាន និងឱកាសពិសេសនានានោះ បានបង្កើត Hengmart ដែលជាទីផ្សារលក់អាហារកញ្ចប់អនឡាញ និងដឹកជញ្ជូនដល់គ្រប់កន្លែងក្នុងរាជធានីភ្នំពេញដោយទទួលបានការគាំទ្រយ៉ាងខ្លាំង។
ដោយត្រូវបានអតិថិជនជឿជាក់ពីគុណភាពរួចជាស្រេច ក្នុងពេលមានការរីករាលដាលនៃជំងឺកូវីដ ១៩ ដែលតម្រូវឱ្យប្រជាជនរួមគ្នាបន្តការពារដោយគោរពតាមវិធានសុខាភិបាល Hengmart បានរិះរកគ្រប់មធ្យោបាយ ដើម្បីសម្រួលដល់អតិថិជន ដោយហាងបានបង្កើតផលិតផលថ្មីៗហៅថា «Easy Snack និង Easy Lunch» ដែលជាអាហារថ្ងៃត្រង់ និងសម្រន់សម្រាប់បំពេញតម្រូវការអតិថិជន។
លោក ជឺន ជឺហេង នាយកផ្នែកផ្សព្វផ្សាយរបស់ Hengmart និង សេង ហុកហេង បានប្រាប់ ភ្នំពេញ ប៉ុស្តិ៍ ពីគំនិតផ្ដួចផ្ដើមនេះថា៖ «នៅក្នុងខែកញ្ញានេះ យើងទើបតែបើកផលិតផលថ្មីៗដែលហៅថា «Easy Snack និង Easy Lunch» ដែលត្រូវបានដកស្រង់ចេញពីមុខម្ហូបមួយចំនួនសម្រាប់អាហារថ្ងៃត្រង់ និងអាហារសម្រន់»។
លោកបន្តថា៖ «មូលហេតុដែលយើងបង្កើត Easy Snack និង Easy Lunch ឡើងគឺយើងចង់សម្រួលដល់អតិថិជនដែលមានតម្រូវការ ឧទាហរណ៍ថា ក្រុមហ៊ុនគាត់មិនថាជាស្ថាប័នឯកជន ឬរដ្ឋ ឬគាត់ធ្វើការជាក្រុម ឬអាចជាលក្ខណៈគ្រួសារទៅដើរលេងឆ្ងាយជិតអី គឺគាត់អាចធ្វើការកុម្ម៉ង់ពីខាងយើង ព្រោះវាផ្ដល់ភាពងាយស្រួល តម្លៃសមរម្យ ហើយចំណេញពេលវេលា»។
ក្នុងតម្លៃ ១ ប្រអប់ត្រឹមតែ ១៤ ០០០ រៀល Easy Lunch ជាអាហារថ្ងៃត្រង់មានមុខម្ហូបជាច្រើន ដូចជា ត្រីប្រមាចំហុយសាច់ចិញ្ច្រាំពងទា មាន់អប់ទឹកស៊ីអ៊ីវ ឆាអម្ពិលទុំសាច់មាន់ ឆ្អឹងជំនីរបំពងឆាជូរអែម និងមានប្រភេទម្ហូបឆាជាច្រើនមុខទៀត ដែលប្រើប្រាស់សាច់គោ ជ្រូក មាន់ ទា អមជាមួយនឹងបាយស និងទឹកស៊ុប។
នៅមានជម្រើសអាហារតម្លៃត្រឹមតែ ៩ ០០០ រៀល គឺ Easy Snack ដែលជាប្រភេទអាហារសម្រន់ មានដូចជា ពងទាកូនបំពង ផាកឡូវនំប៉ាវតូច ប្រហិតត្រីរុំបន្លែ ផាត់ថៃ លតឆា និងជម្រើសញ៉ាំកំដរមាត់ឆ្ងាញ់ៗជាច្រើនទៀត។
លោក ជឺហេង បានរៀបរាប់ពីភាពពិសេសនៃឈុតអាហារនេះដែរថា៖ «ចំពោះភាពខុសគ្នារវាង «Easy Snack និង Easy Lunch» និងដៃគូប្រកួតប្រជែងទី១ គឺខាងយើងមិនមានការចម្អិនទុកនោះទេ។ លុះត្រាតែអតិថិជនកុម្ម៉ង់ទើបយើងនឹងធ្វើការចម្អិនភ្លាមៗតែម្ដង។ ដូច្នេះភ្ញៀវនឹងទទួលបានម្ហូបថ្មី ស្រស់ៗដោយមិនមានមុខម្ហូបណាខូចគុណភាព ឬក៏ទុកយូរនាំឱ្យប៉ះពាល់សុខភាពនោះទេ»។
លោក ជឺន ជឺហេង ជានាយកផ្នែកផ្សព្វផ្សាយនៅ Hengmart។ រូបថត យូសុះ អាប់ឌុលរ៉ាស់ហ៊ីម
ក្រៅពីរសជាតិ និងគុណភាពលោកក៏បញ្ជាក់ថា៖ «សំខាន់គឺមានតម្លៃដ៏សមរម្យ។ ភ្ញៀវគ្រប់ស្រទាប់វណ្ណៈមានលទ្ធភាពទទួលយកសេវាកម្ម»។
សម្រាប់ការកុម្ម៉ង់ភ្ញៀវអាចធ្វើទៅបានតាមរយៈគេហទំព័រហ្វេសប៊ុក Hengmart ដោយគ្រាន់តែទាក់ទងមកក្រុមការងារប្រាប់ពីមុខម្ហូប ឬទំនិញដែលចង់បាន ខាងហាងនឹងសាកសួរទៅវិញពីលេខទូរស័ព្ទ និងម៉ោងពេលដែលអតិថិជនចង់បាន។ បន្ទាប់ពីការកុម្ម៉ង់ សេវាកម្មនេះអាចចំណាយពេលចន្លោះពី ៤០-៤៥ នាទី ក្នុងការដឹកជញ្ជូនដល់កន្លែង។
ដើម្បីសម្រួលការទិញរបស់អតិថិជនជាងនេះបន្ថែមទៀត ហាងនឹងព្យាយាមបង្កើតកម្មវិធីកុម្ម៉ង់តាមទូរស័ព្ទដៃ ដែលនឹងរួចរាល់ក្នុងពេលឆាប់ៗ ដោយបន្ថែមភាពសម្បូរបែបកាន់តែច្រើននូវផលិតផល និងឈុតអាហារថ្មីៗ តបនឹងតម្រូវការអតិថិជនដែលនិយមទទួលទានអាហារទាំងរសជាតិឆ្ងាញ់ និងគុណភាពខ្ពស់នេះ។
ប្រធានគ្រប់គ្រងរូបនេះឱ្យដឹងផងដែរថា ការបង្កើតឈុតអាហារថ្មីនេះមានដំណើរការល្អណាស់ តែលោកក៏ចង់អរគុណទៅដល់បទពិសោធកន្លងមក ដូចជាការបង្កើតប្រភេទអាហារកញ្ចប់ធំៗ ដែលមិនសូវមានការពេញនិយមដូច Easy Snack និង Easy Lunch នាពេលបច្ចុប្បន្ននេះទេ។
លោកបានប្រាប់ថា៖ «ដូច្នេះដើម្បីចាប់យកទីផ្សារ យើងព្យាយាមបង្កើតផលិតផលថ្មីដើម្បីសម្របជាមួយទីផ្សារធ្វើការគិតគូរយ៉ាងណាឱ្យស័ក្តិសមជាមួយនឹងលទ្ធភាពរបស់អតិថិជនអាចជាវបាន អាចពិសាបាន និងប្រាកដថា ទទួលបាននូវអ្វីដែលពួកគាត់បានចំណាយ»។
លោកបានបញ្ជាក់ឱ្យដឹងដែរថា នៅក្នុង Hengmart មិនមែនមានតែ Easy Snack និង Easy Lunch និងអាហារកញ្ចប់ ប្រភេទបាយឆា ស៊ុប គ្រឿងក្លែមប៉ុណ្ណោះទេ ហាងនៅមានបម្រើគ្រឿងទេស និងប្រភេទអាហារពិសេសផ្សេងទៀត រួមទាំងជាផលិតផលក្នុងស្រុកដ៏សម្បូរបែបទៀតផង។
ជាក់ស្ដែងមុខម្ហូបដែលមានការពេញនិយមខ្លាំងពេលនេះគឺ កូនជ្រូកកណ្ដុរអាំងអំបិលម្ទេស ដែលលោកអះអាងថាជាផលិតផលក្នុងស្រុកពិតៗយកពីខេត្តមណ្ឌលគិរី និងទឹកដីឧត្តរមានជ័យ។
លោកថែមទាំងបង្រៀនពីវិធីសម្គាល់ទៅដល់បងប្អូនដែលប្រាថ្នារសជាតិជ្រូកកណ្ដុរពិតៗ ដោយលក្ខណពិសេសជ្រូកក្នុងស្រុក គឺមានខ្លាញ់តិច។ វាមានការលាងសម្អាតទៅតាមធម្មតា គឺពុះចំកណ្ដាលតែមួយ មាត់ និងច្រមុះមិនបែកពីគ្នាទេ។
រីឯក្រញាំជើងមានពណ៌ខ្មៅ ហើយមានរោមតិចៗនៅលើស្បែក ដែលខុសពីជ្រូកនាំចូលក្រៅស្រុក។
ក្រៅពីនេះហាងក៏មាន កូនក្រពើអាំងពីខេត្តសៀមរាប និងខេត្តកំពង់ចាម ដែលត្រូវបានចិញ្ចឹម ដើម្បីផ្គត់ផ្គង់ជាចំណីអាហារ។ សម្រាប់អ្នកដែលចង់ប្ដូររសជាតិ Hengmart ក៏មានជាកន្ធាយចំហុយខ្ទឹមសដ៏ឈ្ងុយឆ្ងាញ់ផងដែរ។
ជាមួយនឹងក្ដីមោទនៈ ដែលទទួលបានការទុកចិត្តពីអតិថិជនកន្លងមក នាយកផ្នែកផ្សព្វផ្សាយ លោក ជឺន ជឺហេង បន្ដថា៖ «ពេលខាងមុខ យើងនឹងបន្ថែមមុខម្ហូបថ្មីៗទៀត ហើយនៅថ្ងៃភ្ជុំបិណ្ឌ ដាក់បិណ្ឌខាងមុខ យើងក៏មានជាឈុតអាហារផ្សេងទៀតសម្រាប់ជាតម្រូវការអតិថិជនដែលគាត់ចង់យកធ្វើជាចង្ហាន់ទៅប្រគេនលោក រួមទាំងមានសាច់ខ្វៃ សាច់អាំង ផ្សេងៗអាចធ្វើការកុម្ម៉ង់ទុកមុនសម្រាប់ពិធីសែនព្រេន»។
សម្រាប់ព័ត៌មានបន្ថែមអំពី ហាង Hengmart របស់ សេង ហុកហេង សូមទំនាក់ទំនងតាមទំព័រហ្វេសប៊ុក @hengmartdotcom និង សេង ហុកហេង @senghokhengcatering៕
វីដេអូ៖
