.jpg)
មនុស្សម្នាចោមរោមថតរូបគោតឿបំផុតក្នុងលោក កាលពីខែកក្កដា។ រូបថត AFP
ក្រុងដាក្កា: គោតឿបំផុតដ៏ល្បីឈ្មោះនៅបង់ក្លាដែស បានជាប់កំណត់ត្រាហ្គីនណេសពិភពលោក ក្រោយពីតារាសត្វជើងបួន ១ ក្បាលនេះ បានងាប់ជាង ១ ខែទៅហើយ។
រ៉ានី ជាឈ្មោះគោតឿកម្ពស់ ៥០,៨ សង់ទីម៉ែត្រ ដែលបានក្លាយខ្លួនជាតារាអ៊ីនធឺណិត ទាក់ទាញមនុស្សរាប់ពាន់នាក់មកពីស្រុកផ្សេងៗ ដើម្បីសុំថតរូបជាមួយវា។
ម្ចាស់របស់គោតឿនេះ បានដាក់ពាក្យទៅកំណត់ត្រាហ្គីនណេសមិនបានប៉ុន្មានផង ស្រាប់តែសត្វសំណព្វបានងាប់ដោយសារខ្យល់ក្នុងពោះ។
ម្ចាស់គោលោក កាហ្ស៊ី ម៉ូហាម៉ាដ អាប៊ូ ស៊ីហ្វីអាន បាននិយាយថា លោកទទួលបានអ៊ីមែលពីកំណត់ត្រាហ្គីនណេសពិភពលោកកាលពីថ្ងៃចន្ទ ដោយទទួលស្គាល់នូវលក្ខណពិសេសរបស់គោ រ៉ានី។
នៅលើវេបសាយហ្គីនណេស មានការបញ្ជាក់ថា គោតឿ ១ ក្បាលនេះ បានផ្ដួលកំណត់ត្រាចាស់របស់គោឥណ្ឌាឈ្មោះ ម៉ានីគីយ៉ាម ដែលមានកម្ពស់ ៦១ សង់ទីម៉ែត្រ។
លោកបាននិយាយថា៖ «យើងបានផ្ញើវីដេអូជាច្រើនពីគោ រ៉ានី តាមការណែនាំរបស់ហ្គីនណេស ហើយយើងថែមទាំងបានផ្ញើរបាយការណ៍ស្លាប់របស់វា ដើម្បីបញ្ជាក់ថា វាលាចាកលោកដោយជំងឺ ជារឿងប្រក្រតី ពុំមានអ្វីគួរឱ្យសង្ស័យទេ»។
លោកបានបញ្ជាក់ថា លោកក៏បានផ្ញើរបាយការណ៍សុខភាពរបស់គោញីនេះ ដើម្បីឱ្យអស់មន្ទិលថា វាត្រូវបានប្រើប្រភេទថ្នាំចាក់អ័រម៉ូនបង្អាក់ការលូតលាស់ផងដែរ។
ម្ចាស់គោតឿបំផុតក្នុងលោករូបនេះបាននិយាយថា៖ «យើងពិតជាមានអារម្មណ៍ច្របូកច្របល់។ យើងសប្បាយផងដែលវាទទួលបានងារនេះ ហើយទន្ទឹមនឹងនោះយើងក៏សោកស្ដាយផងដែលវាលែងនៅជាមួយយើងទៀត»។
លោកបានថ្លែងទាំងស្រណោះថា៖ «សូម្បីតែអ្នកមើលថែវាផ្ទាល់ គ្រាន់តែឮដំណឹងនេះភ្លាម ស្រាប់តែស្រក់ទឹកភ្នែកយំហ៊ូតែម្ដង»៕ AFP/HR
