.jpg)
កម្មវិធីផ្ដល់ភាពងាយស្រួលដល់ការតាមដានផ្លែផ្កាបុគ្គលការជ្រើសរើសបុគ្គលិកការរៀបចំកម្មវិធី និងការធ្វើមាតិកា។ រូបថត សហការី
ភ្នំពេញ៖ បង្កើតឡើងនៅកម្ពុជា កម្មវិធីគ្រប់គ្រងគម្រោងការងារតាមប្រព័ន្ធអ៊ីនធើណិត Bloo ដែលបានកកើតមុន ១ ឆ្នាំនៃការផ្ទុះឡើងនៃជំងឺរាតត្បាត បានផ្ដល់ការប្រើប្រាស់ឥតគិតថ្លៃដល់បណ្ដាស្ថាប័នអប់រំ និងអង្គការជាច្រើន បន្ថែមពីលើការផ្ដល់សេវាកម្មក្នុងតម្លៃសមរម្យសម្រាប់អាជីវកម្ម។
ក្រោមឈ្មោះគម្រោងមូលនិធិមួយ Bloo4Good កម្មវិធីគ្រប់គ្រងគម្រោងការងារតាមប្រព័ន្ធអ៊ីនធើណិតនេះបានផ្ដល់អាជ្ញាប័ណ្ណប្រមាណជាង ៥០០០ ដែលគិតជាទឹកប្រាក់ចំនួន ២,៥ លានដុល្លារអាមេរិចទៅកាន់ស្ថាប័នអប់រំ អង្គការក្រៅរដ្ឋាភិបាល និងអង្គការមិនរកប្រាក់ចំណេញ។
អ្នកនាង ច័ន្ទ សេរ៉ាហ្វីន មកពីសមាជិកក្រុមផ្នែកទីផ្សារ Bloo ប្រាប់ ភ្នំពេញ ប៉ុស្ដិ៍ ពីគោលបំណងដែលមូលនិធិ Bloo4Good ផ្ដួចផ្ដើមឡើងថា៖ «ជាមួយនឹងចក្ខុវិស័យ «ធ្វើឱ្យពិភពលោកកាន់តែប្រសើរឡើងជាមួយគ្នា» គឺយើងចង់ជួយទៅដល់អង្គការ និងអ្នកដែលបានធ្វើអំពើល្អដូចដែលបានរៀបរាប់ខាងលើ ដើម្បីចូលរួមជំរុញឱ្យពួកគេបន្តធ្វើអំពើល្អៗទាំងនោះតទៅទៀត»។
ចាប់តាំងពីជំងឺរាតត្បាតមនុស្សត្រូវបានបង្ខំឱ្យផ្លាស់ប្ដូរទម្លាប់រស់នៅ មិនថាជាការងារ ការសិក្សា ការជួបប្រជុំដែលត្រូវបានធ្វើតាមរយៈអនឡាញជំនួសឱ្យការប្រាស្រ័យទាក់ទងដោយជួបផ្ទាល់។
ជាពិសេសអាជីវកម្ម ក្រុមហ៊ុនមួយៗត្រូវបានប្រើប្រាស់នូវកម្មវិធីបង្កើតក្រុម និងបំពេញការងារពីចម្ងាយ។ យ៉ាងណាមិញ បញ្ហាប្រឈមគឺឯកសារមិនមានលំដាប់លំដោយជាហេតុធ្វើឱ្យចង្វាក់ការងារចំណាយពេលយូរ។
Bloo ត្រូវបានស្ថាបនាឡើងដោយជនជាតិអ៊ីតាលី-អង់គ្លេស អេម៉ានូអែល ហ្វាចា (ត្រូវបានស្គាល់ថា ម៉ាន់នី) ក្នុងឆ្នាំ ២០១៨។ រូបថត សហការី
អ្នកនាង សេរ៉ាហ្វីន បានបន្តថា៖ «ដូចជាសម្រួលដល់ការងារគ្រូ ឬសាស្ត្រាចារ្យដោយពួកគាត់នឹងទទួលបានអត្ថប្រយោជន៍ពី Bloo ក្នុងការរៀបចំកាលវិភាគ ឬរក្សាទុកឯកសារ និងមេរៀនផ្សេងៗ»។
Bloo ត្រូវបានស្ថាបនាឡើងដោយជនជាតិអ៊ីតាលី-អង់គ្លេសលោក អេម៉ានូអែល ហ្វាចា (ត្រូវបានស្គាល់ថា ម៉ាន់នី) ជាដៃគូគ្រប់គ្រងនៃទីភ្នាក់ងាររចនា Mad ក្នុងឆ្នាំ ២០១៨។ ក្រោយមកទៀត គម្រោងនេះត្រូវបានសហការបង្កើតដោយ ដុង ទ្រឿង អតីតប្រធានផ្នែកបច្ចេកវិទ្យារបស់ក្រុមហ៊ុនដែកថែបវៀតណាម Ton Nam Kim។
អ្នកនាង សេរ៉ាហ្វីន ឱ្យដឹងថា Bloo ត្រូវបានស្ថាបនាឡើងដោយនៅពេលស្ថាបនិកម៉ាន់នីធ្វើដំណើរទៅសហរដ្ឋអាមេរិកកាលពីខែកក្កដាឆ្នាំ ២០១៧។ បញ្ហាប្រឈមដែលលោកបានជួបប្រទះនៅពេលដំណើរការទីភ្នាក់ងារ Mad ដោយរូបលោកធ្លាប់សាកល្បងកម្មវិធីគ្រប់គ្រងគម្រោងផ្សេងៗជាច្រើនពីមុនមក ប៉ុន្តែបានឃើញថា ភាគច្រើនពិបាកប្រើ និងមានតម្លៃថ្លៃ។
អ្នកនាង សេរ៉ាហ្វីន បន្ថែមថា៖ «វាមិនត្រឹមតែថ្លៃទៅលើក្រុមហ៊ុនបង់ដំបូងទេថែមទាំងចំណាយច្រើនទៅលើផលិតភាពនៃការប្រើប្រាស់មុខងារផ្សេងៗជាច្រើនទៀត។ ដូច្នេះក្នុងអំឡុងពេលធ្វើដំណើរគាត់បានបោះជំហានធ្វើការវិនិយោគដំបូង ដើម្បីឱ្យគំនិតបង្កើតកម្មវិធីសម្រួលបញ្ហានេះលេចរូបរាងឡើងបាន»។
Bloo ក៏បានផ្ដល់ជាមុខងារសំខាន់ៗជាច្រើនដូចជា ផ្ទៃសម្គាល់ ប្រតិទិន បញ្ជី ផែនទី សកម្មភាព ការក្រើនរំឭក បញ្ចេញ និងបញ្ចូលព័ត៌មាន ទម្រង់បែបបទ និងស្វ័យភាព ជាដើម សម្រាប់ជួយសម្រួលការគ្រប់គ្រងរបស់អ្នកប្រើប្រាស់។ រូបថត សហការី
រហូតដល់ឆ្នាំ ២០១៨ ទើបកម្មវិធី Bloo បានកើតជាផ្លូវការដោយសម្រួលឱ្យមនុស្សអាចធ្វើការពីចម្ងាយ ផ្ដល់ភាពងាយស្រួលទៅដល់ការគ្រប់គ្រងគម្រោងការងារនឹងជួយសម្រួលលំហូរការងារនៃអាជីវកម្មរបស់អ្នកប្រើប្រាស់មិនថាពួកគេនៅទីណាក្ដី។
លើសពីនេះ Bloo ក៏ត្រូវបានប្រើប្រាស់ដោយអង្គការចំនួនជាង ១៣០០ នៅជាង ១២០ ប្រទេស និងមានច្រើនភាសាដូចជា អង់គ្លេស ខ្មែរ វៀតណាម បារាំង អេស្ប៉ាញ អ៊ីតាលី អាល្លឺម៉ង់ ឥណ្ឌូនេស៊ី និងគ្រោងបន្ថែមភាសាជាច្រើនទៀតក្នុងពេលឆាប់ៗនេះ។
កម្មវិធីគ្រប់គ្រងការងារ Bloo ក៏បានផ្ដល់ជាមុខងារសំខាន់ៗជាច្រើនដូចជា board, calendar, list, map, activity feed, notifications, import and export, forms, automation និងច្រើនទៀតសម្រាប់ជួយសម្រួលការគ្រប់គ្រងរបស់អ្នកប្រើប្រាស់។
ការចែករំលែកការងារជាមួយសមាជិកក្រុមអាចជួយកិច្ចសហការឱ្យកាន់តែល្អប្រសើរ និងកាត់បន្ថយការចំណាយពេលវេលាស៊ាំញ៉ាំ។
អ្នកនាងបានឱ្យដឹងពីភាពខុសគ្នារវាង Bloo និងកម្មវិធីផ្សេងទៀតថា៖ «វាងាយស្រួលប្រើជាងព្រោះយើងបានផ្តោតការយកចិត្តទុកដាក់លើបទពិសោធន៍អ្នកប្រើប្រាស់តាំងពីថ្ងៃដំបូង។ នេះមានន័យថាអ្នកណាក៏អាចប្រើ Bloo ដោយមិនចាំបាច់មានការបណ្តុះបណ្តាល»។
ក្រុមការងា Bloo ជាកម្មវិធីគ្រប់គ្រងគម្រោងដែលបានបង្កើតឡើងនៅក្នុងប្រទេសកម្ពុជា ដោយផ្ដល់ការប្រតិបត្តិការយ៉ាងងាយស្រួលតាមប្រព័ន្ធអ៊ីនធឺណែត។ រូបថត សហការី
អ្នកនាងបន្តថា៖ «ចំណុចសំខាន់មួយទៀតតម្លៃយើងគឺធូរថ្លៃខ្លាំងត្រឹមតែ ៥០ ដុល្លារក្នុងមួយខែ សម្រាប់អាជីវកម្មទូទៅក្រៅពីស្ថាប័ននៅក្នុងគម្រោង Bloo4Good។ ក្នុងពេលដែលកម្មវិធីផ្សេងគេគិតតម្លៃអ្នកប្រើប្រាស់ម្នាក់ៗ Bloo គិតសម្រាប់មួយក្រុមហ៊ុន តែវាមានសក្ដានុពលខ្លាំងដូចកម្មវិធីផ្សេងៗទៀតដែរ»។
តម្រូវការតែមួយគត់ដើម្បីប្រើ Bloo គឺអ៊ីម៉ែល ដើម្បីចាប់ផ្តើមដោយមានការផ្ដល់បទពិសោធន៍ប្រើសាកល្បងឥតគិតថ្លៃរយៈពេល ១៤ ថ្ងៃ។ នៅពេលដែលអតិថិជនសម្រេចចិត្តប្រើប្រាស់ Bloo ពួកគេអាចបញ្ចូលព័ត៌មានលម្អិតកាតរបស់ពួកគេ។
សម្រាប់អ្នកស្ថិតក្នុងប្រភេទស្ថាប័នអប់រំ ឬអង្គការមិនស្វែងរកប្រាក់ចំណេញ អ្នកនាង សេរ៉ាហ្វីន ក៏បានចែករំលែកសារផងដែរថា៖ «ប្រសិនបើអ្នកជាស្ថាប័នអប់រំ អង្គការក្រៅរដ្ឋាភិបាល និងអង្គការមិនរកប្រាក់ចំណេញហើយកំពុងរកអាជ្ញាប័ណ្ណឥតគិតថ្លៃពី Bloo មានជំហានពីរបីប៉ុណ្ណោះ ដើម្បីចាប់ផ្តើម»។
អ្នកនាងបានរៀបរាប់ត្រួសៗថា៖ «ដំបូងបង្កើតគណនីនៅលើ Bloo.io បញ្ជូនពាក្យសុំរបស់អ្នកតាមអ៊ីនធើណិតក្រុមយើងនឹងពិនិត្យឡើងវិញក្នុងរយៈពេល ២៤-៤៨ ម៉ោង។ បន្ទាប់ពីការបញ្ជាក់ ហើយអ្នកនឹងទទួលបានអាជ្ញាប័ណ្ណពេញមួយជីវិត ១០០% ។ ដូច្នេះតើអ្នករង់ចាំអ្វីទៀត?»។
សម្រាប់ពត៌មានបន្ថែម Bloo អាចចូលទៅកាន់គេហទំព័រ https://www.bloo.io ។
