.jpg)
រូបសំណាកនិមិត្ដរូបនៃព្រះយេស៊ូគ្រិស្ដខ្ពស់ត្រដែតលើទីក្រុងរីយ៉ូ ដេជេណៃរ៉ូ បានប្រារឰខួបទី ៩០ ឆ្នាំកាលពីថ្ងៃអង្គារ។ AFP
ក្រុងរីយ៉ូ៖ រូបសំណាកនិមិត្ដរូបនៃព្រះយេស៊ូគ្រិស្ដ ដែលឈរខ្ពស់ត្រដែតលើទីក្រុងរីយ៉ូ ដេជេណៃរ៉ូ បានប្រារឰខួបទី ៩០ ឆ្នាំ កាលពីថ្ងៃអង្គារ ជាមួយការស្រែកច្រៀងចម្រៀងបទថ្មី the Mass និងជាអត្ដសញ្ញាណប្រចាំប្រទេសប្រេស៊ីល។
ពិធីសាសនាត្រូវបានរៀបចំឡើងនៅក្បែររូបសំណាកយក្ស តែដោយសារអាកាសធាតុមិនអំណោយផល កម្មវិធីត្រូវបានបង្វែទៅកាន់ព្រះវិហារកាតូលិកមេឌីទែរណេ ភាគកណ្ដាលក្រុងរីយ៉ូ។
លោកឪពុក អូរ៉ានី តេមប៉េស្ដា បាននិយាយអំឡុងពិធី the Mass ដោយសំដៅលើពលរដ្ឋក្រុងរីយ៉ូថា៖ «យើងជាអ្នកក្រុងរីយ៉ូ រមែងសម្លឹងមើលព្រះយេស៊ូបាំងបិទដោយពពក តែយើងដឹងថា ទ្រង់នៅទីនោះ។ យើងនៅបន្ដជម្នះនឹងវិបត្ដិកូវីដ តែជាមួយនឹងលទ្ធផលដ៏សុទិដ្ឋិនិយមនេះ យើងអរគុណដល់ការចាក់វ៉ាក់សាំង។ ពពកខ្មៅបាំងបិតកាលពីឆ្នាំមុន បានរសាត់បាត់បន្ដិចម្ដងៗ»។
ពលរដ្ឋប្រេស៊ីលអបអរខួបរូបសំណាកព្រះយេស៊ូគ្រិស្ដលើក្រុងរីយ៉ូទី ៩០ឆ្នាំ។
ប្រេស៊ីលមានអត្រាអ្នកស្លាប់ដោយសារកូវីដច្រើនបំផុតលំដាប់ទី២ ជាមួយចំនួនជាង ៦០ ម៉ឺននាក់ បន្ទាប់ពីអាមេរិក។ មុនពេលផ្ទុះវីរុសកូរ៉ូណា រូបសំណាកកម្ពស់ ៣៨ ម៉ែត្រ ស្ថិតនៅកំពូលភ្នំខូរកូវ៉ាដូ និងស្គាល់ជាអច្ឆរិយៈមួយក្នុងចំណោមអច្ឆរិយសម័យទំនើបទាំង ៧ ដែលបានទាក់ទាញភ្ញៀវទេសចរជិត ២ លាននាក់ក្នុងមួយឆ្នាំ។
ក្នុងឆ្នាំ ១៩២១ ព្រះវិហារកាតូលិក បានឧបត្ថម្ភការប្រកួតមួយក្នុងការកសាងវិមានសាសនាដើម្បីប្រារឰខួបឯករាជ្យជាតិពីប្រទេសព័រទុយហ្គាល់គម្រប់ ១០០ឆ្នាំ។
វិស្វករប្រេស៊ីល ហៃធ័រ ដា ស៊ីលវ៉ា កូស្ដា និងជាងចម្លាក់បារាំង ផូល លេនដូវស្គី បានឌីហ្សាញ និងកសាងវិមានសំណាក ដែលបើកសម្ពោធជាផ្លូវការនៅថ្ងៃទី ១២ ខែ តុលា ឆ្នាំ ១៩៣១។
ក្នុងឆ្នាំ ១៩៧៣ វាត្រូវបានប្រកាសជាវិមានប្រវត្ដិសាស្ដ្រ ហើយក្នុងឆ្នាំ ២០០៧ វាត្រូវានចាត់ចូលក្នុងបញ្ជីអច្ឆរិយសម័យថ្មីទាំង ៧៕ AFP/HR
ពលរដ្ឋប្រេស៊ីលអបអរខួបរូបសំណាកព្រះយេស៊ូគ្រិស្ដលើក្រុងរីយ៉ូទី ៩០ឆ្នាំ។ AFP
