.jpg)
រូបតំណាង៖ ស្គរនិយាយរបស់កុលសម្ព័ន្ធនៅប្រទេសក្នុងទ្វីបអា្រហ្វិក។ រូបថត AFP
ក្រុងយ៉ាមូស៊ូក្រូ: ការប្រគល់មកវិញនូវ «ស្គរនិយាយ» Djidji Ayokwe ដ៏សំណព្វរបស់កុលសម្ព័ន្ធ Ebrie ប្រទេសកូតឌីវ័រ ពីសំណាក់ប្រទេសបារាំង នាពេលខាងមុខ គឺជា «ការផ្លាស់ប្ដូរបែបប្រវត្ដិសាស្ដ្រ»។
ក្លាវ៉ាយែរ អាហ្គែហ្គូ ម៉ូប៊ីអូ ប្រធានកុលសម្ព័ន្ធ Ebrie បានប្រាប់ AFP ថា៖ «យើងលែងហ៊ានរំពឹងពីការវិលត្រឡប់ស្គរនិយាយនេះ ដែលជាគ្រឿងបំពងសំឡេងយើង ទៀតហើយ»។
សប្ដាហ៍មុនប្រធានាធិបតីបារាំង លោក អេមម៉ានូអែល ម៉ាក្រុង បានប្រកាសថា ស្នាដៃសិល្បៈ និងវត្ថុបុរាណដទៃទៀត ដែលត្រូវបានស្វះស្វែងរកដោយកូតឌីវ័រ នឹងត្រូវប្រគល់ឱ្យម្ចាស់ដើមវិញឆាប់ៗនេះ។ ពួកគេក៏បានបញ្ចូលស្គរនិយាយ Djidji Ayokwe ដែលតាំងក្នុងសារមន្ទីរ Quai Branly ក្រុងប៉ារីស។
ការប្រគល់ស្នាដៃសិល្បៈបាត់បង់ទៅកាន់ដែនដីអាហ្វ្រិកវិញ គឺជាការរឹតចំណងសម្ព័ន្ធភាពថ្មីមួយ ដែលលោក ម៉ាក្រុង ចង់ធ្វើជាមួយទ្វីបនេះ។
ស្គរ ដែលត្រូវបានប្រើជាគ្រឿងទំនាក់ទំនងដើម្បីបញ្ជូនសារពីតំបន់មួយទៅតំបន់មួយ ត្រូវបានបារាំងយកក្នុងឆ្នាំ ១៩១៦ ពេលកូតឌីវ័រ ស្ថិតក្នុងអាណានិគមរបស់ខ្លួន។
លោកបាននិយាយថា៖ «យើងសុំអរគុណដល់លោកប្រធានាធិបតីបារាំង ម៉ាក្រុង និងរង់ចាំទទួលស្វាគមន៍វត្ដមានស្គរនិយាយត្រឡប់មកវិញ។ ពិធីទទួលផ្លូវការដ៏ធំមួយនឹងរៀបចំឡើង ដើម្បីជម្រាបជូនដល់ពលរដ្ឋ ៧ ភូមិ ដែលស្ថិតក្នុងកុលសម្ព័ន្ធ Ebrie នៃតំបន់ Abidjan»។
លោកបានបន្ថែមថា៖ «ស្គរនិយាយនេះនឹងបានជីកកកាយប្រវត្ដិសាស្ដ្រយើងឡើងវិញ និងលើកមុខមាត់កុលសម្ព័ន្ធ Ebrie ដែលស្ទើរតែរលាយឈ្មោះពីការអភិវឌ្ឍតំបន់ Abidjan ដែលមានប្រជាជន ៥ លាននាក់»។
លោក ម៉ូប៊ីអូ បានឱ្យដឹងថា៖ «អវត្ដមានស្គនិយាយបានធ្វើឱ្យរង្គោះរង្គើលដល់សាមគ្គីភាពសង្គម និងវប្បធម៌របស់កុលសម្ព័ន្ធ Ebrie យើង»៕ AFP/HR
