ក្រុងប៊ែរឡាំង: ពីរូបភាពរបស់តួអង្គមនុស្សយក្សសាច់ដុំបៃតង ហុលក៍ ដែលស្រាប់តែលោតពីលើក្បាលអ្នក ទៅផ្ទាំងគំនូរដែលផ្លាស់ប្តូរពណ៌ ការតាំងពិព័រណ៍សិល្បៈតាមដងផ្លូវទីក្រុងប៊ែរឡាំងមួយ ផ្តល់ឱ្យអ្នកទស្សនានូវបទពិសោធលក្ខណៈ 3D។
Game Over ជាឈ្មោះពិព័រណ៍ដែលយកគំនិតពីវីដេអូហ្គេមត្រូវបានគេដាក់នៅក្នុងអតីតកាស៊ីណូលាតសន្ធឹងលើផ្ទៃដី ២ ០០០ ម៉ែត្រការ៉េ ដោយវាក៏នឹងត្រូវបំផ្លាញ។
សិល្បករ ៨០ នាក់ កំពុងបង្ហាញស្នាដៃរបស់ពួកគេនៅទីនេះ ជាមួយកម្មវិធីពិសេសជួយបង្កើនបទពិសោធឌីជីថលដល់ទស្សនិកជន។
លោក Joern Reiners បាននិយាយថា៖ «បន្ទាប់ពីខែដ៏ខ្សត់ខ្សោយកន្លងមកនេះ ដោយសារតែវីរុសឆ្លង ពិភពងងឹតយើងបានបង្កើតពណ៌បន្តិចបន្តួច មិនត្រឹមតែនៅក្នុងជីវិតរបស់យើងប៉ុណ្ណោះទេ ប៉ុន្តែសង្ឃឹមថានៅក្នុងជីវិតរបស់អ្នកទស្សនា និងអ្នកស្ញប់ស្ញែងសិល្បៈយើងផងដែរ» ។
លោកបន្តថា៖ «យើងព្យាយាមប្រមូលផ្តុំសិល្បករត្រឹមត្រូវដែលនឹងបន្តអភិវឌ្ឍភាពច្នៃប្រឌិត ដោយរួមគ្នាបង្កើតស្នាដៃនៅទីនេះ»។
សមាជិកក្រុម ឌិកសិន រូបនេះបានរៀបចំការតាំងពិព័រណ៍លេចចេញស្រដៀងគ្នានៅឆ្នាំ ២០១៧ ដោយវិចិត្រករបានលាបជញ្ជាំងធនាគារចាស់ជាមួយគំនូររបស់ពួកគេ មុនពេលក្រុមវាយកម្ទេចបានមកដល់។
បន្ថែមពីលើសិល្បៈ ពួកគេក៏មានកម្មវិធីពិសេសនេះ អនុញ្ញាតឱ្យអ្នកទស្សនាចង្អុលទូរស័ព្ទ និងរូបភាព ដើម្បីស្វែងយល់ពីអ្វីដែលហួសពីស្នាដៃគ្រាន់តែតាំងលម្អ។
ទីក្រុងប៊ែរឡាំង គឺជាមជ្ឈមណ្ឌលសម្រាប់ដំណើរទស្សនាស្វែងយល់ពីសិល្បៈវប្បធម៌។ ទីក្រុងនេះមានទស្សនីយភាពសិល្បៈតាមចិញ្ចើមផ្លូវដ៏រស់រវើក និងសម្បូរបែបនេះ ជាពិសេសជញ្ជាំងខណ្ឌចែកអាល្លឺម៉ង់ដែលត្រូវបានលាបពណ៌អំឡុងឆ្នាំ ១៩៩០៕ AFP/HR