ក្រុងតេហ្គូស៊ីហ្គាល់ប៉ា៖ បក្សីតូចៗ ទើបដុះរោម រំលេចនូវឆោមពណ៌លឿង ខៀវ និងក្រហម បាននាំគ្នាងើបក្បាលចេញពីមាត់សំបុក ដែលត្រូវធ្វើឡើងពីធុងប្លាស្ទីក តែត្រូវបានចងភ្ជាប់ទៅនឹងដើមឈើ។
ពួកវាចាប់កំណើតឡើងនៅក្នុងព្រៃ នៃសហគមន៍ Gracias ចម្ងាយប្រមាណ ១៨០ គីឡូម៉ែត្រភាគពាយព្យក្រុងតេហ្គូស៊ីហ្គាល់ប៉ា និងក្បែរឧទ្យានជាតិ Celaque លើផ្ទៃដី ២៦ ០០០ ហិកតា ដោយគ្របដណ្ដប់លើចម្ការដំណាំ ដែនជម្រកសត្វ ២៩០ ប្រភេទ និងរុក្ខជាតិ ១ ២០០ ប្រភេទ។
វិស្វករកសិកម្ម កាតារីន អេស្កាឡានតេ មកពីវិទ្យាស្ថានអភិរក្សព្រៃរដ្ឋ (ICF) បាននិយាយពេលអ្នកស្រីមើលឃើញបក្សីពីរក្បាលមានពណ៌ស្វាយព្រឿងៗនៅក្នុងទ្រុងថា៖ «នៅលើជើងម្ខាង ពួកវាមានសញ្ញារង្វង់មួយ ហើយនេះបានឱ្យយើងសម្គាល់ថា តើពួកវារស់នៅសំបុកណា កើតតាំងពីឆ្នាំណា ហើយមេបារបស់ពួកវាមួយណា»។
កិច្ចការទាំងនេះ គឺជាផ្នែកមួយនៃបេសកកម្មរបស់អង្គការ Pro-Alas នៅប្រទេសហុងឌូរ៉ាស កំពុងបន្ដពូជពពួកសេកនៅអាមេរិកកណ្ដាលឡើងវិញ។
ម៉ូរីស៊ីអូ ឃូវ៉ាស ជនជាតិម៉ិកស៊ិក ជានាយកប្រតិបត្ដិឧទ្យានបក្សី Macaw Mountain បាននិយាយថា៖ «គម្រោងនេះផ្ដោតលើការស្រោចស្រង់ពូជបក្សីនេះឡើងវិញការចិញ្ចឹមជួញដូរខុសច្បាប់ ផ្ដល់ជម្រកថ្មី និងបន្ដពូជជាថ្មី»។
លោកបានប៉ាន់ប្រមាណថា បច្ចុប្បន្នមានសេកប្រមាណ ២ពាន់ក្បាលរស់នៅជ្រលងកូប៉ាន ជាទីដែលអាជ្ញាធរដាក់ជាតំបន់ការពារជាមួយសហគមន៍។ បក្សិជាច្រើនបានសាយភាយកូនចៅដោយមិនចាំបាច់មានជំនួយ។
យ៉ាងណាមិញ ដំណើរបន្ដពូជដោយការចិញ្ចឹមត្រូវធ្វើឡើងជាច្រើនដំណាក់កាល ដែលជាទូទៅបក្សីមួយគូ មានស៊ុតចំនួន ៣គ្រាប់ ដាក់ក្នុងទូរភ្ញាស់។ ដូច្នេះ ក្រោយការភ្ញាស់រយៈពេល ២៨ថ្ងៃ ពួកវាអាចត្រូវបានបន្ដថែទាំទៀត។
នៅអាយុ ៩០ថ្ងៃ ពេលពួកវាអាចហើរបាន កូនសេកបន្ដរស់នៅក្នុងទ្រង់ធំ ដែលក្រុមអ្នកជំនាញបានហៅថា «កម្រិតមតេយ្យ» ជាទីដែលពួកវាអាចប្រាស្រ័យទាក់ទងជាមួយអម្បូរដទៃដើម្បីស្វែងយល់ពីអត្ដចរឹក និងការប្រើប្រាស់សំឡេងរៀងៗខ្លួន។ វាចាប់ផ្ដើមស្គាល់មែកឈើ រុក្ខជាតិ និងផ្លែឈើផ្សេងៗ។
នៅក្នុងព្រៃ ពួកវាជាសត្វរស់នៅជាហ្វូង ដែលប្រមាណ ២៥ ក្បាល ក្នុង ១ ក្រុម ឬច្រើនជាងនេះ អាស្រ័យលើទំហំចំនួនរបស់ពួកវា។ ដល់វេលាបន្ដពូជ ពួកវាចាប់ផ្ដើមបែកហ្វូង និងចំណាយពេលរហូតដល់ ៩០ ថ្ងៃ មុនពេលកូនៗចេះហើរ។
មេបាថែទាំកូនៗយ៉ាងតិច ១ឆ្នាំទៀត រហូតដល់ពួកវាមានភាពម្ចាស់ការលើខ្លួនឯង។
លោក ឃូវ៉ាស បានគូសបញ្ជាក់ថា៖ «យើងមានពូជចម្រុះ និងមានបំណងពង្រិកវិសាលភាពពូជហុងឌូរ៉ាសទៅកាន់បណ្ដាប្រទេសដទៃ និងចូលរួមចំណែកបង្កើតនូវជីវចម្រុះដល់ព្រៃក្នុងស្រុកផងដែរ»៕ AFP/HR