ក្រុងកាប៊ុល: រដូវបុណ្យផ្លែទទឹមរបស់អាហ្វហ្គានីស្ថានបានចាប់ផ្ដើម តែផ្លែទទឹមក្រហមស្រស់រាប់ពាន់តោននាឆ្នាំនេះប្រឈមនឹងការទុំរលួយចោលនៅលើរថយន្ដ ដែលត្រូវបានរាំងខ្ទប់នៅព្រំដែនប៉ាគីស្ថាន បិទបើកមិនទៀងទាត់ ដែលធ្វើឱ្យកម្មកររាប់ពាន់នាក់ដើរទាត់ខ្យល់។
ជាមួយរសជាតិផ្អែម គ្រាប់ក្រហមច្រាលស្ថិតនៅកញ្ចុំក្នុងសម្បកពណ៌ក្រហមព្រាលៗ ផ្លែទទឹមត្រូវបានស្គាល់ជាផ្លែឈើជំនួយសុខភាព និងជាដំណាំដ៏សំខាន់បំផុតមួយប្រចាំតំបន់ខាងត្បូងប្រទេស។
ប៉ុន្ដែផ្លែទទឹមនេះកំពុងតែទុំជ្រុះ ខណៈអាហ្វហ្គានីស្ថានជួបនឹងស្ថានភាពដុនដាប តាំងពីក្រុមតាលីបង់គ្រប់គ្រងអំណាចកាលពី ២ ខែមុន។
លោក ហាជី ណានី អាហ្គា ជាប្រធានសហជីពផ្លែឈើស្រស់ៗ នៅកាន់ដាហា បានប្រាប់ AFP ថា៖ «យើងមានកម្មករ ១៥ ០០០ នាក់ នៅក្នុងតំបន់ ដែលត្រូវបានផ្អាកការងារដោយសារពាណិជ្ជកម្មបានជាប់គាំង ហើយផ្លែឈើទុំចោល»។
នៅក្រោមដើម ផ្លែទទឹមធំៗបេះច្រកបាវ ហើយត្រូវបានលើកដាក់រថយន្ដដឹកទំនិញឆ្ពោះទៅកាន់ព្រំដែនប៉ាគីស្ថាន Spin Boldak។ ប៉ុន្ដែដំណើរនេះ ត្រូវបានបិទខ្ទប់។
ក្រុងអ៊ីស្លាម៉ាបាដ បានកាត់ពន្ធលក់លើផ្លែឈើនាំចូលដល់អត្រាសូន្យបំណងជំរុញកំណើនពាណិជ្ជកម្មពីប្រទេសជិតខាង តែក៏បានរឹតបន្ដឹងការគ្រប់គ្រងលើពលរដ្ឋអាហ្វហ្គានទូទៅដែលព្យាយាមឆ្លងព្រំដែនដោយបារម្ភពីចរាចរណ៍ខុសច្បាប់។
អាហ្គា បាននិយាយថា៖ «វាជាមហន្ដរាយសម្រាប់ពលរដ្ឋអាហ្វហ្គានីស្ថានទាំងអស់ ដោយសារជំនួញទាំងអស់ត្រូវតែឆ្លងកាត់ព្រំដែន»។
ផ្លែទទឹមចន្លោះពី ៤ ម៉ឺន ទៅ ៥ ម៉ឺនតោន ត្រូវបាននាំចេញតាមច្រកព្រំដែនប៉ាគីស្ថាន ក៏ដូចជាឥណ្ឌា និងរដ្ឋនៅតាមឈូងសមុទ្ររៀងរាល់ឆ្នាំ។
ប៉ុន្ដែបច្ចុប្បន្ន ផ្លែឈើតែ ៤ ៤៩០ តោន បានដឹកចេញពីប្រទេស។ នេះបើយោងតាមលោក អាប់ឌុល បាហ្គី-ប៊ីណា មកពីសភាពាណិជ្ជកម្ម នៅទីក្រុងភាគខាងត្បូង កាន់ដាហា។
លោកនិយាយថា៖ «ផលិតផលទាំងនេះកំពុងតែរង់ចាំលក់ចេញ។ បើត្រូវពន្យារពេលរឹតតែយូរ គុណភាពនិងតម្លៃក៏កាន់តែធ្លាក់ចុះផងដែរ»។
រដ្ឋាភិបាលមុនៗ ដែលគាំទ្រដោយលោកខាងលិច និងម្ចាស់ជំនួយអន្ដរជាតិ បានលើកទឹកចិត្ដកសិករបោះបង់ការដាំដុះអាភៀនខុសច្បាប់ និងងាកមកដាំផ្លែឈើជំនួសវិញ ដូចជា ទទឹមជាដើម៕ AFP/HR