ក្រុងកុលកាតា៖ រដូវបុណ្យសាសនាដ៏សំខាន់របស់ឥណ្ឌាបានវិលត្រឡប់មកវិញជាមួយនឹងវត្តមានមនុស្សដ៏អ៊ូអរ ណែនណាន់តាន់តាប់តាមផ្សារ និងការតាំងពិព័រណ៍លក់ដូរជាលើកដំបូងក្នុងរយៈពេល ២ ឆ្នាំ ពោល គឺក្រោយរយៈពេល ៦ ខែ នៃការផ្ទុះការរីករាលដាលខ្លាំងនៃជំងឺកូវីដ ១៩។
មេរោគកូរ៉ូណានៅតែបន្តឆក់យកជីវិតមនុស្សជាង ២០០ នាក់ ជារៀងរាល់ថ្ងៃនៅក្នុងប្រទេសដែលមានប្រជាជនចំនួន ១,៣ ពាន់លាននាក់ ប៉ុន្តែចំនួននេះបានធ្លាក់ចុះយ៉ាងខ្លាំងពីចំនួនអ្នកស្លាប់ចំនួន ៤ ០០០ នាក់ នៅក្នុងខែមេសា និងឧសភា។
សកម្មភាពភាគច្រើនបានវិលត្រឡប់មករកភាពប្រក្រតីវិញ ហើយប្រទេសឥណ្ឌា បានចាក់វ៉ាក់សាំងការពារជិត ១ ពាន់លានដូស ដោយមនុស្សប្រហែល ៧៥ ភាគរយទទួលបានវ៉ាក់សាំងយ៉ាងហោចណាស់ ១ ដង។
រដូវវិស្សមកាលកំពូលរបស់ឥណ្ឌារួមមានពិធីបុណ្យ ឌូរហ្គា ភូចា (Durga Puja) ឌុសសេរ៉ា (Dussehra) និង ឌីវ៉ាលី (Diwali) ដែលជាពិធីបុណ្យហិណ្ឌូធំៗ ប្រារព្ធដោយសម្លេងក្ដុងក្ដាំង ការតុបតែងចម្រុះពណ៌ឆើតៗ និងភាពរីករាយក្អាកក្អាយនៅទូទាំងប្រទេស។
រដូវកាលនេះក៏ជាពេលវេលាដែលមនុស្សម្នានាំគ្នាទិញស្លៀកពាក់ថ្មីៗ ចំណីអាហារល្អៗ រថយន្តនិងទំនិញប្រើប្រាស់ផ្សេងៗទៀត ដែលដើរតួនាទីសំខាន់សម្រាប់ការជំរុញសេដ្ឋកិច្ច ដែលរងផលប៉ះពាល់ដោយកូវីដ នៅប្រទេសសេដ្ឋកិច្ចធំជាងគេទី៦ របស់ពិភពលោក។
នៅទីក្រុងកុលកាតា សប្ដាហ៍មុនហ្វូងមនុស្សបានប្រមូលផ្តុំគ្នាធ្វើចម្លាក់ផ្គុំចម្រុះពណ៌ដែលជារចនាសម្ព័ន្ធបណ្តោះអាសន្ន ដែលមានរូបព្រះរបស់អាទិទេពហិណ្ឌូឌូហ្កា ត្រូវបានតំឡើងកំឡុងពេលពិធីបុណ្យ។
អ្នកទស្សនានាំគ្នាក្រឡេកសំណង់បណ្ដោះអាសន្នដែលមានកម្ពស់ ៤៤ ម៉ែត្រ បានរចនាឡើងជាអាគារចម្លងពីអាគារខ្ពស់ Burj Khalifa នៅទីក្រុងឌូបៃ ដោយមានការបង្ហាញឡាស៊ែរដ៏អស្ចារ្យ។
ប៉ូលីសចរាចរណ៍នៅរដ្ឋធានីបេងហ្គាល់ខាងលិចបានប្រើឧបករណ៍បំពងសំឡេង ដើម្បីក្រើនរំឭកប្រជាជនអំពីការរក្សាគម្លាត ប៉ុន្តែឥតប្រយោជន៍ ទោះបីមានមនុស្សជាច្រើនបានពាក់ម៉ាស់ក៏ដោយ។
លោក អារ៉ាដហាណា ហ្គូបតា បានប្រាប់ AFP ថា៖ «វាជាពេលវេលាពិធីបុណ្យ ដូច្នេះមនុស្សនឹងមក ហើយប្រជាជនគិតតែនាំគ្នាសប្បាយរីករាយ។ ឥឡូវនេះមិនមានការរឹតត្បិតទេ រដ្ឋាភិបាលបានអនុញ្ញាតឱ្យយើងប្រារព្ធពិធីដូច្នេះយើងកំពុងតែសប្បាយនៅទីនេះ»។
អ្នកនាង រីយ៉ា តៃ តែខំប្រឹងប្រជ្រៀតផ្លូវដើរក្នុងពិធីបុណ្យបានលើកឡើងថា នាងមិនអាចប្រារព្ធពិធីបុណ្យនេះកាលពីឆ្នាំមុន នៅពេលមានការរឹតត្បិតមេរោគតឹងរ៉ឹង។
នាងបាននិយាយថា៖ « ខ្ញុំកំពុងមានអារម្មណ៍រីករាយ (ពេលនេះ) ទោះបីហ្វូងមនុស្សច្រើនពេកក៏ដោយ»។
រដ្ឋប៊ីហារ និងអាសាមដែលនៅជិតខាងក៏មានចំនួនមនុស្សចូលរួមកកកុញក្នុងពិធីបុណ្យធំ ៗ ដូចជារដ្ឋម៉ាហារ៉ាសត្រា និងហ្គូចារ៉ាត់ភាគខាងលិចដែរ។
កាលពីដើមសប្ដាហ៍ រដ្ឋាភិបាលរបស់នាយករដ្ឋមន្ត្រី ណារ៉េនដ្រា ម៉ូឌី បានចាប់ផ្តើមយុទ្ធនាការមួយដែលមានឈ្មោះថា «បេសកកម្ម ១០០ ថ្ងៃ» ជាមួយក្ដីបារម្ភថា រដូវបុណ្យជាច្រើនថ្ងៃ អាចនាំឱ្យមានការផ្ទុះឡើងនៃជំងឺកូវីដ ១៩ ។
មន្ត្រីរដ្ឋាភិបាលម្នាក់ត្រូវបានដកស្រង់សម្តីដោយកាសែត Hindustan Times ថា៖ «យើងកំពុងស្នើសុំឱ្យរដ្ឋនានាមានការប្រុងប្រយ័ត្នបន្ថែមក្នុងរយៈពេល ១០០ ថ្ងៃខាងមុខ ហើយធានាថា អាកប្បកិរិយាប្រជាជនសមស្របនឹងវិធានការសុវត្ថិភាពការពារការឆ្លង»។
អ្នកជំនាញសុខភាពសហគមន៍លោក រ៉ាជីប ដាសហ្គូបតា បាននិយាយថា ការគ្របដណ្តប់ខ្ពស់ដោយការចាក់វ៉ាក់សាំងលើកដំបូងទំនងជាការពារប្រទេសពីការកើនឡើងថ្មី តែប្រសិនបើអត្រាចម្លងខ្ពស់ ចំនួនពលរដ្ឋនឹងប្រឈមគ្រោះថ្នាក់សុខភាពធ្ងន់ធ្ងរទៅតាមនោះដែរ។
លោកបានប្រាប់ AFP ថា៖ «ភាពងាយរងគ្រោះរបស់ឥណ្ឌាគឺអាស្រ័យលលើសមាមាត្រខ្ពស់នៃអ្នកដែលមានប្រព័ន្ធភាពស៊ាំខ្លះៗ និងអ្នកអត់មានសោះ»៕ AFP