.jpg)
ភ្ញៀវសារមន្ទីរ Madame Tussauds ក្រុងឌូបៃ ក្នុងបន្ទប់តាំងរូបតារាម៉ូដែល និងសេដ្ឋនីគ្រឿងសម្អាង ខាយលី ជេនើរ។ AFP
ក្រុងឌូបៃ៖ សារមន្ទីរមនុស្សក្រមួនដ៏ល្បីល្បាញនៅក្រុងឡុងដ៍ Madame Tussauds បានចាប់ផ្ដើមបើកទ្វារជាលើកដំបូងនៅដែនដីអារ៉ាប់ ក្នុងសប្ដាហ៍នេះ នៅទីក្រុងឌូបៃ ក្នុងក្ដីរំពឹងថា នឹងទាក់ទាញភ្ញៀវទេសចររាប់លាននាក់មកកាន់ពិព័រណ៍ពិភពលោក Expo 2020។
សារមន្ទីរដែលផ្ដើមចេញពីទីក្រុងឡុងដ៍នេះ មានដាក់តាំងនូវចម្លាក់ក្រមួនដូចមនុស្សពិតៗចំនួន ២៥០ នាក់ បានទាក់ទាញមនុស្សរាប់លានមកទស្សនា ដោយវាបានពង្រីកសាខាតូចៗនៅសហរដ្ឋអាមេរិក អឺរ៉ុប និងអាស៊ី។
អ្នកគ្រប់គ្រងទូទៅសារមន្ទីរ Madame Tussauds នៅក្រុងឌូបៃ លោក Sanaz Kollsrud បាននិយាយថា៖ «យើងបើកទ្វារកាលពីថ្ងៃទី ១៤ ខែ តុលា ឆ្នាំ ២០២១ នេះ ជាកាលបរិច្ឆេទកៀកៗនឹងពិព័រណ៍ Expo 2020»។
ចម្លាក់ក្រមួនម្ចាស់ក្សត្រិយ អេលីហ្សាប៊ែត នៅសារមន្ទីរ Madame Tussauds ក្រុងឌូបៃ។ AFP
លោកបន្តទៀតថា៖ «យើងរំពឹងថា នឹងមានភ្ញៀវក្នុងស្រុក និងអន្តរចាតិច្រើនមកទស្សនា ហើយយើងបានជ្រើសរើសបុគ្គលដែលមានប្រជាប្រិយភាពនៅពិភពអារ៉ាប់យើង»។
នៅសាខាសារមន្ទីរក្រុងឌូបៃ ចម្លាក់ក្រមួននៃបុគ្គលល្បីៗក្នុងសកលលោក ចំនួន ៦០ នាក់ ត្រូវបានដាក់តាំង រួមមានទាំងកំពូលតារាបាល់ទាត់ លីអូនែល មេស៊ី និងតារាចម្រៀង រីហាណា។
ក្នុងចំណោមនោះ មានចម្លាក់ក្រមួនតារាប្រចាំតំបន់ ដូចជាតារាប៉ុបលីបង់ ណានស៊ី អាយរ៉ាម និង ម៉ាយ៉ា ឌីអាប។
រូបក្រមួនដាក់តាំងរួមមាន ដេវីដ ប៊េកខេម កំពូលតារាបាល់ទាត់ លីអូនែល មេស៊ី និងតារាចម្រៀង រីហាណា។ AFP
ដោយធនធានប្រេងមានកំណត់ ដែនដីអារ៉ាប់រួមអេមីរ៉ាត បានផ្ដោតទៅលើការអភិវឌ្ឍវិស័យទេសចរណ៍ និងកម្សាន្ត ដើម្បីបង្កើនចំណូលសេដ្ឋកិច្ច។
ទីក្រុងឌូបៃ រំពឹងលើពិព័រណ៍រយៈពេល ៦ ខែ Expo 2020 Dubai ដែលបានចាប់ផ្ដើមពីថ្ងៃទី ១ ខែតុលា បន្ទាប់ពីពន្យារពេលអស់ ១ ឆ្នាំ ដើម្បីទាក់ទាញភ្ញៀវទេសចររាប់លាននាក់មកបំប៉នសេដ្ឋកិច្ចដែលធ្លាក់ចុះដោយសារវិបត្តិកូវីដ៕ AFP
រូបក្រមួនដាក់តាំងរួមមាន ដេវីដ ប៊េកខេម កំពូលតារាបាល់ទាត់ លីអូនែល មេស៊ី និងតារាចម្រៀង រីហាណា។ AFP
សារមន្ទីរមនុស្សក្រមួន Madame Tussauds ទើបសម្ពោធនៅក្រុងឌូបៃ។ AFP
