ភ្នំពេញៈ តារាសម្តែងស្រី អ្នកនាង ឌុច លីដា ហាក់កប់យោបល់នឹងថ្លែងវាចាចេញក្រោយពីដឹងថា ជុំវិញនឹងរឿងរ៉ាវតារាកំប្លែងស្រីអ្នកនាង ខ្ញុង Live យំយែកសុំអង្វរមហាជនឱ្យជួយបរិច្ចាគម្នាក់ ១ ដុល្លារ ដើម្បីដោះស្រាយបំណុលដែលមានទឹកប្រាក់ យ៉ាងច្រើន ៥៧ ម៉ឺនដុល្លារ ត្រឹមតែ ១ ថ្ងៃ រួចនោះបែរជាមានលក្ខណៈដូចជាឆាកល្ខោន បែបសម្តែងថ្ពឹនភ្នែកទៅវិញ។
ខណៈឃើញហេតុការណ៍តារាសម្តែង តារាកំប្លែង និងតារាចម្រៀងស្រីមានឈ្មោះពិត ស្រេង សុកាន់ដា ហៅអ្នកនាង ខ្ញុង Live ហ្វេសប៊ុកយំយែកអង្វរដល់មហាជនឱ្យជួយដោះស្រាយបំណុល ដែលអ្នកនាងរៀបរាប់ថា កំពុងតែវ័ណ្ឌក គ្មានវិធីដោះស្រាយ ទើបសុំការបរិច្ចាគម្នាក់ ១ ដុល្លារ រហូតផ្អើលទាំងអ្នកគាំទ្រ និងមិត្តអ្នកសិល្បៈ នាំគ្នាសម្រុកវេរលុយជួយតាមគណនីធនាគារ ABA ដោយមានវត្តមានតារាស្រី ឌុច លីដា ផងដែរ។
នាពេលនោះអ្នកនាង ឌុច លីដា បានបង្ហើរសារថា៖ «ជួយបានក៏ជួយ ជួយមិនបានសូមកុំបន្ទោស! ទោះមិនដឹងមូលហេតុច្បាស់ ការពិតយ៉ាងណាតែគាត់សុំឱ្យជួយយើងត្រូវយល់ពីទុក្ខលំបាកមនុស្សពេលនេះ សំខាន់កូនៗគាត់នៅតូច! ខ្ញុំយកចំណែកកូនរបស់ខ្ញុំ Ketyamnei Leng-កិត្យាមណី (London) ជួយគាត់បានតិចតួច! សូមបងស្រីឆាប់ឆ្លងផុតពីបញ្ហានេះ!» ក្រោយពីរូបខ្លួនក៏បានវេរលុយទៅជួយអ្នកនាង ខ្ញុង រួចមកដែរ។
តែអ្វីៗ ត្រូវបានផ្លាស់ប្តូរត្រឹមតែ ១ ថ្ងៃ ដោយមហាជន និងមិត្តអ្នកសិល្បៈគ្រប់ស្រទាប់ បានវេរលុយជួយដោះស្រាយបំណុលមានចំនួនទឹកប្រាក់ ៥៧ ម៉ឺនដុល្លារ រួចរាល់ ហើយក៏បែកធ្លាយដំណឹងថា ជាឆាកល្ខោនសម្តែង ដោយមានការជួយរៀបចំពីក្រុមអ្នកជំនាញបង្ហាត់បង្រៀនឱ្យជោគជ័យ។
តារាសម្តែងស្រី ឌុច លីដា ដែលកំពុងសស្រោកសស្រាំនឹងការឆ្លៀត Live ហ្វេសប៊ុកលក់ផលិតផលនានាតាមអនឡាញ ដើម្បីទ្រទ្រង់ជីវភាព នាគ្រាជួបវិបត្តិកូវីដ ១៩ ព្រោះការងារសិល្បៈមិនទាន់អំណោយផលល្អដូចដើមវិញនោះ បាន Share បន្តរូបភាពបង្ហាញពីការខាតបង់ប្រាក់ខុសគ្នាដាច់រវាងអ្នកនាង ខ្ញុង ($ ៥៧ ម៉ឺន) និងអ្នកនាង ខាត់ សុឃីម ($៧៥ ម៉ឺន)។
ឌុច លីដា បរិយាយថា៖ «បើសរសេរវាវែងពេក តែសុំកាត់ខ្លី។ 75 អ្នកខ្លាំងពូកែ មានភាពតស៊ូត និងឆ្លាតវៃ ទុកធ្វើជាមនុស្សគំរូល្អ។ 57 ជាអ្នកដែលទាល់ដោះស្រាយ មិនចេញ ទុកជាមេរៀនខ្លះទៅវាសនាមនុស្សមិនដូចគ្នា»៕