.jpg)
លោកយាយ ដួង តារា ជាអតីតតារាសម្តែង ៥ ជំនាន់ និងចៅស្រី កំពុងរស់នៅដោយគ្មានទីពឹងនៅឯខេត្តកំពង់ស្ពឺ។ ក្រុមព្រះសូរិយា
ភ្នំពេញៈ ខណៈរលកព័ត៌មានពីតារាកំប្លែងស្រីនាង ខ្ញុង កំពុងតែផ្ទុះពេញតាមបណ្តាញសង្គមជុំវិញរឿងមានបំណុលវ័ណ្ឌកប្រមាណ ៥៧ ម៉ឺនដុល្លារ ត្រូវមហាជនជួយសង្គ្រោះត្រឹមតែ ១ ថ្ងៃ ដោយការយំយែកសុំអង្វរឱ្យជួយបរិច្ចាគម្នាក់ ១ ដុល្លារនោះ ឯដំណឹងពីអតីតសិល្បការិនីភាពយន្ត ៥ ជំនាន់ លោកយាយ ដួង តារា វ័យ ៨២ ឆ្នាំ កំពុងរស់នៅក្នុងជីវភាពក្រីក្រ គ្មានទីពឹង សុំតែជម្រកតូចមួយសម្រាប់ជីវិតចុងក្រោយ បែរជាស្ងាត់ជ្រងំទៅវិញ។
បើតាមក្រុមអ្នកស្រាវជ្រាវ អភិវឌ្ឍ អភិរក្ស និងផ្សព្វផ្សាយភាពយន្តខ្មែរមុនរបបខ្មែរក្រហម ឈ្មោះថា «ក្រុមព្រះសូរិយា» ដែលនាំយកអំណោយសប្បុរសធម៌ពីក្រុមសប្បុរសជនទៅជូនអតីតតារាសម្តែង ៥ ជំនាន់ លោកយាយ ដួង តារា ណុបណែម ក្នុងគ្រាដែលលោកយាយ មានជីវភាពលំបាកខ្លាំងដោយខ្វះទីពឹង សព្វថ្ងៃកំពុងតែរស់នៅជាមួយចៅស្រីក្នុងបន្ទប់ផ្ទះជួល ស្ថិតនៅក្នុងតំបន់ក្រុង និងខេត្តកំពង់ស្ពឺ។
តាមគណនីហ្វេសប៊ុកនៃក្រុមព្រះសូរិយាបង្ហោះឱ្យដឹងថា៖ «កម្មវិធីសប្បុរសធម៌របស់ក្រុមហ៊ុនបុរីស៊ី-អេសវីឡា ដែលមានខ្ញុំបាទ ជាប្រធានទីផ្សារតំណាងឱ្យលោកអគ្គនាយក ចាវ សុជាតិ តាមរយៈ ក្រុមព្រះសូរិយា មានលោកជំទាវ សុខ ស៊ីថន ជាអនុប្រធានកិត្តិយស លោក យាង វណ្ឌី ជាប្រធាន និងលោក វិរៈ វ៉ារនី បានយកអំណោយ និងថវិកាមួយចំនួនជូនដល់ អតីតតារាសម្តែង ៥ ជំនាន់ លោកយាយ ដួង តារា ណុបណែម ក្នុងគ្រាដែលលោកយាយ មានជីវភាពលំបាកខ្លាំងដោយខ្វះទីពឹងនៅថ្ងៃទី ១៦ ខែ តុលា ឆ្នាំ ២០២១ កន្លងទៅ។
ក្រុមព្រះសូរិយា បាននាំអំណោយទៅជូនលោកយាយ ដួង តារា កាលពីថ្ងៃទី ១៦ ខែ តុលា ឆ្នាំ ២០២១។ រូបថត ក្រុមព្រះសូរិយា
ប្រភពក្រុមព្រះសូរិយាបានបន្តថា៖ «លោកយាយ ដួង តារា ឆ្នាំនេះមានអាយុ ៨២ ឆ្នាំ ហើយកំពុងរស់នៅ ក្នុងជីវភាពខ្វះខាត លំបាកជាខ្លាំង ខណៈដែលមិត្តសិល្បករដូចគ្នា និងមហាជនបាត់ដំណឹងឈឹង ក្រោយពេលដែលលោកយាយធ្លាក់ខ្លួនឈឺ មិនអាចបម្រើសិល្បៈបាន ហើយជីវិតលោកយាយកាន់តែដុនដាបទៅៗ ក្រោយពីកូនស្រីបង្កើតជាទីពឹងតែ ១ គត់ ក៏លាចាកលោកទៅដោយជំងឺមហារីក។ ជីវិតកាន់តែលំបាកទៅទៀត លោកយាយធ្លាក់ខ្លួនរស់នៅ ជាមួយអ្នកសប្បុរសម្នាក់ដែលរាប់អានគ្នាតាំងពីក្នុងរបបខ្មែរក្រហម ហើយបន្ទុកគ្រួសារធ្លាក់ទៅចៅស្រី តែ ១ គត់ដែលកំពុងជាប់សិក្សានៅឡើយ»។
គួររំឭកថា អតីតតារាសម្តែង ៥ ជំនាន់រូបនេះឈ្មោះពិត សម នួនចិន្តា ហៅ ដួង តារា និងជាភរិយាទី១ អតីតតារាសម្តែងប្រុសល្បី នាទសវត្សរ៍ទី៦០ គឺលោកតា ណុប ណែម។ ខ្សែភាពយន្តដែលលោកយាយ ដួង តារា ធ្លាប់សម្តែងនោះ រួមមានដូចជារឿង «សព្វសិទ្ធិ» រឿង «លោហិតវាសនា» រឿង «ប្រហារដួងចិត្ត» រឿង «តិកឆេង» រឿង «ស៊ីយិនគុយ» និងរឿង «កន្សែងស្លាដក់» ជាដើម។ ប្រសិនបើបងប្អូនចង់បរិច្ឆាគថវិកា ជួយលោកយាយ សូមទាក់ទងទៅចៅស្រីគាត់ឈ្មោះ យ៉ា រ៉េត តាមទូរស័ព្ទ 096 7111 406 ឬតាមគណនី ABA លេខ 000710-640 PICH MAKARED៕
វីដេអូ៖
