.jpg)
គំរូរូបភាពដែលភ្ញៀវអាចប្រើប្រាស់ជាគំនិតក្នុងការគូរលម្អលើសេរ៉ាមិក។ គំនូរចានរាងបេះដូង គូរដោយដៃ អមដោយសំណេរឈ្មោះជាភាសាខ្មែរ។ សហការី
ភ្នំពេញ: ដោយប្រើបេះដូងគូរលម្អចម្លាក់ស្មូន វត្ថុរចនាដោយដៃនេះរឹតតែមានអត្ថន័យមិនថា សម្រាប់រក្សាទុកជាអនុស្សាវរីយ៍ ឬក៏ជាអំណោយពិសេសដល់មនុស្សជាទីស្រឡាញ់។
នេះជាអ្វីដែល Ceramik Art Studio នៅជិតបង្កើយ ផ្ដល់ជូនដល់អ្នកនិយមវត្ថុសិល្បៈស្មូនគូរដោយដៃម្ចាស់ផ្ទាល់ ដោយប្រើការច្នៃប្រឌិតទៅតាមក្ដីស្រមៃរបស់មនុស្សគ្រប់វ័យ។
នៅស្ទូឌីយោដែលមានដាក់តាំងនូវស្នាដៃចម្លាក់ស្មូនចម្រុះពណ៌ ខឺសទី (Kirsty) អ្នកគ្រប់គ្រងនៅ Makerspace និងអ្នកសម្របសម្រួលនៅ Coconut Park ជាទី Ceramik Art Studio តាំងនៅនោះ បានប្រាប់ ភ្នំពេញ ប៉ុស្តិ៍ថា៖ «និយាយទៅពួកយើង គឺជាកន្លែងគូរ ឬលាបពណ៌ផលិតផលសេរ៉ាមិកនៅកោះពេជ្រ។ ពួកយើងមានសម្ភារជាច្រើនឱ្យជ្រើសរើសសម្រាប់អ្នកដែលចាប់អារម្មណ៍កម្មវិធីយើង»។
បើកដំណើរការកាលពីថ្ងៃទី ១៩ ខែកុម្ភៈ Ceramik Art Studio បានធ្វើពិធីសម្ពោធតាមអនឡាញ ទន្ទឹមនឹងព្រឹត្តិការណ៍កូវីដ ២០ កុម្ភៈ ផ្ទុះឡើង។
ស្ថាបនិករបស់ Ceramik Art Studio លីម លីនណា ដែលជាសហស្ថាបនិកសាលាអន្តរជាតិកាណាដាភ្នំពេញ នោះបានឱ្យដឹងថា គំនិតក្នុងការបង្កើតស្ទូឌីយោសិល្បៈកម្សាន្តនេះ កើតចេញពីបទពិសោធផ្ទាល់ខ្លួននៅទីក្រុងម៉ុងរេអាល់ កាណាដា។
ខឺសទី អ្នកគ្រប់គ្រងនៅកម្ពុជាជាង ៦ ឆ្នាំបានប្រាប់ថា៖ «បើតាមខ្ញុំដឹង ហាងសិល្បៈសេរ៉ាមិកនេះច្រើនមាននៅកាណាដា អាមេរិក អង់គ្លេស និងលោកខាងលិច ដូច្នេះប្រហែលជាគាត់បានគំនិតនៅពេលគាត់ធ្វើដំណើរកម្សាន្ត ហើយឃើញថា រីករាយប្លែកថ្មីទើបគាត់ចង់នាំមកឱ្យប្រជាជនកម្ពុជាស្គាល់ផងដែរ»។
នៅពេលមានឡ ខឺសទី បានចាត់ទុកថា ជាសំណាងណាស់ដែលមានអ្នកហាត់ការពីអូស្ត្រាលីមកបង្រៀន។ អ្នកហាត់ការបានបង្វឹក សូរ៉ា ជាអ្នកត្រួតពិនិត្យនៅស្ទូឌីយោក្នុងការប្រើថ្នាំលាបសេរ៉ាមិក ការលាបពណ៌ឱ្យរលោង និងរបៀបដំណើរការឡ។
វត្ថុស្មូនក្រោយគូររួច មានភាពប្លែកៗគ្នាទៅតាមចំណូលចិត្ត។ រូបថត សហការី
នៅស្ទូឌីយោក៏មានសិល្បករ ជេស៊ី ជាអ្នកប្រចាំការ មានបទពិសោធបានគូរលើវត្ថុផ្សេងៗអស់ជាច្រើនឆ្នាំ ជាមួយការរចនា និងពណ៌អរូបី និងតែងតែរីករាយចែករំលែកជំនាញរបស់នាងជាមួយអ្នកដទៃ។
ស្ទូឌីយោមានការផ្តល់ជូននូវការគូរ លាបពណ៌ឱ្យរលោង និងវគ្គសិក្សាសេរ៉ាមិកបន្ថែមសម្រាប់អ្នកមានបំណងចង់បង្កើនជំនាញរបស់ពួកគេ ដើម្បីឈានដល់កម្រិតអាជីព។ ទីនោះក៏មានរៀបចំសិក្ខាសាលាបែបកម្សាន្តសប្បាយសម្រាប់ថ្ងៃកំណើត និងការពង្រឹងក្រុមការងារផងដែរ។
ភាពពិសេសរបស់ស្ទូឌីយោនេះត្រូវបាន ខឺសទី លើកឡើងថា៖ «ឧបករណ៍ និងថ្នាំលាបរបស់យើងអតិថិជនអាចប្រើបានទាំងអស់ និងមានសុវត្ថិភាពសម្រាប់មនុស្សគ្រប់វ័យ ហើយបរិយាកាសជុំវិញពោរពេញដោយការបំផុសគំនិត។ អតិជនអាចមកបានទាំងមិនចាំបាច់កក់ទុកមុន និងអាចឌីហ្សាញតាមអ្វីដែលពួកគេចូលចិត្ត។ មួយទៀតគឺអាចចូលរួមសិក្ខាសាលារៀងរាល់ថ្ងៃអាទិត្យក្រោមទស្សនៈច្បាស់លាស់ពីវិចិត្រករ»។
បច្ចុប្បន្នសិក្ខាសាលាតាមការណែនាំនេះ ធ្វើឡើងតែម្ដងជារៀងរាល់ថ្ងៃអាទិត្យ។ ប៉ុន្តែ ខឺសទី និយាយថា នឹងព្យាយាមធ្វើឱ្យបានញឹកញាប់នៅពេលដែលស្ថានភាពកូវីដប្រសើរឡើង។ សម្រាប់ពេលនេះពួកគេក៏ផ្តល់ជូននូវសិក្ខាសាលាលក្ខណៈឯកជនផងដែរ។
ក្នុងចំណោមគំនូរលើចម្លាក់ស្មូនដ៏ពេញនិយមមួយ ជេស៊ី បានរចនាដោយប្រើល្បាយពណ៌សហសម័យសម្រាប់អតិថិជន ហើយនាងក៏បានយកសិល្បៈនេះមក ចែករំលែកដល់នៅសិក្ខាសាលាគូរចម្លាក់ស្មូន។
អ្នកគ្រប់គ្រងជនជាតិអង់គ្លេសបានពិពណ៌នាទៀតថា៖ «នាង [ជេស៊ី] បានប្រើពណ៌រស់រវើកដើម្បីបង្កើតចេញ ជាពណ៌ចម្រុះរបស់ឥន្ទធនូ និងបញ្ចប់ដោយឆ្នូតពណ៌ខ្មៅលើកែវទឹកយ៉ាងប្លែកភ្នែក»។
ស្ទូឌីយោមានជម្រើសផលិតផល សេរ៉ាមិកជាច្រើនមកលាបពណ៌ និងដុត រួមមានជា កែវទឹក ចានគោម ចានបាយ រូបចម្លាក់ ថូ រូបតាំង រូបមនុស្សតឿ សត្វផេនឃ្វីន មនុស្សយន្ត រថភ្លើង និងនៅមានច្រើនទៀត។
ឧបករណ៍ និងទឹកថ្នាំប្រើប្រាស់សម្រាប់គូរលើចម្លាក់ស្មូន និងប្រអប់។ សហការី
សម្ភារសេរ៉ាមិកមានតម្លៃចន្លោះពី ៣-៣៣ ដុល្លារ ទៅតាមទំហំ និងភាពស្មុគស្មាញរបស់ម៉ូដមួយៗ។ សម្រាប់តម្លៃម៉ោងក្នុងស្ទូឌីយោគឺ ១ ម៉ោង ៤ ដុល្លារ សរុបទាំងការប្រើប្រាស់សម្ភារក្នុងហាងទាំងអស់ និងការណែនាំពីវិចិត្រករការលាបពណ៌ និងដុតដោយភ្ញៀវ ដែលអាចមកយកផលិតផលសម្រេចនៅ ២ សប្ដាហ៍បន្ទាប់។
កន្លងមក ខឺសទី បានឱ្យដឹងថា ស្ទូឌីយោទទួលបានការគាំទ្រច្រើន ដោយមានភ្ញៀវប្រចាំហាងមកម្ដងហើយម្ដងទៀត។ នេះជាសញ្ញាល្អ ដែលជំរុញឱ្យស្ទូឌីយោព្យាយាមបង្កើតកម្មវិធីថែមទៀតសម្រាប់យុវជន និងអ្នកមានវ័យជ្រេជាងនេះ។
គម្រោងបន្ថែមនោះគឺ ខឺសទី ចង់ផ្តល់ជូនជម្រើសថ្នាំលាបលោហធាតុបន្ថែម ដែលអាចប្រើជាមួយពណ៌បច្ចុប្បន្ន ហើយក៏ធានានូវសុវត្ថិភាពសម្រាប់កុមារផង។
អ្នកគ្រប់គ្រងរូបនេះបានបន្លឺឡើងថា៖ «តោះមកលាបពណ៌ជាមួយយើង។ អ្នកអាចកុម្ម៉ង់អាហារសម្រន់ដ៏ឈ្ងុយឆ្ងាញ់ពី ពេញនៅ Coconut Park ពេលដែលអ្នកគូរនៅក្នុងបរិយាកាសលម្ហែកាយរបស់យើង»។
Ceramik Art Studio ចាប់បើកពីថ្ងៃពុធ-អាទិត្យ ពីម៉ោង ១០ ព្រឹក ទៅ ៦ ល្ងាច និងមានទីតាំងនៅជាន់ទី១ នៃ Coconut Club កោះពេជ្រ។
ព័ត៌មានបន្ថែមពី Ceramik Art Studio មាននៅគេហទំព័រហ្វេសប៊ុក @CeramikArtStudio៕
