ក្រុងតូក្យូ៖ សូហ្គិ (Shogi) ជាប្រភេទអុកជប៉ុនដែលស្គាល់ជា «ល្បែងមេទ័ព» កំពុងតែទទួលបានប្រជាប្រិយភាពខ្លាំងនៅមាតុភូមិកំណើត ដោយសារយុវជនឡេះឡោះដ៏ឆ្លាតវៃម្នាក់ ដែលល្បីមិនចាញ់តារារ៉ុក។
ភាពជោគជ័យដ៏មិនគួរឱ្យជឿរបស់យុវជន សូតា ហ្វូជី អមដោយរូបរាងស្រស់សង្ហា បានធ្វើឱ្យលោកមានឈ្មោះបោះសំឡេងក្នុងប្រទេសជប៉ុន ដោយល្បីលើសលប់លើប្រជាប្រិយភាពហ្គេមអុកប្រពៃណី និងទទួលបានការគាំទ្រពីសំណាក់មហាជនថ្មីៗ រួមទាំងយុវតីថែមទៀត។
យុវជន័យ ១៩ ឆ្នាំរូបនេះ បានក្លាយជាអ្នកលេងអុកក្មេងបំផុតដែលឈានដល់កម្រិតខ្ពស់បំផុត ៩ ជាន់ នៃ សូហ្គិ នៅពីការប្រកួតរដូវក្ដៅនេះ ហើយកាលពីខែមុន បានក្លាយជាអ្នកលេងវ័យក្មេងបំផុតដែលគ្រងតំណែងធំៗចំនួន ៣ ក្នុងចំណោម ៨។
អ្នកជំនាញកីឡាអុក សូហ្គិ លោក តៃឈិ ណាកាមូរ៉ា បានប្រាប់ AFP ថា៖ «ធ្លាប់មានតែអ្នកនិយមគាំទ្រសូហ្គិប៉ុណ្ណោះ ដែលតាមដានពីវា តែពេលនេះ កម្មវិធីព័ត៌មានទូទៅក៏បានលើកឡើងពី សូហ្គិ និងបានទាក់ទាញអ្នកគាំទ្រថ្មីៗជាច្រើនទៀត»។
អ្នកជំនាញរូបនេះកត់សម្គាល់ថា៖ «ល្បែងនេះក៏មិនធ្លាប់មានអ្នកគាំទ្រជាស្ដ្រីផងដែរ។ តែតាំងពីលោក សូតា ហ្វូជី មានឈ្មោះបោះសំឡេមក នារីជាច្រើនក៏ចាប់អារម្មណ៍នឹងល្បែងអុកនេះផងដែរ»។
មុខរបស់ជើងឯកអុកវ័យក្មេងរូបនេះ បានផុសឡើងលើទស្សនាវដ្ដី ផ្ទាំងផ្សាយពាណិជ្ជកម្ម និងកញ្ចក់ទូរទស្សន៍ទូទាំងប្រទេសជប៉ុន ហើយនំខេកចំណព្វចិត្ដរបស់លោកក៏លក់ដាច់នៅតាមហាងផ្សារទំនើបតែប៉ុន្មានម៉ោងក្រោយលោកទទួលទានអំឡុងពេលលេងហ្គេម។
លោក ហ្វូជី បាននិយាយក្រោយពីឈ្នះការប្រកួតថ្មីៗថា៖ «ខ្ញុំមិនបានយកចិត្ដទុកដាក់ខ្លាំងលើការគ្រងតំណែងអ្វីនោះទេ។ សំខាន់បំផុតសម្រាប់រូបខ្ញុំថា តើខ្ញុំខ្លាំងដល់កម្រិតណា»។
ល្បែកអុក សូហ្គិ ត្រូវបានលេងនៅលើក្ដាបន្ទះរាបស្មើដោយកូនអុកមានតួអក្សរកាន់ជិ។ ច្បាប់នៃការលេងមានលក្ខណៈស្រដៀងនឹងការលេងអុកទូទៅ ដោយខុសត្រង់ថា កូនអុកដែលត្រូវបានស៊ីរួច អាចផ្កាប់មកម្ខាងទៀត និងដាក់លើក្ដារលេងវិញ។ នេះជាល្បែង ដែលគេជឿថា មានកំណើតពីនាយទាហានជប៉ុនក្នុងសតវត្សរ៍ទី ១៥។
ឥទ្ធិពលរបស់លោក ហ្វូជី អាចត្រូវបានមើលឃើញនៅថ្នាក់រៀនកុមារពេលព្រឹកថ្ងៃអាទិត្យ ដែលលោកគ្រូ អ៊ីស៊ីដា បង្រៀននៅកាស៊ីវ៉ា ក្បែរទីក្រុងហុងកុង។ លោកបាននិយាយថា កុមារជាច្រើនចាប់ផ្ដើមលេងអុកសូហ្គិ តាំងពីពេលយុវជន ហ្វូជី មានមុខមានមាត់មក។
កុមារវ័យ ៧ ឆ្នាំ សូអ៊ីឈិ អ៊ីស៊ីកាវ៉ា បាននិយាយថា៖ «សូតា ហ្វូជី ពិតជាឡូយណាស់។ ខ្ញុំចង់ក្លាយជាអ្នកលេងសូហ្គិអាជីពម្នាក់ ពេលធំឡើង»៕ AFP/HR