.jpg)
ការទៅឆ្នេរសមុទ្រជាមួយសង្សា ធ្លាប់តែជារឿងដែលមិនអាចទៅរួច នៅប្រទេសដ៏អភិរក្សមួយនេះ។ AFP
ក្រុងឌូបៃ៖ សម្រាប់ អាស្មា ការចំណាយពេលមួយថ្ងៃនៅលើឆ្នេរសមុទ្រជាមួយសង្សាគឺមិនអាចទៅរួចសូម្បីតែគិត នៅក្នុងប្រទេសអារ៉ាប៊ីសាអូឌីតដ៏អភិរក្ស រហូតដល់វេលានេះទើបវាក្លាយជាការពិត។
បច្ចុប្បន្ន ស្ដ្រីវ័យ ៣២ ឆ្នាំរូបនេះ កំពុងរាំរែកជាមួយដៃគូនៅលើឆ្នេរខ្សាច់សក្បុសនៃសមុទ្រក្រហម ទៅតាមចង្វាក់តន្ដ្រីបំពងលាន់ទ្រហឹងពីធុងប៉ាស។ វាជាការចងចាំចំពោះការផ្លាស់ប្ដូរតិចតួច ក្នុងរាជាណាចក្រអ៊ិស្លាម ដែលកំពុងព្យាយាមបន្ធូរបន្ថយការរឹតត្បឹតខ្លះៗបំណងជំរុញទំនើបកម្ម ស្របពេលដែលមានការបង្ក្រាបលើការប្រឆាំងជំទាស់ផងដែរ។
តន្ដ្រីត្រូវបានហាមឃាត់នៅតាមទីសាធារណៈរហូតដល់ឆ្នាំ ២០១៧ ជាវិធានការអនុវត្ដដោយប៉ូលិសសាសនា ហើយស្ដ្រីអាចត្រូវបានអនុញ្ញាតឱ្យបញ្ជាដៃចង្កូតរថយន្ដមួយឆ្នាំក្រោយមក។ ឆ្នេរនៅតែបន្ដបែងចែករវាងបុរស និងស្ដ្រី។
ប៉ុន្ដែក្នុងទឹកប្រាក់ ៣០០ រីយ៉ាល់អារ៉ាប៊ី សាអូឌីត (៣២ ម៉ឺនរៀល) កញ្ញា អាស្មា និងមិត្ដប្រុស អាចចូលលេងឆ្នេរ Pure Beach ក្បែរក្រុង ជេដដា ស្ដាប់តន្ដ្រី រាំរែក និងលេងពោងខ្យល់លើទឹកងផដែរ។
ពេលថ្ងៃអស្ដង្គតក្រុមសម្ដែងចេញរាំតាមចង្វាក់តន្ដ្រីបស្ចិមប្រទេសនៅលើឆាកភ្លើងពណ៌។ AFP
កញ្ញាបានប្រាប់ AFP ដោយគ្រងឈុតពណ៌ខៀវពីលើឈុតហែលទឹកថា៖ «ខ្ញុំពិតជារីករាយដែលពេលនេះខ្ញុំអាចមកក្បែរឆ្នេរក្នុងការកម្សាន្ដដោយសេរី។ ជីវិតគឺប្រក្រតីនៅអារ៉ាប៊ីសាអូឌីត។ តែកាលមុន វាមិនធម្មតាឡើយ»។
អ្នកនិយមឆ្នេរសមុទ្រនាំគ្នាហែលទឹកក្នុងផ្ទៃទឹកថ្លាឈ្វេង ហើយស្ដ្រីគ្រងឈុតប៊ីគីនី ដោយខ្លះជក់សាស៊ីថែមទៀត។ ពេលថ្ងៃអស្ដង្គតក្រុមសម្ដែងចេញរាំតាមចង្វាក់តន្ដ្រីបស្ចិមប្រទេសនៅលើឆាកភ្លើងពណ៌ ខណៈគូស្នេហ៍នេះ រាំរំពើនក្បែរឆាក។
នៅតាមបណ្ដាប្រទេសនានា វាមិនមែនជាទិដ្ឋភាពកម្រអ្វីនោះទេ តែពួកគេខុសប្លែកពីអារ៉ាប៊ីសាអូឌីត ដែលជាទីឋានដ៏ពិសិដ្ឋបំផុតរបស់អ៊ិស្លាម និងបានគាំទ្រដល់ចលនាសាសនា Wahhabism។
សកម្មភាពបែបនេះ ក៏មិនត្រូវបានមើលឃើញនៅក្រៅក្រុងជេដដា ដែរ ដែលស្គាល់ជាតំបន់លម្ហែដ៏ល្អបំផុតប្រចាំប្រទេស។ ឆ្នេរ Pure Beach ស្ថិតនៅទីក្រុងសេដ្ឋកិច្ចស្ដេចអាប់ឌុលឡា ចម្ងាយប្រមាណ ១២៥ គីឡូម៉ែត្រភាគខាងជើងមជ្ឈមណ្ឌលក្រុងជេដដា។
ជនជាតិអេហ្ស៊ីប ហាឌីល អូម៉ា បាននិយាយថា៖ «ខ្ញុំដឹងក្ដីឡើងនៅទីនេះ ហើយកាលពីប៉ុន្មានឆ្នាំមុន យើងមិនត្រូវបានអនុញ្ញាតឱ្យស្ដាប់តន្ដ្រីនោះទេ។ ដូច្នេះ ពេលនេះ វាជាឋានសួគ៌របស់យើងហើយ»៕ AFP/HR
