.jpg)
កូនកំលោះក្រមុំឥណ្ឌាជិះខ្ទះ ឆ្ពោះទៅកាន់ទីតាំងរៀបមង្គលការ។ រូបថត AFP
ក្រុងញូវដែលី: គ្មាននរណាម្នាក់សុខចិត្តលប់ចោលពិធីមង្គលការងាយៗនោះទេ ដរាបណាអជ្ញាធរមិនចេញបម្រាម។ បុ៉ន្តែនៅពេលដែលគ្រោះធម្មជាតិបង្អាក់ពិធីជ័យគូស្វាមីភរិយាជាច្រើននាក់ កូនកំលោះក្រមុំ ១ គូនេះ បានខ្ចីខ្ទះពីវិហារនៅមូលដ្ឋានភូមិរបស់ខ្លួន ហើយសុំឱ្យបុរស ២ នាក់ ជួយរុញខ្ទះដែលដើរតួជាយានជំនិះបណ្ដោះអាសន្នលើទឹក។
ទិដ្ឋភាពនេះត្រូវបានគេផ្ដិតយករូបភាព វីដេអូ និងចែកចាយយ៉ាងច្រើនតាមបណ្ដាញសង្គម។
កូនក្រមុំសុំមិនបញ្ចេញឈ្មោះបានប្រាប់បណ្ដាញព័ត៌មានក្នុងស្រុក Asianet ក្រោយបញ្ចប់ពិធីមង្គលការថា៖ «ថ្ងៃជ័យរបស់យើងប្រែជាពិធីអាពាហ៍ពិពាហ៍មួយដែលយើងពុំធ្លាប់ស្រមៃបែបនេះទាល់តែសោះ»។
ទឹកជំនន់ និងការរអិលបាក់ដី ដោយសារតែភ្លៀងបង្អុរខ្លាំង បានសម្លាប់មនុស្សយ៉ាងហោច ២៧ នាក់នៅរដ្ឋខេរ៉ាឡា របស់ឥណ្ឌា។
ទោះបីជាទីតាំងរៀបមង្គលការរបស់អ្នកទាំង ២ មានសភាពលិចទឹកផ្នែកខ្លះក្ដី ក៏គូស្វាមីភរិយានេះនៅតែបន្តពិធីទ្រង់ទ្រាយតូចដ៏មានអត្ថន័យសម្រាប់ជីវិតគូរបស់ពួកគេ។
យោងតាមរបាយការណ៍ព័ត៌មានក្នុងស្រុក គូស្វាមីភរិយាទាំង ២ គឺជាបុគ្គលិកសុខាភិបាល។
ប៉ុន្មានថ្ងៃចុងក្រោយនេះមានរូបភាពជាច្រើនបង្ហាញទិដ្ឋភាពរថយន្ត និងឡានក្រុងលិចក្នុងជំនន់ទឹកភ្លៀង នៅរដ្ឋខេរ៉ាឡា គួរឱ្យបារម្ភ។
ក្រុមសង្គ្រោះ ក្រោមជំនួយបន្ថែមពីកងកម្លាំងជើងគោក ជើងទឹក និងអាកាស បានស្វែងរកជនរងគ្រោះនៅរស់រានមានជីវិត ខណៈរដ្ឋាភិបាលបានជម្លៀសមនុស្សរាប់ពាន់នាក់ និងបង្កើតជំរំសុវត្ថិភាពបណ្ដោះអាសន្នប្រមាណជាង ១០០ កន្លែង។
កាលពីឆ្នាំ ២០១៨ គ្រោះទឹកជំនន់បានឆក់យកជីវិតមនុស្ស ៥០០ នាក់ ទូទាំងរដ្ឋខេរ៉ាឡា៕ AFP
