ភ្នំពេញៈ កម្មវិធី «បុគ្គលល្អឯក» ដែលបង្ហាញអំពីរឿងរ៉ាវរបស់បុគ្គលល្អឯកកម្ពុជាទាំង ១០ រូប នារៀងរាល់ថ្ងៃសៅរ៍ វេលាម៉ោង ៨ យប់ ចាប់តាំងពីថ្ងៃទី ៤ ខែ កញ្ញា ឆ្នាំ២០២១ មក នឹងបញ្ចប់នៅត្រឹមថ្ងៃទី ២៣ ខែ តុលា ឆ្នាំ ២០២១ នេះ។ កម្មវិធីនឹងជ្រើសរើសយកម្នាក់ក្នុងចំណោម ១០ រូបនោះ ជាជយលាភីចុងក្រោយ ដែលមានការសម្របសម្រួលកម្មវិធីដោយបវរកញ្ញាចក្កវាឡកម្ពុជា ឆ្នាំ ២០២០ កញ្ញា រ៉េត សារីតា និងលោក តារា ឧសភា ហៅ Summer។
សម្រាប់វគ្គចុងក្រោយនៃកម្មវិធីគណៈមេប្រយោគ ដែលមានកេរ្ដិ៍ឈ្មោះល្បីៗ រួមមានព្រះអង្គម្ចាស់ ស៊ីសុវត្ថិ តេសូ លោក ហ៊ុន ចាន់សាន ស្ថាបនិក និងជានាយកស្ថាបត្យករក្រុមហ៊ុន Re-Edge Architecture+Design និងលោក ជី សិលា ជានាយកប្រតិបត្តិក្រុមហ៊ុន Sabay Digital Media រួមទាំងតំណាងពីប៉ុស្ដិ៍ទូរទស្សន៍ភីអិនអិន និងកាសែត Globe Media នឹងរួមគ្នាជ្រើសរើសយកបុគ្គលល្អឯក ១ រូប ក្នុងចំណោមបុគ្គលល្អឯកទាំង ១០ រូប ដើម្បីទទួលប្រាក់រង្វាន់ចំនួន ២ ម៉ឺនដុល្លារ ដោយចំនួនពាក់កណ្តាល គឺពួកគេអាចបរិច្ចាគមូលនិធិសប្បុរសធម៌ ឬបុព្វហេតុនៃជម្រើសពួកគេ។
បុគ្គលល្អឯកទាំង ១០ រូបនោះ រួមមានអ្នកនាង ឆន ឌីណា ជាវិចិត្រករស្រីឆ្នើម នៅកម្ពុជា ខណៈលោក Peap Tarr ជាវិចិត្រករគំនូរតាមផ្លូវ ជាកូនកាត់ខ្មែរ-នូវែលសេឡង់។ កញ្ញា ថូង ធីតា ជាសហគ្រិនស្រែអំបិលវ័យក្មេង ១ រូប និងលោក សុខ សុភមង្គល ជាបុគ្គលឆ្នើមជាប់ក្នុងតារាងបុគ្គលកំពូលអាយុក្រោម ៣០ ឆ្នាំ ទាំង ៣០ រូប លើគេហទំព័រ Forbes។
ចុងភៅ Chef Nak ជាមេចុងភៅស្ដ្រីកម្ពុជាដំបូងគេ ដែលអភិរក្សម្ហូបខ្មែរ និងនាំយករសជាតិម្ហូបខ្មែរ ទៅកាន់ឆាកអន្ដរជាតិ និងចុងភៅ Chef Nara ជាមេចុងភៅ ១ រូប និងជាចៅក្រមទទួលបានការគាំទ្រខ្លាំង ក្នុងកម្មវិធីប្រកួតធ្វើម្ហូបនៅប្រទេសកម្ពុជា។
លោក ឌីណា សីហ៍រាម ជាបេក្ខជនកម្ពុជាដំបូងគេ ក្លាយជាដៃគូគេហទំព័រ Streaming ផ្លូវការ។ លោក RavenBlaze ជាអ្នកត្រួសត្រាយផ្លូវអ្នក Vlogger ក្នុងប្រទេសកម្ពុជា ជាមួយបណ្ដាញយូធូបឈ្មោះ RavenBlaze99 មានអ្នក subscribers ២៧៥ ០០០ នាក់។
លោក អ៊ូន បថម ហៅសាយ ( Sai) ជាតារាចម្រៀង ដែលផ្ដួចផ្ដើមយុទ្ធនាការ «Run with Sai» ដើម្បីរៃអង្គាសប្រាក់សប្បុរសធម៌ផ្សេងៗ និងបំផុសគំនិតយុវជនកម្ពុជា ជាច្រើនរូបឱ្យធ្វើការងារសប្បុរស ដូចជារូបលោក និងលោក P-Sand ជាអ្នកនិពន្ធទំនុកចម្រៀង និងភ្លេងនៃក្រុមតន្ដ្រីរ៉ុកកម្ពុជា ដែលល្បីជាមួយស្នាដៃដូចជាបទ «ទេវតា» និងបទ «Khmer Loy9» ជាដើម។
លោក សារិន រតនៈ តែភាគច្រើនគេស្គាល់ថា លោក RavenBlaze ដែលជា Content Creator ក៏ដូចជា Streamer ម្នាក់ បានធ្វើមាតិកា (វីដេអូ) ផុសទៅតាមបណ្ដាញសង្គមដូចជា Facebook, Youtube, Instagram និងបណ្ដាញសង្គមផ្សេងៗ ជាច្រើនទៀត។
ប្រសិនបើឈ្នះកម្មវិធី «បុគ្គលល្អឯក» នេះ លោក RavenBlaze បានបង្ហើបឱ្យដឹងដូច្នេះថា៖ «ប្រសិនបើជារូបខ្ញុំ ទទួលបានជោគជ័យ ក្លាយជាជយលាភីចុងក្រោយ ខ្ញុំនឹងប្រើប្រាស់ថវិកា ដែលខ្ញុំឈ្នះ ដើម្បីទៅជួយសង្គមខ្លះ និងពង្រីកនូវអាជីព ដែលខ្ញុំធ្វើរាល់ថ្ងៃ នឹងព្យាយាមបើកឱកាសឱ្យក្មេងៗជំនាន់ថ្មី ដែលស្រឡាញ់ និងចូលចិត្តទៅលើអាជីពជា Gamer, Livestreamer, Content Creator នេះ ដោយសង្ឃឹមថា នឹងអាចជួយដល់ពួកគាត់ ចាប់ផ្ដើមដោយមិនមានឧបសគ្គច្រើនដូចកាលពួកខ្ញុំ»៕