.jpg)
តារាចម្រៀង និងអ្នកនិពន្ធ កញ្ញា ស៊ីន សេដ្ឋសុជ្ឈតា សិល្បការិនីចង្វាក់ R&B, Blues, or Soul។ សហការី
ភ្នំពេញ: ខណៈតន្ត្រីប៉ុប រ៉េប និងហ៊ីបហប់ ស្ទើរតែគ្របដណ្ដប់ប្រជាប្រិយភាពក្នុងស្រទាប់យុវវ័យកម្ពុជា ការរក្សាចំណូលចិត្ត និងអត្តសញ្ញាណរបស់អ្នកសិល្បៈគឺជារឿងដ៏ពិបាកបំផុតក្នុងវិស័យសិល្បៈ។
ការពេញនិយមរបស់មហាជនដែលបីដូចរលកធំបោកបក់អង្រួនក្ដីសុបិន គឺជាមូលហេតុដែលកញ្ញា ស៊ីន សេដ្ឋសុជ្ឈតា សិល្បករថ្មីនៅផលិតកម្ម ក្លាបយ៉ាហ៊ែន មានការស្ទាក់ស្ទើរនឹងបោះជំហានចូលវិស័យតន្ត្រី។
មុនពេលក្លាយខ្លួនជាសិល្បករ កញ្ញាធ្លាប់វិលវល់នឹងក្ដីសុបិនពិតប្រាកដរបស់នាង។ ប៉ុន្តែដោយមានឈាមជ័រជាសិល្បករតាំងពីជំនាន់លោកតា ស៊ីន ស៊ីសាមុត តរហូតដល់ឪពុកម្ដាយ និងបងប្រុស សុជ្ឈតា ទទួលបានថាមពលកម្លាំងចិត្តខ្លាំងក្លាពីសមាជិកគ្រួសារនាង។
បន្ទាប់ពីបន្លាយពេលអស់ជាច្រើនឆ្នាំ សំឡេងបេះដូងអ្នកសិល្បៈបានជំរុញឱ្យ សុជ្ឈតា បានបើកឱកាសឱ្យខ្លួនឯង ដើម្បីបន្តមរតកសំនៀងគ្រួសារជាអ្នកសិល្បៈផងដែរ។
ដោយជ្រើសរើសផលិតកម្ម ក្លាបយ៉ាហ៊ែន ព្រោះតែគាំទ្រភាពច្នៃប្រឌិត ការផ្ដល់សេរីភាព និងអារម្មណ៍កក់ក្ដៅដូចនៅផ្ទះ សិល្បការិនីរូបនេះបានរំឭកប្រាប់ថា៖ «ឪពុកខ្ញុំតែងតែប្រាប់ថាខ្ញុំមានសមត្ថភាពច្រៀង ហើយខ្ញុំផ្ទាល់ក៏ស្រឡាញ់តាំងពីក្មេង តែមិនធ្លាប់គិតយកជាអាជីព។ រហូតដល់ការស្លាប់របស់បងប្រុសខ្ញុំ ស៊ីន សេដ្ឋកុល បានធ្វើឱ្យខ្ញុំគិតឡើងវិញ និងសម្រេចចិត្តផ្ដល់ឱកាសឱ្យការច្រៀង»។
ដំណើរក្នុងការស្វែងរកភាពជាខ្លួនឯង មិនមែនជារឿងងាយស្រួលឡើយ។ កញ្ញាត្រូវបានគេស្គាល់តាមរយៈការណែនាំថាជា «ចៅស្រី ស៊ីន ស៊ីសាមុត»។ អ្នកចម្រៀង និងអ្នកនិពន្ធ រូបនេះលើកឡើងថា ការភ្ជាប់សាវតារជីតាដ៏មានឈ្មោះបោះសំឡេងមិនមែនជារឿងអាក្រក់ទេ តែកញ្ញាចង់កសាងអ្វីដែលជារបស់ខ្លួនឯង។
កញ្ញាអាចសម្របនឹងការនិយមតន្ត្រី តែមិនបោះបង់ស្ទីលផ្ទាល់ខ្លួនឡើយ។ សហការី
សុជ្ឈតា ដែលទើបប្រកាសខ្លួនជាសិល្បការិនីពេញលេញ បាននិយាយថា៖ «តែមិនថ្វីទេ ខ្ញុំស្គាល់ច្បាស់ពីអ្វីដែលខ្ញុំប្រឡូក ហើយដរាបណាខ្ញុំស្មោះត្រង់ចំពោះខ្លួនឯង ជឿជាក់លើខ្លួនឯង ហើយមិនសោកស្តាយចំពោះជម្រើសរបស់ខ្ញុំ ខ្ញុំនឹងលូតលាស់ក្នុងដំណើររបស់ខ្ញុំ»។
ឆ្លើយតបទៅនឹងសំណួរថា ជាការពិបាកទេក្នុងការរក្សាភាពស្មោះត្រង់ទៅលើអត្តសញ្ញា ចង្វាក់ភ្លេង និងប្រភេទចម្រៀងរបស់កញ្ញាបែប R&B, Blues, or Soul ក្នុងទំនោរនិយមបច្ចុប្បន្នទៅលើចម្រៀងហ៊ីបហប់នោះ សុជ្ឈតា បង្ហាញការជឿជាក់ថា រូបនាងអាចសម្របបាន។
កញ្ញាអាចយកចង្វាក់ភ្លេងជាស្ទីលរបស់ខ្លួន ទៅបញ្ចូលជាមួយហ៊ីបហប់ បង្កើតជាចង្វាក់ភ្លេងថ្មី អមដោយអ្នករ៉េប តម្រូវតាមការនិយម។ ប៉ុន្តែនាងត្រូវប្រាកដក្នុងចិត្តថា មិនធ្វើឱ្យលើសរហូតបាត់បង់ភាពជាខ្លួនឯងនោះទេ។
សិល្បការិនីរូបនេះបន្តថា៖ «ការសម្រេចចិត្តដំបូងរបស់ខ្ញុំក្នុងការប្រកាសខ្លួនជាសិល្បករ គឺបង្កើតតន្ត្រីដែលខ្ញុំអាចកម្សាន្តអារម្មណ៍ប្រជាជន និងបង្កើតអត្តសញ្ញាណផ្ទាល់ខ្លួន»។
សុជ្ឈតា បញ្ជាក់ថា៖ «ដូច្នេះការបោះបង់អ្វីដែលខ្ញុំមានច្រើនពេកនឹងប៉ះពាល់ដល់អត្តសញ្ញាណរបស់ខ្ញុំក្នុងនាមជាសិល្បករ។ គោលដៅខ្ញុំចង់ឱ្យឈ្មោះខ្ញុំត្រូវបានរាប់បញ្ចូល ពេលដែលទស្សនិកជនគិតពីសិល្បៈ R&B, Blues ឬ Soul នៅកម្ពុជា»។
សុជ្ឈតា ថា តន្ត្រីនាងទោះមិនអាចបំពេញចិត្តមនុស្សជាច្រើនក្ដី តែបើការខិតខំប្រឹងប្រែងរបស់កញ្ញាត្រឹមមានមនុស្សមួយចំនួនតូចស្រឡាញ់កោតសរសើរ គឺគ្រប់គ្រាន់ហើយ។
បង្ហាញខ្លួនជាមួយនឹងបទចម្រៀងជាភាសាជាតិ ២ «ទទួលការពិត» និង «មិនស្ដាយក្រោយ» និងបទជាភាសាអង់គ្លេស ១ គឺ «ជឿជាក់»។ ទាំង ៣ បទសុទ្ធតែបង្កប់បទពិសោធផ្ទាល់ខ្លួន។ «ទទួលការពិត» គឺជាបទដែលកញ្ញាបានតែងនៅពេលកញ្ញាធ្វើចិត្តពីការបាត់បង់ឪពុក និងបងប្រុស ហើយនេះក៏ជាបទដែលកញ្ញាចូលចិត្តជាងគេក្នុងចំណោមបទទាំង ៣។
ដោយមនុស្សស្ទើរតែគ្រប់រូបសុទ្ធតែទទួលអារម្មណ៍បាត់បង់មនុស្សសំខាន់ក្នុងជីវិតរៀងៗខ្លួន ដូច្នេះ សុជ្ឈតា ថា កញ្ញាតែងនិពន្ធចម្រៀងដោយសង្ឃឹមថា តន្ត្រីអាចជាការព្យាបាល និងជួយឱ្យអ្នកបាត់បង់ទទួលយកការពិត។
សុជ្ឈតា បានលើកឡើងថា៖ «គ្រប់យ៉ាងដែលខ្ញុំបានសរសេរ គឺជារឿងដែលខ្ញុំបានជួបផ្ទាល់ ឬពីមនុស្សដែលខ្ញុំជិតដិត។ ខ្ញុំចូលចិត្តចំណាយពេលនិយាយ និងស្តាប់រឿងរបស់ពួកគេ។ ខ្ញុំចូលចិត្តបកស្រាយពីអារម្មណ៍នៅក្នុងអត្ថបទចម្រៀង ហើយពីក្រោយពាក្យនីមួយៗនៅក្នុងបទចម្រៀង តែងតែមានសាច់រឿង»។
ក្នុងនាមជាសិល្បការិនីម្នាក់ កញ្ញាមានទស្សនវិស័យចង់ឃើញការរីកចម្រើនទាំងក្នុងវិស័យសិល្បៈ និងសង្គម។ ជាមួយនឹងការប្រកួតប្រជែង និងការរីកចម្រើនជាបន្តបន្ទាប់នៅក្នុងវិស័យនេះ កញ្ញាជឿជាក់ថា សិល្បករខ្មែរនឹងមានវត្តមានកាន់តែច្រើននៅលើឆាកអន្តរជាតិ រួមទាំងប្រកួតប្រជែងនៅទីផ្សារបរទេសនាពេលដ៏ខ្លីខាងមុខនេះ។
កញ្ញា សុជ្ឈតា ក៏បង្ហាញក្ដីស្រមៃដែរថា៖ «ខ្ញុំសង្ឃឹមថា ខ្ញុំនឹងជាម្នាក់ក្នុងចំណោមនោះ»។
ជាក់ស្ដែងកញ្ញាទើបតែបានទទួលកិច្ចសម្ភាសន៍ជាមួយទស្សនាវដ្ដីល្បីឈ្មោះអាមេរិក Rolling Stone ដែលមានអាយុកាលបោះពុម្ពផ្សាយ ៥៣ ឆ្នាំមកហើយ។
កញ្ញាបានទម្លាយរឿងក្នុងចិត្តក៏ដូចជាផ្តែផ្ដាំទៅអ្នកគាំទ្រថា៖ «សាធារណជនតែងតែរំពឹងឱ្យយើងមានអាកប្បកិរិយាណាមួយ ព្រោះតែយើងដើរលើវិថីនេះ។ តែជាក់ស្ដែងគឺយើងគ្រាន់តែជាមនុស្សសាមញ្ញធម្មតា»។
សុជ្ឈតា បានសំណូមពរថា៖ «ខ្ញុំចង់ឱ្យគ្រប់គ្នារៀនបើកចិត្ត ទទួលយកលក្ខណពិសេសរបស់សិល្បករ និងការខំប្រឹងរបស់គាត់ម្នាក់ៗក្នុងការបម្រើអារម្មណ៍ទស្សនិកជន។ ការគាំទ្រពីបងប្អូននឹងជាកម្លាំងចិត្តឱ្យយើងធ្វើបន្តទៀត។ ខ្ញុំផ្ទាល់ក៏នឹងប្រឹងអភិវឌ្ឍខ្លួនឯងដែរ»។
ពេលនេះ សិល្បការិនី ស៊ីន សេដ្ឋសុជ្ឈតា កំពុងធ្វើកិច្ចការលើបទចម្រៀងទោលមួយចំនួនជាមួយនឹងសិល្បកររ៉េបនៅ ក្លាបយ៉ាហ៊ែន ២ រូប គឺ Ruth Ko និង Vi70។ កញ្ញាក៏កំពុងតែរៀបចំការថតចម្រៀងវែង (Entended play) ដែលនឹងត្រៀមចេញនៅចុងឆ្នាំក្រោយផងដែរ៕
