ភ្នំពេញៈ ជារៀងរាល់ឆ្នាំ CPI តែងតែជ្រើសរើសបេក្ខជនឆ្នើមៗមកពីបណ្តាប្រទេសអាស៊ី ដែលធ្លាប់សហការលើវិស័យវប្បធម៌ជាមួយប្រទេសកូរ៉េខាងត្បូង សម្រាប់ការបណ្តុះបណ្តាលនេះ។
ដោយឡែកក្នុងឆ្នាំ ២០២១ នេះជាកិត្តិយសរបស់កម្ពុជាដែល KOFICE បានជ្រើសរើសកម្មវិធី CPI2021 សម្រាប់កម្មវិធីបណ្តុះបណ្តាលឈ្មោះថា «កម្មវិធីកសាងសមត្ថភាពសម្រាប់អាជីវកម្មភាពយន្តកម្ពុជាចូលក្នុងទីផ្សារសកល A Capacity Building Program for Cambodia''s Film Business in Global Market» មកបង្ហាត់ រយៈពេល ៩ សប្តាហ៍ ចាប់តាំងពីដើមខែសីហា មកដល់សិក្ខាកាមជាផលិតករភាពយន្តកម្ពុជា វ័យក្មេងចំនួន ១០ រូប។
ទោះបីជាស្ថិតក្នុងស្ថានភាពកូវីដ ១៩ យ៉ាងណាក្តី ក៏មជ្ឈមណ្ឌលបណ្តុះបណ្តាលជំនាញ និងទទួលភាពយន្តនៅកម្ពុជា (Cambodia Film Commission) នៅតែបន្តយកចិត្តទុកដាក់ទៅលើការបណ្តុះបណ្តាលដល់ផលិតករភាពយន្តកម្ពុជា តាមអនឡាញ ដោយបានសហការជាមួយ KOFICE។
កាលពីថ្ងៃទី ១៤ ខែតុលា កន្លងមកនេះ មជ្ឈមណ្ឌល CFC បានបញ្ចប់វគ្គបណ្តុះបណ្តាលក្នុងកម្មវិធី Cultural Partnership Initiative 2021(CPI2021) របស់សាធារណរដ្ឋកូរ៉េ ដែលមានឈ្មោះថា «A Capacity Building Program for Cambodia''s Film Business in Global Market» ឬ «កម្មវិធីកសាងសមត្ថភាពសម្រាប់អាជីវកម្មភាពយន្តកម្ពុជាចូលទៅក្នុងទីផ្សារសកល»។
វគ្គបណ្តុះបណ្តាលនេះ មានការគាំទ្រពីក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ឧបត្ថម្ភដោយ Korea Foundation for International Cultural Exchange (KOFICE) និង សហការរៀបចំដោយ Busan Foundation for International Cooperation(BFIC) និង Cambodia Film Commission។
តំណាងឱ្យអ្នករៀបចំវគ្គបណ្តុះបណ្តាល និងជាប្រធាន CFC លោក ជៀប សុវិជ្ជា មានប្រសាសន៍ថា៖ «កន្លងមក ផលិតករយើងច្រើនមានការលំបាកក្នុងការនាំចេញភាពយន្តរបស់ខ្លួន ទៅក្រៅស្រុក។ ដូច្នេះ CPI ជួយឱ្យពួកគាត់ស្វែងយល់បន្ថែមពីរបៀបធ្វើគម្រោងផលិត ឱ្យត្រូវនឹងទីផ្សារបរទេស ក៏ដូចជាប្រព័ន្ធផ្សាយរឿងអនឡាញដែរ»។
លោកបន្តថា៖ «មួយវិញទៀត ក្នុងអំឡុងពេលមានជំងឺរាតត្បាតជាសកលដូច្នេះ នេះជាឱកាសល្អ ដើម្បីឱ្យយុវផលិតករភាពយន្តយើង បង្កើនចំណេះដឹងផ្នែកភាពយន្តនេះ»។
រីឯសិក្ខាកាមទៀតសោត ត្រូវបានជ្រើសរើសនៅក្នុងចំណោមផលិតករ និងសមិទ្ធករក្នុងស្រុក ដែលសុទ្ធតែមានឆន្ទៈ លើការបំប៉នចំណេះដឹងបន្ថែមក្នុងការសម្រេចគម្រោងភាពយន្តរបស់ខ្លួន ទៅកាន់ឆាកអន្តរជាតិ។
សិក្ខាកាមមួយរូប នៅក្នុងចំណោម ១០ រូប គឺលោក លៀក លីណា ជានាយកប្រតិបត្តិផលិតកម្ម LD Picture ឱ្យដឹងថា៖ «តាមពិតខ្ញុំកម្រមានឱកាសបានជួបផលិតករក្នុងស្រុកឯទៀតណាស់ ដោយសារការមមាញឹក នឹងការផលិត។ តែតាមរយៈវគ្គនេះ ខ្ញុំបាន ស្គាល់ និងធ្វើការជាក្រុមបន្ថែមជាមួយពួកគាត់ ដោយមានស្មារតីសហការគ្នាល្អ។ ដូច្នេះបើ CPI មានវគ្គលើកក្រោយៗទៀត ខ្ញុំនឹងដាក់ពាក្យរៀនបន្តទៀត»។
ជាលទ្ធផលសិក្ខាកាមទាំង ១០ រូប សម្រេចផែនការសកម្មភាព ៣ និងសំណើគម្រោងផលិតរឿង ៣ តាមក្រុមនីមួយៗ រួមមានក្រុមទី១ «យុទ្ធសាស្ត្រប្រើការផ្សព្វផ្សាយភាពយន្តខ្មែរ ទៅកាន់ប្រព័ន្ធចាក់រឿងអនឡាញតាមរយៈភាពយន្តបែបរន្ធត់» ករណីសិក្សារឿងរន្ធត់ «នាឡិកាជញ្ជាំងក្រហម»។ ក្រុមទី២ «វិធីផ្សំមរតកវប្បធម៌ខ្មែរជាមួយរូបារម្មណ៍ច្នៃប្រឌិត សម្រាប់ភាពយន្តប្រឌិតបែបវិទ្យាសាស្ត្រខ្មែរ ទៅទស្សនិកជនជុំវិញពិភពលោក» ដោយករណីសិក្សារឿងប្រឌិតបែបវិទ្យាសាស្ត្រ «រាមឥសូរ»។ ក្រុមទី៣ «វិធីផ្សព្វផ្សាយភាពយន្តស្តង់ដាពិភពលោកទៅប្រព័ន្ធចាក់រឿងអនឡាញ តាមរយៈ រឿងទើបផលិតថ្មី «លោកគ្រូប្រពន្ធល្អ» ករណីសិក្សា រឿងសង្គម និងគ្រួសារ៕