ទីក្រុងរ៉ូម៖ សម្រាប់មនុស្សទូទៅ ការរស់នៅក្នុងគុកមានន័យថា រលាយអស់សេរីភាព តែចម្លែកអីបុរសម្នាក់នេះបែរជាចង់រត់គេចពីផ្ទះ ទៅចូលពន្ធនាគារ ដើម្បីទទួលបានអារម្មណ៍ថាមានសេរីភាពទៅវិញ។
ប៉ូលីសបាននិយាយកាលពីថ្ងៃអាទិត្យថា បុរសម្នាក់ដែលត្រូវបានឃុំខ្លួននៅផ្ទះ ឯប្រទេសអ៊ីតាលីបាន បង្ហាញខ្លួននៅឯការិយាល័យនរគរបាល ដោយស្នើសុំឱ្យប៉ូលិសចាប់លោកដាក់ពន្ធនាគារ ព្រោះជីវិតរួមរស់ជាមួយប្រពន្ធ គាត់នៅផ្ទះ ឈានដល់ស្ថានភាពយ៉ាប់យឺនខ្លាំងមិនអាចទ្រាំទ្របាន។
ប៉ូលីស Carabinieri នៅក្រុងទីវូលី បាននិយាយនៅក្នុងសេចក្តីថ្លែងការណ៍មួយថា៖ «ពលរដ្ឋអាល់បានីអាយុ ៣០ ឆ្នាំម្នាក់ រស់នៅក្នុងក្រុង Guidonia Montecelio នៅខាងក្រៅទីក្រុងរ៉ូម មិនអាចស៊ូទ្រាំនឹងការរួមរស់ជាមួយគ្នាដោយបង្ខំ ជាមួយប្រពន្ធរបស់គាត់ទៀតទេ»។
សេចក្ដីថ្លែងការបានសរសេរថា៖ «ដោយហត់នឿយនឹងស្ថានការណ៍នៅផ្ទះ គាត់សុខចិត្តរត់គេចខ្លួនដោយឯកឯងដោយបង្ហាញវត្តមាននៅប៉ុស្តិ៍ប៉ូលិសដើម្បីសុំខ្លួនចូលពន្ធនាគារ»។
បុរសនេះត្រូវបានគេឃុំខ្លួនក្នុងផ្ទះពីបទឧក្រិដ្ឋកម្មគ្រឿងញៀនអស់រយៈពេលជាច្រើនខែ ហើយនៅសល់ប៉ុន្មានឆ្នាំទៀត ទើបរួចទោស។ នេះបើយោងតាមមន្ត្រីប៉ូលិស ហ្វ្រង់សេសស្កូ ចីអាកូម៉ូ ហ្វើរ៉ាងតេ ពីការិយាល័យនរគរបាលក្រុងទីវូលី បានប្រាប់ទីភ្នាក់ងារ AFP។
លោក ហ្វើរ៉ាងតេ បាននិយាយថា៖ «គាត់ត្រូវបានឃុំខ្លួននៅផ្ទះ ដែលមានប្រពន្ធ និងគ្រួសាររបស់គាត់ ហើយអ្វីៗក៏ប្រែជាល្អក់កករ»។
លោកបានដកស្រង់សម្ដីបុរសនោះថា៖ «គាត់ថា គិតទៅមើល ជីវិតនៅផ្ទះដូចនរកបែបហ្នឹង ខ្ញុំមិនអាចទ្រាំទ្របានទៀតទៀត។ ខ្ញុំសុខចិត្តចូលគុកវិញប្រសើរជាង»។
ទីបំផុត បុរសនោះក៏ត្រូវបានចាប់ខ្លួនពីបទល្មើសនឹងការឃុំខ្លួននៅផ្ទះ ហើយអាជ្ញាធរក៏បានសម្រេចឱ្យនាំខ្លួនយកទៅពន្ធនាគារដូចបំណង៕ AFP/HR