.jpg)
បុគ្គលិកនៅបារ៍ Teens រៀបចំភេសជ្ជៈក្រឡុកលាយក្ទម្ពនៅឆៃណាថោនក្រុងបាងកក។ AFP
ក្រុងបាងកក៖ ខណៈដបស្រាធូលីទុំជិត ម្ចាស់បារ៍ក្រុងបាងកកម្នាក់កំពុងព្យាយាមឆ្លៀតពេលពីបម្រាមរឹតត្បិតកូវីដមក ច្នៃភេសជ្ជៈទឹកផ្លែឈើតាមរដូវកាល ជាមួយស្លឹកក្ទម្ព។
ទីក្រុងថៃដែលធ្លាប់ល្បីល្បាញពីជីវិតនាពេលរាត្រី បានរងនូវបម្រាមរយៈពេលជាង ៧ ខែ លើសេវាកម្មគ្រឿងស្រវឹង ក្នុងការទប់ស្កាត់ការរីករាលដាលនៃវិរុសកូរ៉ូណា ដោយបន្សល់ទុកឱ្យម្ចាស់តៀមស្រា និងបារ៍ឈឺក្បាលជាដំណំ។
ប្រទេសថៃបានកត់ត្រាអ្នកកើតជំងឺកូវីដជាង ១,៧ លាននាក់ ជាការហក់ឡើងយ៉ាងគំហុកតាំងពីខែមេសា ពេលរដ្ឋាភិបាលបានប្រកាសក្រោយការផ្ទុះជាចង្កោមនៅតាមក្លិបរាត្រីធំៗ។
ស្លឹកក្ទម្ពនៅបារ៍ Teens ក្រុងបាងកក ដែលធ្លាប់លក់ស្រាក្រឡុក ប្រែមកភេសជ្ជៈទឹកផ្លែឈើលាយរុក្ខជាតិឱសថបុរាណ។ AFP
ដោយគ្មានការឧបត្ថម្ភពីរដ្ឋាភិបាល ម្ចាស់បារ៍ពិបាកនឹងការរស់រាន ដែលពួកគេត្រូវជ្រើសរើសរវាងការបិទអាជីវកម្ម ឬបង្កើតភាពច្នៃប្រឌិតផ្សេងៗ។
មុនពេលផ្ទុះការឆ្លងរីករាលដាល អ្នកនិយមស្រាក្រឡុកនាំគ្នាមកក្រេបភេសជ្ជៈស្រវឹងនៅបារ៍ Teens ជាបារ៍លក់ស្រាក្រឡុកនៅលើវិថីឆៃណាថោនក្រុងបាងកក។
ពេលនេះ Teens បានបើកទ្វារឡើងវិញជាមួយសកម្មភាពសេវាកម្ម ៦០ ភាគរយ លក់ភេសជ្ជៈក្រឡុកគ្មានគ្រឿងស្រវឹងដោយប្រើស្លឹកក្ទម្ព ជារុក្ខជាតិស្ថិតក្នុងខ្សែស្រឡាយកាហ្វេ ដែលត្រូវបានប្រើនៅតាមតំបន់នានានៃតំបន់អាស៊ីអាគ្នេយ៍ជាថ្នាំប៉ូវកម្លាំង និងជំនួយស្មារតី។
ជារុក្ខជាតិស្ថិតក្នុងខ្សែស្រឡាយកាហ្វេ ក្ទម្ពមានអានុភាពស្រាលជាងម័រហ្វីនក្នុងការភ្ញោចដល់ប្រព័ន្ធខួរក្បាល។ AFP
ក្ទម្ព ដែលមានអានុភាពស្រាលជាងម័រហ្វីនក្នុងការភ្ញោចដល់ប្រព័ន្ធខួរក្បាល ត្រូវបានដកចេញពីបញ្ជីហាមឃាត់របស់ថៃកាលពីខែសីហាកន្លងទៅ។
វិធានការនេះបានធ្វើឱ្យម្ចាស់បារ៍ Teens លោក នីក អានុម៉ាន រ៉ាចាដុន រក្សាបានក្ដីសង្ឃឹម ទោះបីជាភេសជ្ជៈក្រឡុកគ្មានសារធាតុស្រាក្ទម្ពលក់ត្រឹមតម្លៃ ៤ ដុល្លារ (១៦ ០០០ រៀល) ធៀបនឹងស្រាក្រឡុក ជីន និងតូនិក តម្លៃ ១១ ដុល្លារ (៤៤ ០០០ រៀល) យ៉ាងណាក៏ដោយ។
លោក នីក បានប្រាប់ AFP ថា៖ «យើងគ្មានជម្រើសអ្វីផ្សេងទេ ចំណូលពី ១៥ ទៅ ២០ ភាគរយ គ្រប់គ្រាន់សម្រាប់ចំណាយលើបុគ្គលិក និងថ្លៃឈ្នួលហាង។ តែប៉ុណ្ណឹងឯង»។
បុគ្គលិកនៅបារ៍ Teens រៀបចំភេសជ្ជៈក្រឡុកលាយក្ទម្ពនៅឆៃណាថោនក្រុងបាងកក។ AFP
លោក ថាណាខន គុបតាជីត ប្រធានសមាគមមុខរបរលក់ភេសជ្ជៈគ្រឿងស្រវឹង បានប្រាប់បណ្ដាញផ្សព្វផ្សាយក្នុងស្រុកថា លោកមើលឃើញថា ការលក់ភេសជ្ជៈមានការធ្លាក់ចុះ ៥០ភាគរយពីតម្លៃ ៩ពាន់លានដុល្លារដោយសារតែបម្រាម។
ការមិនបានទទួលការឧបត្ថម្ភពីរដ្ឋ និងជាប់បម្រាមលក់ដូរក្នុងទីតាំងផ្ទាល់ ទាំងបារ៍ និងតៀមស្រា ក៏រងនូវបម្រាមពីការលក់គ្រឿងស្រវឹងតាមអនឡាញថែមទៀត។
ជាលទ្ធផល ម្ចាស់ដីមួយចំនួនក្នុងក្រុងបាងកក ខិតខំសម្របខ្លួនតាមបម្រាម ដោយលួចផ្ដល់សេវាកម្មគ្រឿងស្រវឹងក្នុងកែវលាតៗធម្មតា ឬច្រកកំប៉ុងភេសជ្ជៈផ្សេងៗ។
បុគ្គលិកនៅបារ៍ Teens រៀបចំភេសជ្ជៈក្រឡុកលាយក្ទម្ពនៅឆៃណាថោនក្រុងបាងកក។ AFP
បច្ចុប្បន្ន ជិតដល់វេលាត្រូវបើកប្រទេសឡើងវិញ អតិថិជននៅ Teens ស៊ាំងនឹងរសជាតិភេសជ្ជៈក្រឡុកជាមួយឱសថបុរាណក្ទម្ព។
ផ្លែស្វាយ និងទឹកក្រូចឆ្មារដាក់ក្នុងពែងផលិតពីក្រមួនឃ្មុំ និងពពុះទឹកឃ្មុំរសជាតិស្លឹកក្ទម្ពល្វីងឡមៗ រក្សាតុល្យភាពជាមួយរសជាតិផ្អែមនៃផ្លែឈើ។
ក្នុងបារ៍ អតិថិជនអាយុ ៤០ ឆ្នាំឈ្មោះ ផដ បានសាកល្បងភេសជ្ជៈក្រឡុកស្លឹកក្ទម្ពជាលើកដំបូង ពីកែវភេសជ្ជៈឈ្មោះថា «ត្រចៀកខ្លា» ដែលផ្ទុកមានទឹកក្រូចឆ្មារ ខ្ទឹមស និងសូដា។
លោកបាននិយាយថា៖ «វាមានរសជាតិស្រដៀងនឹងផ្លែព្រូនជូរៗ។ វាពិតជាស្រស់ស្រាយមែន»៕ AFP/HR
ភេសជ្ជៈក្រឡុករសជាតិស្លឹកក្ទម្ពល្វីងឡមៗ រក្សាតុល្យភាពជាមួយរសជាតិផ្អែមនៃផ្លែឈើ។ AFP
