.jpg)
ស្រីស្អាតទាំង ១៩ រូប ក្នុងឈុតរាត្រីសមោសរ និងឈុតហែលទឹក នៃការប្រកួតកញ្ញាឯកចក្កវាឡកម្ពុជា ឆ្នាំ ២០២១។ រូបថត ហ្វេសប៊ុក
ភ្នំពេញៈ ការប្រកួតប្រជែងដើម្បីជ្រើសរើសរករាជិនីសម្រស់ ឬជាបេក្ខនារីតំណាងជាតិនៃកម្មវិធីប្រកួតកញ្ញាឯកចក្កវាឡកម្ពុជាប្រចាំឆ្នាំ ២០២១ ជិតរកឃើញស្រីស្អាត ជាម្ចាស់ជយលាភីហើយ ខណៈពេលនេះការប្រកួតបានឆ្លងកាត់វគ្គការប្រកួតបឋម កាលពីចុងសប្តាហ៍កន្លងមក។ ឯការប្រកួតវគ្គផ្តាច់ព្រ័ត្រ នឹងធ្វើនៅថ្ងៃទី ២៨ ខែ តុលា ឆ្នាំ ២០២១ នេះ ដោយផ្សាយផ្ទាល់នៅទូរទស្សន៍បាយ័ន និងតាមគេហទំព័រ Miss Universe Cambodia។
កញ្ញា សុង សោភា បេក្ខនារីពាក់ស្លាកលេខ ៨ នៃការប្រកួតកញ្ញាឯកចក្កវាឡកម្ពុជាឆ្នាំ ២០២១។ រូប ហ្វេសប៊ុក
ការប្រកួតបឋម (Preliminary Competition) នៃកម្មវិធីប្រកួតកញ្ញាឯកចក្កវាឡកម្ពុជា ប្រចាំឆ្នាំ ២០២១ (Miss Universe Cambodia 2021) បានបញ្ចប់កាលពីថ្ងៃទី ២៣ ខែ តុលា ឆ្នាំ ២០២១ នាចុងសប្តាហ៍កន្លងមកនេះ ដោយមានការប្រកួតបឋមនៃការបង្ហាញឈុតហែលទឹក ការប្រកួតបឋមនៃការបង្ហាញរ៉ូបរាត្រីសមោសរ ការប្រកួតបឋមនៃការបង្ហាញឈុតតំណាងជាតិ ការប្រកួតបឋមនៃការបង្ហាញពានរង្វាន់ពិសេស ហើយក៏បង្ហាញសមាសភាពក្រុមគណ:កម្មការផ្តល់ពិន្ទុការប្រកួតបឋមនេះផងដែរ។
សម្រាប់ការប្រកួតបឋមនេះ បើតាមសេចក្តីប្រកាសពីគេហទំព័រផ្លូវការបានឱ្យដឹងថា៖ «ក្រុមគណ:កម្មការផ្តល់ពិន្ទុនៃ Preliminary Competition រួមមានកញ្ញា ថោង ម៉ាឡា កញ្ញាឯកភពផែនដីកម្ពុជាឆ្នាំ ២០១៩ កញ្ញា សំណាង អេលីណា កញ្ញាឯកចក្កវាឡកម្ពុជាឆ្នាំ ២០១៩ កញ្ញា រឿន ណាត កញ្ញាឯកចក្កវាឡកម្ពុជា ឆ្នាំ ២០១៨ កញ្ញា ផាន់ ផាត់ណា កញ្ញាឯកសុច្ឆន្ទៈទេសចរណ៍អាស៊ី-ប៉ាស៊ីហ្វិកកម្ពុជា ឆ្នាំ ២០១៥ លោក សានី ជាជយលាភីលេខ ៤ នៃកម្មវិធី Mister Tourism and Culture Universe 20218 លោក Franz Josef Brune ជាតំណាងក្រុមហ៊ុនស្ពនស័រធំស្រាបៀរ Ganzberg និងលោក ភួង វណ្ណា ស្ថាបនិក AB Studio»។
ចំពោះបេក្ខនារីប្រកួតកញ្ញាឯកចក្កវាឡកម្ពុជា ប្រចាំឆ្នាំ ២០២១ ទាំង ១៩ រូប មានកញ្ញា ខុន លីណា ពាក់លេខ ១៩ កញ្ញា អោម ប្រាថ្នា ពាក់លេខ ១៨ កញ្ញា មឿង បណ្ឌិតបរមី ពាក់លេខ ១៧ កញ្ញា រិ ស្រីមុំ ពាក់លេខ ១៦ កញ្ញា ងិន ម៉ារ៉ាឌី ពាក់លេខ ១៥ កញ្ញា ហ៊ុន ហ្គេចឡាង ពាក់លេខ ១៤ កញ្ញា សុង សុភ័ក្រ ពាក់លេខ ១៣ កញ្ញា វៃ ដានី ពាក់លេខ ១២ កញ្ញា រិទ្ធ នីសា ពាក់លេខ ១១ កញ្ញា គិត អេលែន ពាក់លេខ ១០ កញ្ញា ខុន អេននី ពាក់លេខ ៩ កញ្ញា សុង សោភា ពាក់លេខ ៨ កញ្ញា ពក ស្រីល័ក្ខ ពាក់លេខ ៧ កញ្ញា សុខ ចិន្តា ពាក់លេខ ៦ កញ្ញា ឆន ស្រីណេត ពាក់លេខ ៥ កញ្ញា ព្រំ ស្រីនាត ពាក់លេខ ៤ កញ្ញា ឡូយ ច័ន្ទរស្មី ពាក់លេខ ៣ កញ្ញា សារី ស្រីពេជ្រ ពាក់លេខ ២ និងកញ្ញា ស៊ីម ម៉ាហ្គារ៉ែតពេជ្រចរណៃ ពាក់លេខ ១៕
