ភ្នំពេញ៖ សន្តិសុខគ្រងឈុតពណ៌ក្រហម មុខពាក់របាំងខ្មៅ បុរសស្រោបឈុតខ្មៅជិតឈឹង និងនារីស្លៀកឈុតតុក្កតាពណ៌លឿងទុំ ក្នុងល្បែង «Red Light, Green Light» បានឈរតម្រៀបគ្នា ដើម្បីត្រួតពិនិត្យអ្នកចូលរួមលេងទាំងអស់។
នេះជាទិដ្ឋភាពការលេងហ្គេមកម្សាន្ត រៀបចំឡើងដោយក្រុមហ៊ុន Prince Security Service (PSS) ដែលជាសមាជិកនៃ Prince Holding Group ក្នុងភោជនីយដ្ឋានកូរ៉េ បូនហ្គា ម្តុំបឹងកេងកង ១ កាលពីថ្ងៃទី ៣០ ខែតុលា នារដូវបុណ្យហាឡូវីន។
លោក បេនជី លាវ (Benjie Liu) នាយកគ្រប់គ្រងក្រុមហ៊ុន PSS ដែលបង្កើតក្នុងឆ្នាំ ២០១៨ ដើម្បីផ្តល់នូវដំណោះស្រាយសន្តិសុខប្រជាជន ធានាសុវត្ថិភាពទីកន្លែង និងទ្រព្យសម្បត្តិ បានប្រាប់ ភ្នំពេញ ប៉ុស្តិ៍ថា៖ «ដោយសារក្រុមហ៊ុនយើងជាក្រុមហ៊ុនសន្តិសុខផង ការធ្វើតម្រាប់តាម Squid Game គឺស័ក្តិសមបំផុតក្នុងឱកាស ហាឡូវីន ព្រោះឆ្មាំការពារក៏ជាតួអង្គសំខាន់មួយក្នុងរឿង»។
តួអង្គទាំងនេះដកស្រង់ចេញពីភាពយន្តកូរ៉េខាងត្បូង «Squid Game» ដ៏ល្បីល្បាញ ដែលមានអ្នកទស្សនាលើ Netflix ដល់ទៅជាង ១១១ លានគណនី និងកំពុងពេញនិយមនៅលំដាប់កំពូលទាំង ១០ ក្នុងប្រទេស ៩៤ ជុំវិញពិភពលោក។
ក្រុមហ៊ុន PSS បានបំផុសគំនិតអំពីការស្លៀកពាក់តាមលំនាំតួអង្គក្នុងរឿង ដោយបានរៀបចំឱ្យបុគ្គលិកសន្តិសុខរបស់ខ្លួនស្លៀកពាក់ឈុត ឆ្មាំការពារដែលមានពណ៌ក្រហម អមដោយផ្ទាំងរូបភាពតុក្កតាមនុស្សយន្ត «Red Light, Green Light» ដើម្បីរង់ចាំទទួលស្វាគមន៍ភ្ញៀវ។
លោក បេនជី បានបន្តថា៖ «ឆ្លៀតពេលនេះយើងប្រើប្រាស់ប្រជាប្រិយ-ភាពរបស់រឿង បង្កើតកម្មវិធី ដើម្បីឱ្យអតិថិជនស្គាល់អំពី PSS និងសេវាកម្មរបស់យើងកាន់តែច្បាស់តាមរយៈ ភាពច្នៃប្រឌិត តាមសាច់រឿងនេះ»។
ក្រុមហ៊ុនបានអញ្ជើញអ្នកសារព័ត៌មានក្នុងស្រុកប្រកួតលេងល្បែងដកស្រង់ពីខ្សែភាពយន្តដូចជា វគ្គទាយគ្រាប់ឃ្លី និងវគ្គចាក់បន្ទះស្ករ។
អ្នកចូលរួម បានលេងល្បែងកម្សាន្ត ចំនួន ២ ជុំនៃការប្រកួត គឺជុំទី១ អ្នកចូលរួមត្រូវចាប់ដៃគូដែលសរុបមាន ៥ គូ ដើម្បីលេងទាយគ្រាប់ឃ្លីតាមរយៈការប៉ាវ ជម្រុះយកតែ ៥ នាក់ យកទៅលេងជុំទី២ គឺការប្រកួតចាក់បន្ទះស្ករ។
ក្នុងចំណោម ៥ នាក់នោះ អ្នកដែលគូររូបឱ្យទៅតាមនំបន្ទះស្ករមុនគេត្រូវបានចាត់ទុកថា ជាអ្នកឈ្នះ នឹងទទួលបានប្រាក់រង្វាន់ត្រឡប់ទៅផ្ទះ។ អ្នកឈ្នះបានចំណាយពេលតិចជាង ២ នាទីគូររូបលើនំជារាងបញ្ចកោណ។
ផ្ទុយពីវិធីសាស្ត្រនៃការផ្តល់រង្វាន់ និងការដាក់ទណ្ឌកម្មតាមលំនាំសាច់រឿងដើម អ្នកចូលរួមនៅក្នុងកម្មវិធីហាឡូវីន PSS មិនប្រកួតប្រជែងដើម្បីបន្តជីវិតរបស់ពួកគេនោះទេ។
លោក បេនជី បន្តថា៖ «អ្នកឈ្នះក្នុងការប្រកួតប្រជែងនឹងទទួលបានទឹកប្រាក់ ៤៥៦ ០០០ រៀល ត្រឡប់ទៅផ្ទះវិញ។ ការលេងកម្សាន្តនេះ គឺមិនមែនជាការផ្លាស់ប្តូរជីវិតជាមួយនឹងទឹកប្រាក់ ៤៥,៦ ពាន់លានវ៉ុន ដូចក្នុងសាច់រឿងនោះទេ។ ពួកយើងត្រូវតែប្រាកដថា គ្មានអ្នកសារព័ត៌មានណាម្នាក់រងគ្រោះនៅក្នុងអំឡុងពេលនៃការប្រកួតលេងល្បែងកម្សាន្តក៏ដូចជាក្នុងកម្មវិធីទាំងមូល»។
កម្មវិធីកម្សាន្តមួយនេះគ្រាន់តែជាផ្នែកមួយនៃឥទ្ធិពលរឿង Squid Game នៅកម្ពុជា។ ប្រជាប្រិយភាពវាបានសាយភាយដល់កម្ពុជារាប់តាំងពីការស្លៀកពាក់ ចម្រៀង ការលេងហ្គេម រហូតដល់ចំណីអាហារ។
ហ្គេមទូរស័ព្ទដែលត្រូវបានទាញយកមកលេងច្រើនបំផុតនៅកម្ពុជាមានដូចជា 456: Survival game និង ហ្គេមកាត់នំស្ករ Cookie Cutter សុទ្ធសឹងតែយកលំនាំតាមរឿងនេះ។
ភោជនីយដ្ឋាន ហាងកាហ្វេមួយចំនួន ដូចជា Stonegrill Cambodia Restaurant and Bar និង Naga mo mo ដែលជាហាងប៊ឺហ្គឺរបុរាណ បានយកនំធ្វើជាចំណីពិសេសបន្ថែមដល់ភ្ញៀវ ក៏ដូចជាទំព័របណ្ដាញសង្គម Mitr Phol Sugar Cambodia បានចែករំលែកកពីវិធីធ្វើនំស្ករ។
អ្នកលក់ខោអាវអនឡាញ មានផេច ឈ្មោះ Xstyle Glory បានប្រាប់ ភ្នំពេញ ប៉ុស្តិ៍ថា៖ «យើងឃើញមានសម្ទុះចាប់អារម្មណ៍ច្រើនទៅលើរឿង។ ដូចនេះយើងនាំចូលមកប៉ុន្មានឈុត [Squid Game] សាកល្បងលក់ហើយក៏មានអ្នកសួរនាំច្រើន។ ម្នាក់ទិញ ១-២ ឈុត ខ្ញុំឆ្លៀតឱកាសសួរទៅ គាត់ថាចង់យកថតរូប និងត្រៀមសម្រាប់បុណ្យហាឡូវិន»។
ក្រៅពីឥទ្ធិពលហ្គេម សម្លៀកបំពាក់ និងចំណីអាហារ សាច់រឿងល្បីខ្លាំងចំពោះយុវវ័យមួយនេះបានសាយភាយឥទ្ធិពលសូម្បីតែក្មេងៗ ដោយបន្លឺសំឡេងរហ៊ឹមត្រាប់តាមចម្រៀង ទាំងមិនយល់ភាសាដើម និងមានទាំងការសម្ដែង TikTok ថែមទៀតផង។
ឥទ្ធិពលភាពយន្ត Squid Game ជាសកលមានទាំងគុណសម្បតិ្តអប់រំ ឆ្លុះបញ្ចាំងតថភាពវិសមភាពសង្គម ព្រមទាំងគុណវិបត្តិ ជាមួយរូបភាពអំពើហិង្សា បាញ់សម្លាប់ ការបង្ហូរឈាមគួរឱ្យខ្លាច ដែលមិនស័ក្ដិសមនឹងទស្សនិកជនវ័យក្មេង។
លោក ហឿ សេធុល អ្នកប្រឹក្សាផ្លូវចិត្តនៅកម្ពុជាជាង ២០ ឆ្នាំ បានប្រាប់ ភ្នំពេញ ប៉ុស្តិ៍ថា៖ «ការបារម្ភទី១ គឺហ្គេម។ ជាក់ស្ដែង មិនមែនតែ Squid game ហ្នឹងទេ ដែលក្មេងជក់ខ្លាំង ហើយមកដល់ចំណុចហ្នឹង គាត់អាចប្រឈមនឹងការសិក្សា ទំនាក់ទំនងសង្គម និងជីវិតប្រចាំថ្ងៃ។ មួយទៀតទាក់ទងនឹងអំពើហិង្សា វាអាចធ្វើឱ្យអតិថិជន ប្រែប្រួលអាកប្បកិរិយាទំនោរទៅរកហិង្សាហ្នឹងតែម្ដង»។
អ្នកជំនាញចិត្តសាស្ត្រដែលមានស្នាដៃចងក្រងសៀវភៅអប់រំផ្លូវចិត្តកុមាររូបនេះបានបន្តថា៖ «ខ្ញុំគិតថា វាមិនចំណេញអីប៉ុន្មាន រដ្ឋាភិបាលគួរតែគ្រប់គ្រង ក្នុងការទប់ទល់ ឬបិទជាពិសេសជាមួយក្មេង។ ចំពោះតួនាទីឪពុកម្ដាយខ្ញុំយល់ថា មានសមត្ថភាពគ្រប់គ្រងបាន។ តែបើមិនអាចគួរតែរកជំនួយពីអ្នកឯកទេស ដើម្បីកុំឱ្យកូនកាន់តែផុងខ្លួន»។
ទោះសាច់រឿងដែលមិនស័ក្ដិសមនឹងកុមារនេះ ក៏ Squid Game ត្រូវបានផលិតករកូរ៉េអះអាងថា មានតម្លៃអប់រំបង្កប់ បង្ហាញពីមិត្តភាព ការទុកចិត្តមនុស្ស និងផ្នែកងងឹតមួយនៃសង្គមដែលយុវវ័យអាចស្វែងយល់។
ត្រឡប់មកកាន់ការលេងល្បែងមុននេះ ប្រធានគ្រប់គ្រង PSS លោក បេនជី និយាយថា៖ «ខ្ញុំគិតថា រឿងនេះទទួលបានជោគជ័យខ្លាំងណាស់លើសកលលោក ដែលធ្វើឱ្យពេលយើងរៀបចំបុណ្យហាឡូវីនកាលពីសប្ដាហ៍មុន មានភាពប្លែកថ្មី និងរីករាយពីអ្នកចូលរួម ទាំងការលេងល្បែង និងថតរូបកម្សាន្ត ជារឿងល្អសម្រាប់បង្ហាញពីសេវាកម្មយើងផងដែរ»៕