.jpg)
ចេតិយរបស់រាជិនីសំឡេងមាស រស់ សេរីសុទ្ធា។ រូបថត ហ្វេសប៊ុក
ភ្នំពេញៈ នាពេលថ្មីៗនេះ មានការភ្ញាក់ផ្អើលពេញតាមបណ្តាញសង្គមហ្វេសប៊ុក ដោយមានការលេចចេញនូវព័ត៌មានជាទីតាំងតម្កល់ធាតុ (ចេតិយ) របស់អតីតរាជិនីសំឡេងមាស លោកស្រី រស់ សេរីសុទ្ធា ក្រោយពីមានការធ្វើបុណ្យឱទ្ទិសកុសល និងការប្រារព្ធពិធីខួបកំណើតវ័យ ៧៤ ឆ្នាំ ពីសំណាក់សាច់ញាតិដែលជាបងស្រីបង្កើត កាលពីថ្ងៃទី ៦ ខែ វិច្ឆិកា ឆ្នាំ ២០២១ កន្លងមកថ្មីៗនេះ។
បើតាមគណនីហ្វេសប៊ុកឈ្មោះ Socheata Vong បានបង្ហោះបណ្ដុំរូបភាព និងសារបង្ហាញទីតាំងចេតិយ របស់តារាចម្រៀងស្រីល្បីនាទសវត្សរ៍ទី៦០-៧០ លោកស្រី រស់ សេរីសុទ្ធា ដែលមានរហស្សនាមថា «រាជិនីសំឡេងមាស» ជាដៃគូលោកតា ស៊ីន ស៊ីសាមុត ក៏មានរហស្សនាមថា «អធិរាជសំឡេងមាស» ដែរនោះ មានទីតាំងស្ថិតនៅក្នុងស្រុកភ្នំស្រួច ខេត្តកំពង់ស្ពឺ។
ពីគណនីហ្វេសប៊ុកខាងលើនេះបង្ហើបថា៖ «នេះជារូបភាពចេតិយរបស់រាជិនីសំឡេងមាស រស់ សេរីសុទ្ធា ដែលខ្ញុំបានស្វែងរកឃើញកាលពីខែសីហា ឆ្នាំ ២០២១។ ចេតិយនេះមានទីតាំងនៅភូមិសំបួរ (ត្រពាំងខ្លុង) ឃុំដំបូករូង ស្រុកភ្នំស្រួច ខេត្តកំពង់ស្ពឺ ហើយត្រូវបានសាងសង់រួចនៅក្នុងខែធ្នូ ឆ្នាំ ២០២០។ នៅខាងក្នុងចេតិយមានឆ្លាក់អក្សរថា «សូមឧទ្ទិសជូនវិញ្ញាណក្ខន្ធលោកស្រី រស់ សេរីសុទ្ធា និងក្រុមគ្រួសារ ព្រមទាំងជនរងគ្រោះ ដែលបានបាត់បងជីវិតក្នុងរបប ប៉ុល ពត»។ ចេតិយនេះមិនមានដាក់ឈ្មោះអ្នកសាងសង់នោះទេ ប៉ុន្តែបើតាមប្រភពអះអាងពីអ្នកភូមិ ដែលរស់នៅទីនោះ បានប្រាប់ថា មានមន្ត្រីជាន់ខ្ពស់មកពីក្រសួងព្រះបរមរាជវាំងជាអ្នកសាងសង់ ហើយមានការជួយថវិកាពីសប្បុរសជន។ ចេតិយនេះមានទំហំតូចច្រឡឹង និងមានរចនាប័ទ្មខ្មែរយ៉ាងល្អប្រណីត។ នៅក្នុងភូមិនេះ និងភូមិក្បែរនេះមានស្រះទឹក អណ្តូងទឹក និងសាលាបឋមសិក្សា ដែលជាព្រះរាជអំណោយរបស់ព្រះករុណាជីវិតតម្កល់លើត្បូង សម្តេចព្រះបរមនាថ នរោត្តម សីហមុនី ព្រះមហាក្សត្រនៃ ព្រះរាជាណាចក្រកម្ពុជា»។
ប្រភពដដែលបន្តថា៖ «ថ្ងៃនេះ ខ្ញុំមានកិត្តិយស និងសេចក្តីរីករាយក្រៃលែង ដែលបានរួមដំណើរជាមួយលោកស្រី រស់ សាបឿន (Ros Saboeun) ដែលត្រូវជាបងស្រីបង្កើតរបស់លោកស្រី រស់ សេរីសុទ្ធា ទៅកាន់ចេតិយនេះ ដើម្បីរៀបចំពិធីបង្សុកូលឧទ្ទិសដល់វិញ្ញាណក្ខន្ធលោកស្រី រស់ សេរីសុទ្ធា និងជនរងគ្រោះដែលបានបាត់បង់ជីវិតក្នុងរបបខ្មែរក្រហម។ ថ្ងៃនេះដែរ ក៏ជាថ្ងៃកំណើតរបស់លោកស្រី រស់ សេរីសុទ្ធា។ លោកស្រីកើតនៅថ្ងៃទី ៦ ខែ វិច្ឆិកា ឆ្នាំ ១៩៤៧ នៅភូមិដំណាក់ហ្លួង ឃុំវត្តគរ ស្រុកសង្កែ ខេត្តបាត់ដំបង។ លោកស្រីមានបងប្អូនបង្កើតចំនួន ៥ នាក់។ មានតែលោកស្រី រស់ សាបឿន តែប៉ុណ្នោះ ដែលរស់រានមានជីវិត បច្ចុប្បន្ន គាត់កំពុងរស់នៅ ខេត្តបាត់ដំបង ក្រោយវត្តដំរីស»។
បទចម្រៀងពេញនិយមរបស់ប្រិយមិត្តអ្នកស្តាប់នូវសំនៀង រាជិនីសំឡេងមាស មានបទ «អនុស្សាវរីយ៍ខ្នងភ្នំសំពៅ» (គេច្រឡំថាបទ «បាចផ្កាម្រះព្រៅ») និងបទ «កូនស្រីអ្នកនេសាទ» (គេច្រឡំថា «ឱ! ភូមិបាក់ព្រា»)៕
