កំពត: ជាមួយរូបផ្កា ៥ ស្រទាប់ជានិមិត្តសញ្ញាបិទ Flowers Nanobrewery គឺសិប្បកម្មផលិតស្រាតូចមួយ នៅទឹកដីកំពត ដែលកើតចេញពីសុបិនបុរសជប៉ុន យូគី អោថានី។
ពីទីកំណើតក្រុងតូក្យូ រហូតដល់បានរៀនធ្វើការ និងរស់នៅអាមេរិកជាង ៧ ឆ្នាំ យូគី បានសម្រេចចិត្តមកកម្ពុជាកាលពីឆ្នាំ ២០១៥ ដើម្បីបើករោងសិប្បកម្មផលិតស្រាតូចមួយ។
លោកបានប្រាប់ ភ្នំពេញ ប៉ុស្តិ៍ ថា៖ «ខ្ញុំបានព្យាយាមស្វែងរកកន្លែងធ្វើសិប្បកម្មផលិតស្រាតូចមួយ ទាំងនៅជប៉ុន កោះបាលី ក្រុងតៃប៉ិ តៃវ៉ាន់ និងថៃ តែកន្លែងទាំងនោះទាមទារចំណាយ និងថ្លៃបង់ពន្ធខ្ពស់ ការប្រកួតប្រជែងខ្លាំង ហើយច្បាប់ក៏តឹងតែង»។
ការជ្រើសរើសខេត្តកំពតជាទីតាំងផលិតស្រាបៀរ លោក យូគី ថា ព្រោះទីនោះមិនទាន់មានអ្នកផលិតស្រាបៀរស្រស់។ យូគី ក៏មិនមែនជាអ្នកចូលចិត្តធ្វើកាងារប្រកួតប្រជែង ទើបលោកស្វែងរកទីផ្សារថ្មីសម្រាប់ខ្លួនឯង ដោយការផលិតស្រាបៀរស្រស់ៗច្នៃតាមតម្រូវការ ដែលមិនមានកន្លែងណាផ្សេងទៀតធ្វើបែបនេះ។
ហេតុផល ដែលលោកជ្រើសរើសទឹកដីកំពតជាផ្ទះទី២ ត្រូវបានលោកឱ្យដឹងថា៖ «ខ្ញុំឃើញមានតែកម្ពុជាទេដែលបើកចំហបំផុតសម្រាប់ការចាប់ផ្តើមអាជីវកម្មពីជនបរទេស។ វាថែមទាំងមានសមុទ្រស្រស់ស្អាត ហើយពេលមកដល់ខ្ញុំក៏ជាប់ចិត្ត»។
រយៈពេល ១ ឆ្នាំបន្ទាប់ពីលោក យូគី មកដល់កម្ពុជា ទើបលោកអាចបើកសិប្បកម្មផលិតស្រាបាន ដោយសារពីដំបូងរូបលោកក៏មិនទាន់ច្បាស់ពីសម្ភារៈ និងគ្រឿងផ្សំ ដែលទាមទារការកុម្ម៉ង់ទិញពីប្រទេសក្រៅច្រើន។
លោកចាប់ផ្ដើមដោយការជួលផ្ទះមួយមាន ៤ បន្ទប់សម្រាប់ធ្វើជាផ្ទះស្នាក់ និងសាងសង់រោងសិប្បកម្មនៅលើទីធ្លារផ្ទះជាបណ្ដើរៗ។
អំឡុងពេលផលិតសាកល្បង និងឃើញថា ស្រាបៀរនៅមានកម្រិត គុណភាព ហើយរសជាតិក៏ពុំទាន់ទទួលយកបាននៅឡើយ លោកក៏ឆ្លៀតបើកហាងស៊ូស៊ីបណ្ដើរៗ។
កាលណោះកន្លែងរបស់លោកមានលក្ខណៈតូចចង្អៀត និងក៏ឆ្ងាយពីក្រុង ដែលរឹតតែខ្សត់ភ្ញៀវនារដូវវស្សា។ លោកក៏សម្រេចចិត្តលក់ជាលក្ខណៈតូបចល័ត ដោយស្រាបៀរក៏ត្រូវបានប្ដូរមកជាការផលិតច្រកដបវិញ។
ស្ថាបនិកវ័យ ៤៦ ឆ្នាំរូបនេះរំឭកថា៖ «កាលណោះវាជាពេលវេលារីករាយមួយ ប៉ុន្តែមិនងាយស្រួលទេ ទើបបច្ចុប្បន្នខ្ញុំសម្រេចចិត្តបោះបង់ការលក់តាមផ្លូវ ហាង ហើយប្ដូរមកជាអ្នកចែកចាយសម្រាប់តែស្រាបៀរច្នៃតាមតម្រូវការពិសេស»។
អតិថិជនអាចកុម្ម៉ង់រសជាតិ និងគ្រឿងផ្សំតាមចំណូលចិត្ត ហើយពួកគាត់នឹងទទួលបានការច្នៃផលិតស្រាពីស្ថាបនិកជប៉ុន ដែលធានានូវរសជាតិពិសេសគ្មាន ២។
រសជាតិតម្រូវនិស្ស័យចំណូលចិត្តអតិថិជន យូគី ក៏បានសម្គាល់ឃើញថា៖ «អតិថិជនខ្លះក៏ប្រាប់ច្បាស់ ខ្លះក៏មិនច្បាស់ពីអ្វីដែលខ្លួនឯងចង់បាន។ ដូចនេះខ្ញុំមើលទៅបុគ្គលិកលក្ខណៈ ការរស់នៅ អាជីវកម្ម ទីតាំង និងប្រវត្តិរបស់ពួកគេហើយយកផ្សំគ្នាបង្កើតជារូបភាពមួយយកទៅបញ្ជូលក្នុងការផលិតចេញជាស្រាបៀរ»។
លោកបានផលិតចេញជាច្រើនស្ទីល ឬប្រភេទនៃស្រាបៀរមានទាំងរបៀបអង់គ្លេស អាមេរិក ស្រូវសាលី តែលោកផ្ដោតច្រើនទៅលើសមាសធាតុផ្សំរងដូចជា ប្រភេទជីរ ធញ្ញជាតិ កាហ្វេ ម្រេច ស្លឹកគ្រៃ ស្រកានាគ ស្វាយ បាយ ក្រូចឆ្មារ ខ្ញី ទឹកដោះគោជូរ និងបន្លែ ផ្លែឈើជាច្រើនទៀត។
លោក យូគី ឱ្យដឹងដែរថា នៅក្នុងដំណាក់កាលផលិតចម្បង ទាមទារពេលយ៉ាងហោច ៩ ម៉ោង។ លោកត្រូវក្រោកពីម៉ោង ៥ ទៀបភ្លឺ កិនគ្រឿងផ្សំ ដាំទឹក និងដាក់សមាសធាតុទាំងអស់ចូល ហើយយកចិត្តទុកដាក់មើលលើសីតុណ្ហភាព ដាក់វាចូលធុងទុកឱ្យត្រជាក់ ទើបបន្តផ្ទេរទៅធុង សម្រាប់ត្រាំទុក រហូតដល់អាចយកវាមកទទួលទាននៅ ៤ សប្ដាហ៍បន្ទាប់។
លោក យូគី ថា៖ «វាអាចទុកបានអាស្រ័យទៅលើប្រភេទស្រា តែធម្មតា ១ ខែ ឬក្នុងរយៈពេលពេលថ្មីៗគឺល្អជាង តែក៏មានប្រភេទខ្លះទៀតទុកយូរក៏រសជាតិឆ្ងាញ់ ប៉ុន្តែវានឹងប្ដូររសជាតិតាមរយៈកាលដែលយើងរក្សាទុក»។
ទីផ្សារគោលដៅរបស់លោកគឺអ្នកដែលគោរព និងយល់ពីសារៈសំខាន់នៃភាពពិសេសរបស់ស្រាបៀរស្រស់។ ដោយអតិថិជនភាគច្រើនអ្នកនៅក្រុងភ្នំពេញ លោកក៏កំពុងមានគម្រោងផ្លាស់មករាជធានី ដើម្បីងាយស្រួលដល់ការសម្អាតប្រើប្រាស់ដបឡើងវិញ និងកាត់បន្ថយថ្លៃដឹកជញ្ជូន។
លើកឡើងពីតម្លៃស្រាបៀរ លោកបាននិយាយបែបលេងសើចថា៖ «ខ្ញុំលក់ចាប់ពី ២ ដុល្លារ ក្នុង ១ ដប ដើម្បីទូទាត់វិក្កយបត្រ និងបន្តអាជីវកម្ម។ វាគ្មានបានចំណេញអីទេ។ វាក៏មិនដែលធ្វើឱ្យខ្ញុំក្លាយជាអ្នកមានដែរក្នុង ១ ជីវិតរបស់ខ្ញុំ។ ខ្ញុំកំពុងពិចារណាដំឡើងតម្លៃដែរ»។
កន្លងមក យូគី ធ្លាប់បានសហការជាមួយហាងជាទីតាំងសិល្បៈ និងបារ៍ ផ្ដល់បទពិសោធក្រេបរសជាតិស្រាស្រស់ៗដល់ភ្ញៀវទាំងក្នុង និងក្រៅស្រុកនៅទីក្រុងភ្នំពេញ។ លោកសង្ឃឹមអាចបានធ្វើកម្មវិធីបែបនេះជារៀងរាល់ខែ ដើម្បីឱ្យភ្ញៀវបានកាន់តែស្គាល់ពីភាពពិសេសនៃស្រាបៀរស្រស់ៗរបស់លោក និងស្ដាប់មតិយោបល់ពីពួកគេផ្ទាល់ៗ មុននឹងច្រកស្រាបៀរចូលដប។
លោក យូគី បន្តថា៖ «នៅពេលស្ថានភាពកូវីដប្រសើរឡើងផែនការបន្ទាប់នោះខ្ញុំចង់ផលិតស្រាសម្រាប់កម្មវិធីធំៗដូចជាមង្គលការ ព្រោះខ្ញុំចង់ឱ្យប្រជាជនខ្មែរបានស្គាល់ និងដឹងថា រសជាតិស្រាបៀរស្រស់នេះឆ្ងាញ់ និងគួរឱ្យទទួលទានប៉ុណ្ណា។ ខ្ញុំចង់ឱ្យស្រាបៀរច្នៃតាមតម្រូវការរបស់ខ្ញុំទៅដល់អ្នកផ្សេងៗទៀតដែលមិនទាន់ស្គាល់»។
សម្រាប់ព័ត៌មានបន្ថែម Flowers Nanobrewery អាចទំនាក់ទំនងបានតាមទំព័រហ្វេសប៊ុក @FlowersNanobrewery៕