ភ្នំពេញៈ បន្ទាប់ពីមានការកែសម្រួលនូវចំណុចខ្វះខាត ឬលើសលស់នូវអត្ថន័យ ដោយបានទទួលរងការរិះគន់ កាលពីចេញលើកដំបូង និងក្រោយពីបានទិដ្ឋាការទទួលស្គាល់ពីក្រសួងវប្បធម៌ និងវិចិត្រសិល្បៈមកនោះ ផលិតកម្ម ហ្គាឡាក់ស៊ី ណាវ៉ាត្រា បានលក់សិទ្ធិផលិតបន្តបទ «Are You Ok?» ដែលជាការចេញលើកទី២ របស់ខ្លួនទៅឱ្យក្រុមហ៊ុនចិន GESTOS ដើម្បីពង្រីកវិសាល-ភាពនៃវិស័យចម្រៀងសម័យទំនើប។
គួរបញ្ជាក់ដែរថា នៅថ្ងៃទី ២៧ ខែ តុលា ឆ្នាំ ២០២១ ក្រសួងវប្បធម៌ និងវិចិត្រសិល្បៈបានសម្រេចចេញទិដ្ឋាការបទចម្រៀង «Are you ok»? របស់ផលិតកម្ម ហ្គាឡាក់ ស៊ីណាវ៉ាត្រា អាចផលិត MV ខារ៉ាអូខេថ្មីបាន។ លុះបន្ទាប់មកខាងផលិតកម្មក៏បានធ្វើការកែតម្រូវចំណុចខ្វះខាតស្របតាមលក្ខខណ្ឌរបស់ក្រសួង ដោយបទចម្រៀងមួយនេះបានបញ្ចេញ Full MV ផ្លូវការនៅថ្ងៃទី៤ ខែ វិច្ឆិកា ឆ្នាំ ២០២១ ហើយក៏បានបំបែកកំណត់ត្រាថ្មី ក្លាយជាចម្រៀងទី១បង្អស់ក្នុងប្រទេសកម្ពុជា ដែលទទួលបានចំនួន View រហូតដល់ ៤ លានដងក្នុង YouTube ត្រឹមតែ ២៤ ម៉ោងដំបូងប៉ុណ្ណោះ។
អ្វីដែលកាន់តែពិសេសសម្រាប់បទចម្រៀងមួយនេះក៏បានបង្កើតប្រវត្តិសាស្ត្រថ្មីមួយទៀត ដោយបានក្លាយជាចម្រៀងកម្ពុជាដំបូងបង្អស់ដែលត្រូវបានក្រុមហ៊ុនបរទេស ពោលគឺក្រុមហ៊ុនចិនGESTOS បានទិញកម្មសិទ្ធិបញ្ញាយកទៅផលិតបន្តនៅប្រទេសចិន ដោយមានធ្វើសន្និសីទសារព័ត៌មានចុះកិច្ចព្រមព្រៀងទិញលក់រវាងភាគីនៃផលិតកម្ម ហ្គាឡាក់ស៊ី ណាវ៉ាត្រា និងក្រុមហ៊ុនចិន កាលពីថ្ងៃទី ៦ ខែ វិច្ឆិកា ឆ្នាំ ២០២១ កន្លងមក ដែលមានតំណាងខាងក្រសួងវបុ្បធម៌ និងវិចិត្រសិល្បៈចូលរួមជាសក្ខីភាពផងដែរ។
ខណៈលោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ តាមរយៈការអញ្ជើញចូលរួមផ្ទាល់ក្នុងកម្មវិធីសន្និសីទសារព័ត៌មាន ស្តីពីការលក់សិទ្ធិចម្រៀង «Are You Ok?» របស់ផលិតកម្ម Galaxy Navatra ទៅឱ្យក្រុមហ៊ុនចិន GESTOS នោះ លោកបានសម្តែងការកោតសរសើរចំពោះថ្នាក់ដឹកនាំរបស់ផលិតកម្មក្នុងស្រុករបស់កម្ពុជា ដែលបានខិតខំបង្កើតស្នាដៃចម្រៀង រហូតឈានទៅដល់ការនាំយកបទចម្រៀងផលិតដោយស្នាដៃកូនខ្មែរ ទៅកាន់ទីផ្សារប្រទេសចិន ដែលជាទីផ្សារចម្រៀងធំមួយ នៅលើពិភពលោក។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ រូបនេះបានថ្លែងឡើងថា៖ «ខ្ញុំសូមកោតសរសើរ និងវាយតម្លៃខ្ពស់ចំពោះថ្នាក់ដឹកនាំផលិតកម្ម Galaxy Navatra ដែលបានខិតខំយកអស់កម្លាំងកាយចិត្តក្នុងការផលិតស្នាដៃបទចម្រៀងសម្រាប់បម្រើចំណីអារម្មណ៍ទស្សនិកជន តាំងពីដើមរហូតមក។ អ្វីដែលកាន់តែពិសេស និងមានសារៈសំខាន់នាពេលនេះ គឺការខិតខំនាំយកស្នាដៃបទចម្រៀងរបស់យើងឱ្យចូលទៅកាន់ទីផ្សារបរទេសដូចជាប្រទេសចិន ដែលជាទីផ្សារដ៏ធំមួយក្នុងពិភពលោក»។
ដោយឡែកលោកស្រី ប្រ៊ីតនី លី ជានាយិកាប្រតិបត្តិនៃក្រុមហ៊ុនចិន GESTOS បានបង្ហាញពីចំណាប់អារម្មណ៍របស់ខ្លួន ដែលជាការឆ្លើយតបទៅនឹងចម្ងល់មហាជន ក៏ដូចជាក្រុមអ្នកសារព័ត៌មាន ក្នុងស្រុករបស់កម្ពុជានាថ្ងៃប្រារព្ធពិធីចុះកិច្ចព្រមព្រៀងកាលពីថ្ងៃទី ៦ ខែ វិច្ឆិកា ឆ្នាំ ២០២១។ លោកស្រីថ្លែងឱ្យដឹងតាមរយៈការបកប្រែជាភាសាខ្មែរថា៖ «ដោយសារតែបទចម្រៀង «Are You Ok?» មានភាពកម្រនៃទំនុកច្រៀង និងទំនុកភ្លេងនៅក្នុងបទចម្រៀងសម័យទំនើបរបស់ចិនដូច្នេះយើងសម្រេចចុះកិច្ចព្រមព្រៀងទិញបន្តពីផលិតកម្ម ហ្គាឡាក់ស៊ីណាវ៉ាត្រា ដើម្បីយកទៅផលិត និងថត MV ជាបទចម្រៀងរបស់ចិន»៕