ភ្នំពេញ: ក្រឡេកមួយភ្លែត វាមិនខុសអីពីរ៉ឺម៉កអ្នកដំណើរ ឬកង់បីដឹកទំនិញនោះទេ។ តែនៅពេលរបាំងទ្វារស្លាកឈ្មោះហាង «ពេញលេញ» ត្រូវបានបើកឡើង ប្រអប់កញ្ចក់ដាក់គ្រឿងអលង្ការម៉ូដប្លែកៗបំភ្លឺដោយអំពូល និងកញ្ចក់់ឆ្លុះស៊ុមឈើរលោង ហាក់បីដូចជាវេទមន្តធ្វើឱ្យអតិថិជនញញឹមនឹងជាវគ្រឿងអលង្ការចល័ត។
គំនិតច្នៃប្រឌិតថ្មីនេះបំផុសដោយស្ថាបនិកហាង «ពេញលេញ» អ្នកនាង រ៉ាជែល ដតសុន ក្នុងអំឡុងពេលបិទខ្ទប់ ក្រោយពីហាងផ្ទាល់ផ្អាកបើកទ្វារ និងផ្លាស់ប្ដូរជាការលក់អនឡាញ។
អ្នកនាង រ៉ាជែល ប្រាប់ ភ្នំពេញ ប៉ុស្តិ៍ថា៖ «ក្រោយពីសម្រេចចិត្តបិទហាង យើងព្យាយាមរិះរកគំនិតថ្មីៗណាស់។ យើងចង់ឆ្ពោះទៅមុខ និងរក្សាភាពច្នៃប្រឌិត។ ខ្ញុំផ្ទាល់បានរកឃើញការបំផុសគំនិតជាច្រើនក្នុងសិល្បករតន្ត្រី ជាពិសេសទៅលើវីដេអូឯកសាររបស់ តារាចម្រៀង ថេល័រ ស្វីហ្វ និងឃើញពីរបៀបដែលនាងបន្តបង្កើតតន្ត្រីថ្មីៗក្នុងអំឡុងពេលជំងឺរាតត្បាត»។
អ្នកនាងបានបន្តថា៖ «ទន្ទឹមនឹងនោះ ដោយមានអតិថិជនមួយចំនួនបន្តចង់មកលគ្រឿងអលង្ការដោយផ្ទាល់ ខ្ញុំក៏នឹកឃើញបង្កើតរ៉ឺម៉កគ្រឿងអលង្ការចល័ត ហើយបានចាប់ផ្តើមធ្វើគំនូរព្រាង ជាទម្រង់ដែលអាចបម្រើអតិថិជនយើងបានកាន់តែប្រសើរ»។
រ៉ឺម៉កគ្រឿងអលង្ការចល័តនេះ ផ្ដល់មានភាពងាយស្រួល រីករាយ និងសុវត្ថិភាពពីកូវីដ ដល់បណ្ដាភ្ញៀវ។
អតិថិជនអាចប្រាប់ពីម៉ូដអលង្ការ ដែលពួកគេចង់មើល រួចហាងនឹងនាំយកមួយចំនួនបន្ថែម តាមចំណូលចិត្តអតិថិជនឱ្យពួកគាត់អាចជ្រើសរើស។
អ្នកនាង រ៉ាជែល បានឱ្យដឹងថា៖ «តាមរយៈការបង្កើតជម្រើសនេះ អតិថិជនអាចមានឱកាសមើលគ្រឿងអលង្ការ គុណភាព និងម៉ូដ មុនពេលទិញ។ វាជាមធ្យោបាយដ៏ល្អសម្រាប់យើងក្នុងការទាក់ទង និងរក្សាទំនាក់ទំនងជាមួយអតិថិជន ក៏ដូចជាណែនាំពួកគាត់ស្គាល់ពីការលក់អនឡាញរបស់យើងសម្រាប់ការទិញនាពេលអនាគត»។
ហាងមានជម្រើស ២ សម្រាប់ភ្ញៀវទទួលបានបទពិសោធជាមួយរ៉ឺម៉កគ្រឿងអលង្ការចល័ត។ ទី១ គឺការកក់ជាលក្ខណៈឯកជនជាមួយមិត្តភក្តិសម្រាប់រ៉ឺមកនាំយកអលង្ការទៅដល់ផ្ទះ ឬកន្លែងការងារ។ អតិថិជនចាប់ពី ៥ នាក់ឡើង នឹងទទួលបានការបញ្ចុះតម្លៃ ២០ ភាគរយជាក្រុមទាំងមូល។
ទី២ គឺទិញទំនិញបែបផ្ទាល់ខ្លួន។ ភ្ញៀវអាចជ្រើសរើសអលង្ការរហូតដល់ ៥ មុខ តាមរយៈគេហទំព័រហាង www.penhlenh.com ក្នុងការយកទៅសាកល្បងនៅផ្ទះ។ នៅពេលដែលចុចចាកចេញ ពួកគេអាចប្រើលេខកូដ TRYONPP នោះចំនួនសរុប និងការដឹកជញ្ជូនឥតគិតថ្លៃដោយគ្រាន់តែចុចយកកម្ពុជាជាទីតាំង។
ហាង នឹងរៀបចំកំណត់ពេលវេលាជាក់លាក់ក្នុងជំនួបបង្ហាញអលង្ការនៅពេលអតិថិជនធ្វើការកក់រួច។ ពេលនេះ ខាងរ៉ឺម៉ក មានអតិថិជនកក់ជាបណ្ដើរៗ និងបន្តបន្ទាប់។
ស្ថាបនិក ទាំងជាអ្នកច្នៃម៉ូដ និងបង្កើតគ្រឿងអលង្ការរូបនេះថា៖ «យើងទទួលបានមតិយោបល់ដ៏អស្ចារ្យ និងមានភាពសប្បាយរីករាយយ៉ាងខ្លាំង។ សម្រាប់ខែដំបូង នរណាដែលកក់រ៉ឺម៉កយើង នឹងជួបជាមួយយើងទាំង ២ ស្រីម៉ៅ និងខ្ញុំ ដែលធ្វើការបើកនាំទៅដោយផ្ទាល់»។
ជាមួយក្រុមតូចសមាជិកក្រោម ២០ នាក់ អ្នកផលិតអលង្ការហាង ពេញលេញ អាចបង្កើតបានស្នាដៃប្លែកៗគួរឱ្យទាក់ទាញ។ ម៉ូដថ្មីបំផុតដែលពួកគេច្នៃឡើង គឺខ្សែក ខ្សែដៃ ត្បូងលាយជាមួយអង្កាំ និងបន្ដោងទូរស័ព្ទ ភ្ជាប់ដោយអង្កាំពណ៌ស្រស់ៗ សក្ត័សមធ្វើជាកាដូជូនមនុស្សជាទីស្រឡាញ់។
ស្ថាបនិកអាមេរិករូបនេះឱ្យដឹងដែរថា ចំណុចខ្លាំងមួយរបស់ពួកគេនៅ ពេញលេញ គឺការច្នៃប្រឌិតគ្មានទីបញ្ចប់។ ពួកគេមានបំណងចង់ក្លាយជាក្រុមហ៊ុនសកល ដោយផ្ដោតទៅលើការលក់អនឡាញ។
យ៉ាងណាមិញ អាទិភាពសម្រាប់អតិថិជនក្នុងស្រុកនៅតែមានជានិច្ច។
ខណៈពេលនោះ អ្នកនាង រ៉ាជែល បានចែករំលែកនូវគោលដៅរបស់នាងក្នុងការជួយស្ត្រី គឺការផ្តល់នូវការងារ ការបណ្តុះបណ្តាលរយៈពេលវែង ប្រកបដោយនិរន្តរភាព។
អតីតតារាម៉ូដែលនៅអាមេរិករូបនេះបន្ថែមថា៖ «យើងជឿជាក់ថា តាមរយៈការផ្តល់អាទិភាពដល់ការពង្រឹងសេដ្ឋកិច្ចរបស់ស្ត្រី យើងនឹងឃើញពីភាពរីកចម្រើន មិនត្រឹមតែបុគ្គលិកក្នុង ពេញលេញ ប៉ុន្តែទាំងគ្រួសារ និងសហគមន៍របស់ពួកគេផងដែរ។ ពេលនេះក្រៅពីចេះច្នៃគ្រឿងអលង្ការ ពួកគេចេះរបៀបទទួលការកុម្ម៉ង់ ការវេចខ្ចប់ ការត្រួតពិនិត្យគុណភាពផ្សេងៗ»។
ធារី និង ចាន់ថុល បុគ្គលិក ២ នាក់របស់ ពេញលេញ បានប្រាប់ ពីភាពរីករាយ ចំណេះដឹង និងការអភិវឌ្ឍទាំងចិត្តគំនិត និងជំនាញរបស់ពួកគេ។
ធារី ប្រាប់ ភ្នំពេញ ប៉ុស្ដិ៍ថា៖ «មុនចូលមក ពេញលេញ ខ្ញុំគ្មានជំនាញអ្វីទេ តែពេលនេះខ្ញុំអាចបង្កើតគ្រឿងអលង្ការ។ ពេញលេញ ធ្វើឱ្យខ្ញុំទទួលអារម្មណ៍អំណាចភាពជាស្ត្រី ដែលមានការអប់រំ និងជំនាញក្នុងជីវិត»។
រីឯ ចាន់ថុល បានបន្ថែមថា៖ «ខ្ញុំស្រឡាញ់ការងារនៅ ពេញលេញ ព្រោះខ្ញុំស្រឡាញ់គ្រឿងអលង្ការ និងចូលចិត្តរៀនជំនាញ។ វាជាកន្លែងការងារ ដែលផ្តល់សិទ្ធិអំណាចដល់ស្ត្រី និងផ្តល់តម្លៃដល់ការងារ ដែលស្ត្រីធ្វើ។ សំខាន់បំផុតគឺខ្ញុំស្រឡាញ់ពាក្យស្លោក ពេញលេញ ដែលថា «ស្ត្រីជាមាស»»។
អ្នកនាង រ៉ាជែល បានឱ្យដឹងថា ស្រី ម៉ៅ និងនាង នឹងទៅតាមកន្លែងសំខាន់ៗនៅភ្នំពេញ អតិថិជនអាចរង់ចាំតាមដានទិសដៅ រ៉ឺម៉កលក់គ្រឿងអលង្ការចល័តតាមរយៈទំព័រ អ៊ីនស្តាក្រាម ឬទំព័រហ្វេសប៊ុករបស់ពួកគេ @penhlenhdesigns៕