កញ្ញា លន់ គឹមហេង ជាប់វគ្គជម្រុះ ៣០ រូប នៃ Face of Asia 2021។ កញ្ញា លន់ គឹមហេង ជាម្ចាស់ជយលាភីដើរម៉ូដកម្ពុជា ឆ្នាំ ២០២១ (Face of Cambodia 2021)។ រូបថត សហការី
ភ្នំពេញៈ កញ្ញា លន់ គឹមហេង ស្រីស្អាតសាច់សខ្ចីវ័យ ២៤ ឆ្នាំ មកពីខេត្តព្រះវិហារ ដែលជាម្ចាស់ជយលាភីនៃកម្មវិធីដើរម៉ូដកម្ពុជា ប្រចាំឆ្នាំ ២០២១ (Face of Cambodia 2021) នាពេលនេះជាប់ដល់វគ្គជម្រុះ ៣០ រូប នៃកម្មវិធីប្រកួតដើរម៉ូដអន្តរជាតិប្រចាំតំបន់អាស៊ី (Face of Asia 2021) នៃចំណោមបេក្ខភាពចូលរួមសរុបជាង ៨០ រូប មកពី ២៧ ប្រទេស។
តារាម៉ូដែលជាតំណាងប្រទេសនីមួយៗចំនួន ២៧ ប្រទេស ត្រូវបានជ្រើសសម្រាប់ការប្រកួតអន្តរជាតិនៅប្រទេសកូរ៉េខាងត្បូង ដែលគ្រោងនឹងធ្វើនៅថ្ងៃទី ១៨ ខែ ធ្នូ ឆ្នាំ ២០២១។
សម្រាប់ប្រទេសកម្ពុជា ស្រីស្អាតសាច់សខ្ចី កញ្ញា លន់ គឹមហេង ដែលបានឈ្នះជយលាភី កាលពីថ្ងៃទី ៣១ ខែ សីហា ឆ្នាំ ២០២១ កន្លងមកនោះ ក៏បានពុះពារជាប់វគ្គជម្រុះកំពូល ៣០ រូប នៃកម្មវិធីប្រកួតដើរម៉ូដអន្តរជាតិប្រចាំតំបន់អាស៊ី (Top30 in Face of Asia 2021) ផងដែរ បើតាមសារអបអរសាទរពីក្រុមអ្នករៀបចំកម្មវិធីដើរម៉ូដកម្ពុជា កាលពីថ្ងៃទី ៩ ខែ វិច្ឆិកា កន្លងមកនេះ។
លោក ម៉ែន និមលរតន៍ ជានាយកប្រតិបត្តិក្រុមហ៊ុនដើរម៉ូដអន្តរជាតិកម្ពុជា (CIM) និងជាអ្នករៀបចំកម្មវិធីដើរម៉ូដកម្ពុជា ប្រចាំឆ្នាំ ២០២១ (Face of Cambodia 2021) បានសរសេរសារយ៉ាងខ្លីថា៖ «សូមចូលរួមអបអរសាទរកញ្ញា លន់ គឹមហេង ដែលឈានដល់វគ្គជម្រុះ ៣០ រូប នៃកម្មវិធីប្រកួតដើរម៉ូដអន្តរជាតិប្រចាំអាស៊ី»។
បើយោងតាមសេចក្តីជូនដំណឹងពីគេហទំព័រផ្លូវការនៃកម្មវិធីដើរម៉ូដអន្តរជាតិប្រចាំអាស៊ី ឆ្នាំ ២០២១ (Face of Asia 2021) បានឱ្យដឹងថា៖ «តារាម៉ូដែលជាង ៨០ រូប ដែលជ្រើសពីបណ្តាប្រទេសជាសមាជិកនៃតំបន់អាស៊ី ២៧ ប្រទេស។ ពួកគេ នឹងត្រូវទទួលបានការបណ្តុះបណ្តាលរយៈពេល ៤ សប្តាហ៍នៅប្រទេសកូរ៉េខាងត្បូង។ ក្រោយពីចប់វគ្គបណ្តុះបណ្តាលនេះទៅ ពួកគេនឹងអាចក្លាយជាបេក្ខភាពជាប់វគ្គជម្រុះកំពូល ១០ រូប ប្រចាំតំបន់អាស៊ី (Asia TOP10 Global Audition)»។
កម្មវិធីប្រកួតប្រជែងដើរម៉ូដ Face of Cambodia គឺជាជំហានថ្មីមួយ ដើម្បីក្លាយជាតារាម៉ូដែលអាជីព ខណៈកញ្ញា លន់ គឹមហេង បានក្លាយជាម្ចាស់ជយលាភី កាលពីថ្ងៃទី ៣១ ខែ សីហា ឆ្នាំ២០២១ កន្លងមក។ ចំណែកឯក្រុមគណៈកម្មការទាំង ៥ រូប ក៏ជាអតីតតារាម៉ូដែលដែរនោះ គឺជាអ្នកសម្រេចក្នុងការចម្រាញ់ស្វែងរកជយលាភីដើរម៉ូដកម្ពុជា ប្រចាំឆ្នាំ ២០២១ Face of Cambodia 2021។
គណៈកម្មការទាំង ៥ រូបនោះ រួមមានកញ្ញា រ៉េត សារីតា ជាម្ចាស់មកុដកញ្ញាឯកចក្កវាឡកម្ពុជាឆ្នាំ ២០២០ កញ្ញា ផាន់ ផាត់ណា អតីតជាកញ្ញាឯកទូតសុច្ឆន្ទៈ ទេសចរណ៍អាស៊ីអាគ្នេយ៍ឆ្នាំ២០១៥ Miss Southeast Asia Tourism Ambassadors Cambodia 2015 លោក ទ្រី ដារ៉ាវុធ តារាសម្តែង ពិធីករ និងអតីតបេក្ខជនតារាម៉ូដែលនៃកម្មវិធី Man of The Year Cambodia 2019 លោក ឡូ គីន អតីតតារាជាម៉ូដែលកម្មវិធី Face of Cambodia 2019 និងលោក ដូរីកូ អតីតជាតារាម៉ូដែលនៃកម្មវិធីដើរម៉ូដកម្ពុជាឆ្នាំ ២០១៧ Face of Cambodia 2017៕
