.jpg)
រូបភាពពីសៀវភៅប្រលោមលោក The Golden Voice។ សហការី
ភ្នំពេញ: អ្នកស្រី រស់ សាបឿន ជាបងស្រីបង្កើតរបស់រាជិនីសំឡេងមាស រស់ សេរីសុទ្ធា ទើបតែធ្វើពិធីបង្សុកូលឧទ្ទិសកុសលជូនវិញ្ញាណក្ខន្ធប្អូនស្រី ក្រុមគ្រួសារ និងប្រជាជនត្រូវខ្មែរក្រហមសម្លាប់នៅភូមិសំបួរ ឃុំដំបូករូង ស្រុកភ្នំស្រួច។
ទន្ទឹមនឹងពិធីរំឭកខួបអ្នកស្រី រស់ សេរីសុទ្ធា នៅចេតិយខេត្តកំពង់ស្ពឺនេះដែរ នៅឯនាយសមុទ្រឯណោះវិញ សៀវភៅប្រលោមលោកពីជីវិតអ្នកស្រី សេរីសុទ្ធា ត្រូវបានផលិតករអាមេរិកលោក ហ្គ្រេកហ្គោរី ខាហៀល ប្រកាសថា បាននិពន្ធរួចរាល់ហើយ។
ដោយសាររាជិនីសំឡេងមាស រស់ សេរីសុទ្ធា ត្រូវបានជម្លៀសទៅខេត្តកំពង់ស្ពឺ ជាង ៤០ ឆ្នាំមុន អ្នកស្រី សាបឿន បានដាច់ទំនាក់ទំនងទាំងស្រុងជាមួយប្អូនស្រី ដោយឮតែដំណឹងតៗគ្នាពីមាត់មួយទៅមាត់មួយថា ប្អូនស្រីត្រូវខ្មែរក្រហមសម្លាប់។
ទើបតែថ្ងៃទី ៦ វិច្ឆិកា កន្លងទៅនេះអ្នកស្រី សាបឿន បានអញ្ជើញទៅផ្ទាល់ បន្ទាប់ពីបានឃើញការចែករំលែកតគ្នា ពីចេតិយឧទ្ទិសដល់អ្នកស្រី រស់ សេរីសុទ្ធា ដែលបានកសាងរួចរាល់ក្នុងឆ្នាំ២០២០។
អ្នកស្រី សាបឿន ប្រាប់ ភ្នំពេញ ប៉ុស្តិ៍ថា៖ «និយាយទៅខ្ញុំគ្មានចំណែកពាក់ព័ន្ធអីទេ ហើយក៏ទើបទទួលដឹងជាងកន្លះខែ មុនសម្រេចមកធ្វើបុណ្យ។ ខ្ញុំឮសូរប្រកាសថាមានចេតិយដាក់ ខ្ញុំសប្បាយ និងអរណាស់ចង់ទៅឃើញផ្ទាល់។ ពេលទៅដល់ខ្ញុំបានឃើញ លោកធ្វើចេតិយឱ្យដាក់ឈ្មោះ មានរូបថត ធាតុ ដាក់នៅក្នុងកោដ្ឋិ»។
អ្នកស្រីបានបន្តថា៖ «ខ្ញុំបានសូមការអនុញ្ញាតពីមន្ត្រីក្រសួងព្រះបរមវាំងដែលជាអ្នកសាងសង់លក្ខណៈបុគ្គល និងមានថវិកាពីសប្បុរសជននានានោះ មកធ្វើបុណ្យរំឭកខួប ៧៤ ឆ្នាំ ដែលចំថ្ងៃកំណើតគាត់តែម្ដង»។
ក្នុងចេតិយនោះមានម្ដាយឪពុក បងប្អូនទាំង ៤ នាក់ រួមទាំងកូនក្មួយ ៣ នាក់របស់អ្នកស្រី រស់ សេរីសុទ្ធា។
ដោយគោរពតាមវិធានការការពារជំងឺកូវីដ ក្នុងពិធីបុណ្យ មានអ្នកចូលរួមជាង ២០ នាក់ប៉ុណ្ណោះ រួមទាំងមន្ត្រីព្រះបរមរាជវាំង អភិបាលស្រុក អភិបាលខេត្តកំពង់ស្ពឺ អ្នកសិល្បៈ និងបងប្អូន ដែលស្រឡាញ់ចងចាំរាជិនីសំឡេងមាសរូបនេះ។
ចេតិយឧទ្ទិសដល់រាជិនីសំឡេងមាស រស់ សេរីសុទ្ធា និងរូបថតសមាជិកគ្រួសារអ្នកស្រី។ សហការី
លើបណ្ដាញសង្គមហ្វេសប៊ុក ក៏មានការចែករំលែកតៗគ្នាជាច្រើន ពីការចូលរួមរំឭកដល់អ្នកស្រី សេរីសុទ្ធា តាមរយៈការបង្ហោះចម្រៀងល្បីៗ និងស្នាដៃសិល្បៈអ្នកស្រីឡើងវិញ។
ភ្លាមៗនោះដែរលោក ហ្គ្រេកហ្គោរី ខាហៀល អ្នកនិពន្ធអាមេរិកក៏បានបង្ហោះនៅក្នុងផេច «The Golden Voice» ឱ្យដឹងថា រឿងរបស់អ្នកស្រី រស់ សេរីសុទ្ធា ដែលលោកនិពន្ធឡើង ជាប្រលោមលោកគំនូរក្រាហ្វិក ពីខ្សែជីវិត និងតន្ត្រីរបស់អ្នកស្រី តាំងពីឆ្នាំ ២០១៩ បានបញ្ចប់រួចរាល់ហើយ រង់ចាំតែថ្ងៃចេញផ្សាយប៉ុណ្ណោះ។
លោក ហ្គ្រេកហ្គោរី ជាផលិតករកម្មវិធីជជែកកម្សាន្ត The Talk របស់ទូរទស្សន៍ CBS និងម្ចាស់ពានរង្វាន់ Emmy Award បានប្រាប់ ភ្នំពេញ ប៉ុស្តិ៍ ពីដំណើរនាំឱ្យលោកបង្កើតរឿងរបស់អ្នកស្រី រស់ សេរីសុទ្ធា។
លោកបាននិយាយថា៖ «ខ្ញុំបានដក់ចិត្តនឹងសំនៀងរបស់អ្នកស្រី រស់ សេរីសុទ្ធា ក្រោយពីបានតាមដានភាពយន្តបែបស៊ើបអង្កេត «City of Ghosts» ថតនៅកម្ពុជាមានបញ្ចូលបទភ្លេង និងចម្រៀងរបស់អ្នកស្រី។ បន្ទាប់មកខ្ញុំក៏បង្កើតសាច់រឿង The Golden Voice ទាក់ទងនឹងគាត់»។
លោកបន្តថា៖ «ដោយឃើញមានការទទួលជោគជ័យពីអ្នកគាំទ្របរទេសជាច្រើន ខ្ញុំស្នើបង្កើតជាភាពយន្តធំ តែគ្មានអ្នកហ៊ានវិនិយោគ។ ទើបឆ្នាំ ២០១៩ ខ្ញុំក៏បង្កើតគំនិតធ្វើវាជាសៀវភៅប្រលោមលោកគំនូរក្រាហ្វិកតែម្ដង»។
លោកលើកឡើងពីចំណុច ដែលលោកស្រឡាញ់បំផុតពីជីវិតអ្នកស្រី រស់ សេរីសុទ្ធា គឺអ្នកស្រីមានទេពកោសល្យ ដោយគ្មានចិត្តអំនួត។
តំណែងតារាចម្រៀងស្រីលេខ ១ ក្នុងប្រទេស គឺផ្អែកលើទេពកោសល្យរបស់អ្នកស្រី តែមួយគត់ គ្មានសង្គម ឬនយោបាយពាក់ព័ន្ធ។ អ្នកស្រីធំធាត់ក្នុងជីវិតកសិករ ត្រូវបានចិញ្ចឹមដោយម្ដាយ ដែលជាស្ដ្រីមេម៉ាយ ដើរលក់អង្ករ ផ្លែឈើ និងខ្យង។
លោកគិតថា មនុស្សជាច្រើននឹងរំភើបពេលដែលឮសំឡេងអ្នកស្រី។ បទចម្រៀងមនោសញ្ចេតនារបស់អ្នកស្រីជាច្រើនរៀបរាប់ពីឈ្មោះទីកន្លែងនានាដែលធ្វើឱ្យអ្នកស្តាប់ស្រមៃចង់ទៅទីកន្លែងទាំងនោះ។
លោកថា៖ «អ្វីដែលទស្សនិកជនអាចរំពឹងក្នុងប្រលោមលោកគំនូរក្រាហ្វិក ១៨៤ ទំព័រនេះ គឺជាដំណើរជីវិតដ៏អស្ចារ្យ បញ្ចូលជាមួយសាច់រឿង នយោបាយ សង្គ្រាម គ្រួសារ និងទស្សនៈជាច្រើនអំពីធម្មជាតិនៃតន្ត្រី និងតន្ត្រីករ រួមជាមួយបទភ្លេងពេលដែលអ្នកអាន។ យើងពិតជាសំណាងណាស់ ដែលបាន ស៊ីន សេដ្ឋសុជ្ឈតា ចៅ ស៊ីន ស៊ីសាមុត ចូលរួមសរសេរក្នុងសេចក្ដីផ្ដើម»។
ការបោះពុម្ពលើកដំបូងជាភាសាអង់គ្លេស។ យ៉ាងណាមិញ លោកមានគម្រោងជំរុញអ្នកចេញផ្សាយ ធ្វើការបកប្រែជាភាសាខ្មែរ ភាសាបារាំង អាល្លឺម៉ង់ ជប៉ុន ជាដើម។
ពិធីបង្សុកូលឧទ្ទិសដល់អ្នកស្រី រស់ សេរីសុទ្ធា និងរំឭកខួប ៧៤ឆ្នាំ ធ្វើនៅចេតិយក្នុងខេត្តកំពង់ស្ពឺ។ សហការី
លោកថា រស់ សេរីសុទ្ធា មានអ្នកគាំទ្រពេញពិភពលោក។ តាមរយៈអ៊ីនធឺណិត លោកបានជួបអ្នកគាំទ្រ រស់ សេរីសុទ្ធា ពីប្រទេសកូឡុំប៊ី ទៅស៊ុយអែត ដល់សិង្ហបុរី។ លោកមិនភ្ញាក់ផ្អើលទេ ព្រោះតន្ត្រីខ្មែរពីទសវត្សរ៍ទី ៦០ និង ៧០ ជាគ្រាដ៏អស្ចារ្យក្នុងប្រវត្តិសាស្ត្រតន្ត្រី។
បើទោះជាមិនទាន់ជ្រាបច្បាស់ពីកាលបរិច្ឆេទនៃការចុះផ្សាយ ប៉ុន្តែលោក ហ្គ្រេកហ្គោរី បង្ហើបថា ក្នុងឆ្នាំ ២០២២ ហើយលោកក៏សង្ឃឹមថា នឹងចេញផ្សាយជាទម្រង់ឌីជីថល និងជាការបោះពុម្ព។
លោកក៏បានផ្ញើនូវការអរគុណថា៖ «ខ្ញុំពិតជាអរគុណគ្រប់គ្នា ដែលគាំទ្រដំណើររបស់ខ្ញុំក្នុងគម្រោងមួយនេះ ពិសេសគឺអ្នកស្រី សាបឿន បើមិនមានគាត់ក្នុងការត្រួសត្រាយព័ត៌មាន និងការគាំទ្រ គម្រោងយើងក៏មិនអាចកើតឡើងបានដែរ»។
អ្នកស្រី សាបឿន បន្ថែមដែរថា៖ «នាងខ្ញុំក៏សូមថ្លែងអំណរអរគុណយ៉ាងជ្រាលជ្រៅដល់លោកឯកឧត្តម (មន្ត្រីនៅឯព្រះបរមរាជវាំង) លោកមេភូមិ មេឃុំ លោកអាចារ្យ ដែលបានធ្វើឱ្យពិធីបុណ្យនេះប្រព្រឹត្តទៅយ៉ាងរលូន។ សូមអរគុណ ដល់បងប្អូន កូនក្មួយដែលបានចូលរួមពិធីបុណ្យ ព្រមទាំងញាតិមិត្តបងប្អូន ដែលបានផ្ញើបច្ច័យមកចូលរួមផងដែរ។ សូមជូនបុណ្យទាំងអស់គ្នា»។
ព័ត៌មានពីប្រលោមលោកអ្នកស្រី រស់ សេរីសុទ្ធា មាននៅទំព័រហ្វេសប៊ុក @thegoldenvoicemovie៕
