ភ្នំពេញៈ ក្រោយពីបានរៀបចំជោគជ័យចំនួន ២ រដូវកាលរួចមកនោះ កម្មវិធីប្រកួតជ្រើសរើសធីតាឯកសង្ក្រាន្តរដូវកាលទី៣ សម្រាប់ឆ្នាំ ២០២២ កំពុងតែចាប់ផ្តើមទទួលបេក្ខភាពជាបណ្តើរៗ ខណៈប្រាក់រង្វាន់ជយលាភីទទួលបានចំនួន ១២ លានរៀល។
កម្មវិធីប្រកួតជ្រើសធីតាឯកសង្ក្រាន្តត្រូវបានរៀបចំឡើងដោយក្រុមហ៊ុន ហ្វឺស យូណាយ ណេតវើក អេនធើធិនម៉ិន (FUN Entertainment) ដោយមានការសហការ និងគាំទ្រពីខាងក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងអគ្គនាយកដ្ឋានទូរទស្សន៍ជាតិកម្ពុជា ដែលដំណើរការមាន ២ រដូវកាលមកហើយ។
សម្រាប់គោលបំណងនៃការបង្កើតកម្មវិធីប្រកួតជ្រើសរើស «ធីតាឯកសង្ក្រាន្ត» នេះគឺដើម្បីចូលរួមអបអរសាទរនាក្នុងឱកាសបុណ្យចូលឆ្នាំប្រពៃណីជាតិខ្មែរ និងចង់បញ្ជ្រាបនូវចំណេះដឹង អំពីវប្បធម៌អរិយធម៌ ប្រវត្តិសាស្ត្រទាក់ទងនឹងបុត្រីទាំង ៧ អង្គ របស់កបិលមហាព្រហ្ម ដែលនឹងយាងចុះមកគ្រប់គ្រងជម្ពូទ្វីប មានយានជំនិះជាសត្វ តែមិនមែនជាសត្វ-តំណាងឱ្យឆ្នាំទាំង ១២ នោះឡើយ ព្រោះថា បុត្រីកបិលមហាព្រហ្មមាន តែ ៧ អង្គ។
ខណៈលក្ខខណ្ឌនៃការចូលរួម មានសញ្ជាតិខ្មែរ (និយាយភាសាខ្មែរបានច្បាស់ល្អ) ភេទស្រី អាយុចាប់ពី ១៨ ឆ្នាំ ដល់ ២៥ ឆ្នាំ មានកម្ពស់ចាប់ពី ១,៦០ ម៉ែត្រ ឡើងទៅ ដែលមានកម្រិតវប្បធម៌ កំពុងសិក្សាថ្នាក់មធ្យមសិក្សាទុតិយភូមិឡើងទៅ បុគ្គលិកលក្ខណៈ មានកាយសម្បទាល្អ សីលធម៌ល្អ រួសរាយរាក់ទាក់ មានទំនុកចិត្តលើខ្លួនឯង។
ចំពោះការដាក់ពាក្យចូលរួម ត្រូវបំពេញពាក្យសុំចូលរួម (ដោយចុះឈ្មោះអនឡាញតាមរយៈហ្វេសប៊ុកផ្លូវការ ធីតាឯកសង្ក្រាន្ត-Thida Ek Sankrantahttps://www.facebook.com/thida.eksankranta/photos/a.108907064622102/265770078935799/។ បេក្ខនារីត្រូវភ្ជាប់រូបថត ៤x៦ ចំនួន ១ សន្លឹក រូបថត ១ ជំហរខ្លួន ១ សន្លឹក ឯកសារចម្លងច្បាប់ដើមសញ្ញាបត្រមធ្យមសិក្សាទុតិយភូមិ ឬមធ្យមសិក្សាបឋមភូមិ និងឯកសារចម្លងច្បាប់ដើមអត្តសញ្ញាណប័ណ្ណ ឬសំបុត្រកំណើត។
ស្រីស្រស់ ជាតួឯកក្នុងកុនរឿង «នគរមាស» និងរឿង «ដើមរលួសមាស» កញ្ញា សាន្ត កុសុមៈ បានក្លាយជាអ្នកគ្រងមកុដនៃកញ្ញាធីតាឯកសង្ក្រាន្តនារដូវកាលទី២ និងជាអ្នកតំណាងទេពធីតានៃបុត្រីទី៤ កបិលមហាព្រហ្ម ដែលមានព្រះនាមថា «មណ្ឌាទេវី» បានយាងចុះមកគ្រប់គ្រងជម្ពូទ្វីប ឆ្នាំ ២០២១ នេះ។
កញ្ញា សាន្ត កុសុមៈ ក៏ថ្លែងពីអារម្មណ៍ខ្លួនថា៖ «នាងខ្ញុំដឹងថា ពេលនេះ មិនមែនជាឱកាសល្អ ក្នុងការអបអរសាទរទេ ប៉ុន្តែគ្រាន់តែចង់ថ្លែងអំណរគុណទៅដល់បងប្អូន តាមបណ្ដាញសង្គម facebook និង ម៉ាក់ប៉ា បងប្អូនសាច់ញាតិទាំងអស់ដែលតែងគាំទ្រ ជ្រោមជ្រែងលើកទឹកចិត្ត និងផ្ដល់ក្តីស្រឡាញ់ដល់រូបខ្ញុំកន្លងមក។ ការគាំទ្រ និងកម្លាំងចិត្តរបស់អ្នកទាំងអស់គ្នាជាថាមពលធ្វើឱ្យខ្ញុំខិតខំប្រឹងប្រែងកាន់តែខ្លាំង ដើម្បីតំណែងមួយនេះ»៕