ក្រុងវ៉ាស៊ីនតោន៖ អ្នកបង្វឹកផ្នែកសុខភាពមកពីដែនកោះអង់ទីហ្គោ និងបាប៊ូដា បានឈ្នះសំបុត្រ ២ សន្លឹកតម្លៃជិត ១ លានដុល្លារក្នុងការចូលរួមជាមួយភ្ញៀវទេសចរអវកាសដំបូង Virgin Galactic និងត្រៀមខ្លួនចេញដំណើរជាមួយកូនស្រីវ័យជំទង់របស់អ្នកស្រី។
អ្នកស្រី កៃសា ស្កាហាហ្វ អាយុ ៤៤ ឆ្នាំ បាននិយាយថា អ្នកស្រីចង់ដឹកដៃកូនស្រីវ័យ ១៧ ឆ្នាំ ជានិស្សិតវិទ្យាសាស្ដ្ររស់នៅចក្រភពអង់គ្លេសដែលមានក្ដីសុបិនចង់ធ្វើការនៅអង្គការណាសាហោះទៅឋានអវកាស។
ស្ថាបនិក Virgin Galactic លោក រីឆាដ ប្រេនសុន បានពញ្ញាក់អារម្មណ៍អ្នកស្រី ស្កាហាហ្វ ជាមួយការជម្រាបដំណឹងដ៏រីករាយនេះដល់ផ្ទះរបស់អ្នកស្រីនៅការីបៀនកាលពីដើមខែវិច្ឆិកា។
អ្នកស្រីបានប្រាប់ AFP ថា៖ «ខ្ញុំគ្រាន់តែគិតថាខ្ញុំធ្វើបទសម្ភាសតាមកម្មវិធី Zoom ប៉ុណ្ណោះ។ពេលខ្ញុំបានឃើញលោករីឆាតប្រេនសុនដើរចូលមកខ្ញុំចាប់ផ្ដើមស្រែកឆោឡោឡើង។ ខ្ញុំពិតជាមិនជឿខ្លួនឯងសោះ»។
អ្នកស្រីបន្ដថា៖ «ខ្ញុំតែងតែមានចំណាប់អារម្មណ៍ចំពោះអវកាសតាំងពីនៅក្មេង។នេះជាឱកាសដ៏អស្ចារ្យសម្រាប់ខ្ញុំដែលបានសម្រេចក្ដីសុបិន។វាជាដំណើរផ្សងព្រេងដ៏អស្ចារ្យបំផុតក្នុងឆាកជីវិត»។
អ្នកស្រីបានឈ្នះរង្វាន់ក្រោយចូលរួមលេងឆ្នោតរៃអង្គាស ដែលរៀបចំឡើងដោយក្រុមហ៊ុន Virgin Galactic នៅលើប្លាតហ្វម Omaze ដែលរៃបាន ១,៧ លានដុល្លារ។
ទឹកប្រាក់នោះនឹងផ្ដល់ឱ្យក្រុមអង្គការក្រៅរដ្ឋាភិបាល អវកាសសម្រាប់មនុស្សធម៌ដែលមានបេសកកម្មផ្ដល់លទ្ធភាពទៅកាន់ឋានអវកាស។ ទឹកប្រាក់ដែលអ្នកស្រីបរិច្ចាគមិនត្រូវបានប្រកាសជាសាធារណៈទេតែសប្បុរសជនម្នាក់ៗត្រូវបរិច្ចាគប្រាក់ចាប់ពី ១០ ដុល្លារ។
អ្នកស្រី ស្កាហាហ្វ ជាអ្នកបង្វឹកផ្នែកសុខភាព និងថាមពលដែលធ្វើការងារផ្ទាល់ជាមួយស្ដ្រីបានសម្រេចចិត្ដចូលរួមលេងឆ្នោតផ្សងសំណាងនេះក្រោយបានឃើញការផ្សព្វផ្សាយនៅលើការហោះហើររបស់ Virgin Atlantic។
អ្នកស្រីបានបន្ដថា៖ «ខ្ញុំគ្រាន់តែបំពេញទម្រង់បែបបទទៅតាមការទាមទារដោយមិនបានដឹងថាខ្ញុំត្រូវបានជ្រើសរើសជាអ្នកឈ្នះរង្វាន់នេះសោះ។ ខ្ញុំពិតជាមានទឹកចិត្ដក្នុងការជំរុញឱ្យអ្នកដទៃបន្ដមានក្ដីសង្ឃឹមលើសុបិនរបស់ខ្លួន»។
យោងតាម Virgin Galactic បានបង្ហាញថា ការលើកទឹកចិត្ដនេះទាក់ទាញអ្នកចូលរួមជិត ១៦៥ ០០០ នាក់ ក្នុងរយៈពេល ៨ សប្ដាហ៍»៕ AFP/HR