.jpg)
មេចុងភៅបារាំង ដានីញ៉ែល ប៊ូលូដ ត្រូវបានផ្ដល់រហស្សនាមជាម្ចាស់ភោជនីយដ្ឋានឆ្នើមបំផុតក្នុងពិភពលោក។ AFP
ក្រុងញូវយ៉ក៖ មេចុងភៅជនជាតិបារាំង ដានីញ៉ែល ប៊ូលូដ ដែលរស់នៅក្នុងទីក្រុងញូវយ៉កជិត ៤០ឆ្នាំ ត្រូវបានផ្ដល់រហស្សនាមជាម្ចាស់ភោជនីយដ្ឋានឆ្នើមបំផុតក្នុងពិភពលោក ដោយសមាគមភោជនីយដ្ឋាន Les Grandes Tables du Monde ចំពោះយីហោភោជនីយដ្ឋាន «Daniel»។
សមាគមភោជនីយដ្ឋានពិភពលោកកំពូលទាំង១៨៤ បានឱ្យដឹងថា មេចុងភៅមកពីក្រុងលីយ៉ុង ដែលប្ដូរមកនៅក្រុងញូវយ៉កក្នុងឆ្នាំ១៩៨២ តំំណាងឱ្យពលរដ្ឋអាមេរិកខាងជើងជាច្រើននូវសិល្បៈម្ហូបបារាំង ឬសិល្បៈម្ហូបសកល។
លោក ប៊ូលូដ អាយុ ៦៦ឆ្នាំ ចាត់ទុកមុខម្ហូបរបស់លោកជាសិល្បៈម្ហូបបារាំង តែប្រើផលិតផល និងរសជាតិបែបអាមេរិក។ ក្រៅពី «Daniel» ដែលទទួលផ្កាយ២ ពីMichelinក្នុងក្រុងញូវយ៉កមេចុងភៅរូបនេះក៏មានភោជនីយដ្ឋានច្រើនទៀតនៅសហរដ្ឋអាមេរិកកាណាដាឌូបៃសិង្ហបុរីនិងបាហាម៉ាស។
លោក ប៊ូលូដ បានប្រាប់ AFP ក្រោយព័ត៌មានបានផ្ទុះឡើងថា បណ្ណកិត្ដិយសដ៏ច្រើនសន្ធឹកសន្ធាប់តំណាងឱ្យការឧទ្ទិសដល់អ្នកជំនាញ ក៏ដូចជាតំណាងឱ្យមិត្ដភក្ដិ និងការគាំទ្រពីសហការីក្នុងបរិស្ថានដ៏ប្រកួតប្រជែង និងសម្ពាធខ្ពស់។
មិនខុសពីអ្នកក្រុងញូវយ៉កដទៃទៀត លោក ប៊ូលូដ ទទួលបានកិត្ដិនាមល្បីរន្ធឺអំឡុងវិបត្ដិកូវីដ១៩ ដែលបានសម្លាប់មនុស្សយ៉ាងតិច ៣៤០០០នាក់នៅក្នុងទីក្រុងលោករស់នៅ។
លោក ប៊ូលូដ អាយុ ៦៦ឆ្នាំ ចាត់ទុកមុខម្ហូបរបស់លោកជាសិល្បៈម្ហូបបារាំង តែប្រើផលិតផល និងរសជាតិបែបអាមេរិក។ AFP
ភោជនីយដ្ឋានរបស់លោកមួយចំនួនត្រូវបិទទ្វារ តែ «Daniel» នៅតែបន្ដ ដោយរៀបចំកន្លែងតាមរបៀងចិញ្ចើមផ្លូវជាមួយការដំឡើងម៉ាស៊ីនកម្ដៅក្នុងរដូវរងា ក៏ដូចជាការបើកម៉ាស៊ីនត្រជាក់ និងសំឡេងតន្ដ្រីនៅរដូវក្ដៅសម្រាប់ក្រុមអ្នកគាំទ្រផ្កាប់មុខ។
ដោយងើបពីវិបត្ដិកូវីដបណ្ដើរៗ លោក ប៊ូលូដ គិតថា ក្រុងញូវយ៉កនឹងនៅតែជាទីក្រុងគោលដៅដ៏ទាក់ទាញបំផុតមួយក្នុងពិភពលោក ហើយនឹងតែងតែជាទីកន្លែងដែលអតិថិជនពេញចិត្ដនឹងម្ហូបអាហារសិល្បៈបារាំង។
ទីក្រុងសេដ្ឋកិច្ច និងវប្បធម៌របស់សហរដ្ឋអាមេរិក និងចម្រុះជាតិសាសន៍ប្រមាណ ៨,៥លាននាក់ ញូវយ៉កគឺជាមូលដ្ឋានរបស់ភោជនីយដ្ឋានបារាំងចំនួន ១៨៣។ នេះបើយោងតាមស្ថានកុងស៊ុលបារាំង។
«សេចក្ដីស្រឡាញ់» ក្នុងក្រុងញូវយ៉ក ហើយបច្ចុប្បន្នជាពលរដ្ឋអាមេរិកម្នាក់ លោក ប៊ូលូដ នៅតែជា «កំពូលមេចុងភៅបារាំងនៅទឹកដីសហរដ្ឋអាមេរិក» ដោយអរគុណដល់មុខម្ហូប ដែលរំលេចនូវអត្ដសញ្ញាណបារាំង តែលោកនៅបន្ដអភិវឌ្ឍថ្មីៗឥតឈប់ឈរ។
យោងតាមភោជនីយដ្ឋានរបស់លោកបានបង្ហាញថា តម្លៃក្នុងការទទួលទានអាហារពិសេស ១ពេលគឺប្រមាណ ៣០០ដុល្លារ រួមទាំងស្រាទំពាំងបាយជូរ និងសេវាកម្ម។
លោក ប៊ូលូដ ដែលពេលនេះកំពុងត្រៀមរង់ចាំវត្ដមានភ្ញៀវទៅពីអាស៊ី និងអឺរ៉ុបនោះ បានបន្ដថា៖ «អតិថិជនចង់បានភាពរីករាយ ភ្លក្សរសជាតិស្រា ហើយពួកគេចង់ចេញក្រៅច្រើន។ យើងតែងតែជួបពួកគាត់ជារឿយៗ»៕ AFP/HR
លោកបានរស់នៅក្នុងទីក្រុងញូវយ៉កជិត ៤០ឆ្នាំ ដោយបង្កើតស្លាកយីហោភោជនីយដ្ឋាន «Daniel»។ AFP
