.jpg)
ការសម្ដែងល្ខោនស្បែកធំ និងការសម្តែងសិល្បៈល្ខោនខោល នឹងបង្ហាញក្នុងមហោស្រពសិល្បៈអន្តរជាតិអង្គរឆ្នាំ ២០២១ នៅខេត្តសៀមរាប។ រូបថត ហ្វេសប៊ុក
ក្រុងសៀមរាបៈ ក្រសួងវប្បធម៌ និងវិចិត្រសិល្បៈ នឹងបើកសម្ពោធ ដំណើរការកម្មវិធីមហោស្រពសិល្បៈអន្តរជាតិឆ្នាំ ២០២១ នៅមុខប្រាសាទអង្គរវត្ត ដែលមានការចូលរួមពីបណ្តាឯកអគ្គរាជទូត និងឯកអគ្គរដ្ឋទូតអាស៊ាន ឥស្សរជន និងក្រុមអាជ្ញាធរតំបន់នានា នៅថ្ងៃសុក្រ ទី ១០ ខែធ្នូ។
កម្មវិធីមហោស្រពនឹងប្រព្រឹត្តទៅរយៈពេល ៣ ថ្ងៃ នៅទីកន្លែងផ្សេងៗ ក្នុងខេត្តសៀមរាប ដែលចាប់ផ្តើមពីថ្ងៃទី ១០ ដល់ទី ១២ ខែ ធ្នូ ឆ្នាំ ២០២១ ខណៈមានក្រុមហ៊ុនក្នុងស្រុកជាច្រើន កំពុងរួមគ្នាផ្តល់ការគាំទ្រដល់ខេត្តដែលជាបណ្តុំទីតាំងទេសចរណ៍មួយនេះត្រូវការជំនួយគាំទ្រ ដើម្បីរៀបចំមហោស្រពសិល្បៈអន្តរជាតិអង្គរឆ្នាំ ២០២១ (Angkor International Festival of the Arts 2021)។
មហោស្រពសិល្បៈអន្តរជាតិអង្គរនេះនឹងមានការសម្តែងសិល្បៈចម្រុះពីក្រុមសិល្បករ-សិល្បការិនី តន្ត្រីករ អ្នកគូរគំនូរ អ្នកនិពន្ធ និងអ្នករបាំ ជាមួយនឹងបណ្តុំនៃទស្សនីយភាពនានា មានល្ខោនស្រមោល (ស្បែកធំ) ការសម្ដែងក្បាច់គុនល្បុក្កតោ ចាប៉ីដងវែង ឧបករណ៍ភ្លេងផ្លយ ការគូរគំនូរផ្ទាល់ ការតាំងពិព័រណ៍គំនូរ ការសម្តែងល្ខោនខោល និងមានការបង្ហោះខ្លែងប្រពៃណីជាតិ នៅខាងមុខប្រាសាទអង្គរវត្ត ផងដែរ។
អ្នករៀបចំមហោស្រពនេះ ដែលមានតំណាងដោយក្រុមហ៊ុន Cambodian Arts and Festival Enterprise Co. Ltd មានកិច្ចសហការផ្នែកសិល្បៈ បច្ចេកទេស និងរដ្ឋបាលជាមួយនឹងក្រសួងវប្បធម៌ និងវិចិត្រសិល្បៈដើម្បីអបអរសាទរការដាក់ខេត្តសៀមរាប ជាទីក្រុងវប្បធម៌អាស៊ាន ឆ្នាំ ២០២០-២០២២។
ការបង្ហោះខ្លែងបែបប្រពៃណី។ រូបថត ហ្វេសប៊ុក
ក្រុមហ៊ុន និងស្ថាប័ន ដែលផ្តល់ការគាំទ្រដល់ព្រឹត្តិការណ៍នេះ ក្នុងនាមជាអ្នកឧបត្ថម្ភ រួមមានធនាគារកាណាឌីយ៉ា ធនាគារហ្វីលីព សហព័ន្ធស្វ៊ីស មូលនិធិវប្បធម៌ និងទេសចរណ៍ Chengdu និងសហភាពអឺរ៉ុបជាដើម។
លោក Aaron Carpene ជាអគ្គនាយក និងជានាយកផ្នែកសិល្បៈនៃមហោស្រពសិល្បៈអន្តរជាតិអង្គរបានថ្លែងថា៖ «យើងទាំងអស់គ្នាដឹងហើយថា ដោយសារការរាតត្បាតជំងឺកូវីដ ១៩ ខេត្តសៀមរាបបានទទួលរងគ្រោះយ៉ាងខ្លាំង។ ទោះជាយ៉ាងណា ព្រឹត្តិការណ៍នេះ នឹងមិនត្រឹមតែជួយដល់ឧស្សាហកម្មទេសចរណ៍ប៉ុណ្ណោះទេ ប៉ុន្តែវាក៏ជាការដឹងគុណដ៏ស័ក្តិសមដល់កេរមរតកវប្បធម៌របស់កម្ពុជា និងទស្ស-នីយភាពសិល្បៈក្នុងស្រុកផង-ដែរ ក្នុងពេលមួយ ដែលកម្ពុជាបានក្លាយជាប្រធានអាស៊ាន ហើយខេត្តសៀមរាប បានក្លាយជាទីក្រុងវប្បធម៌អាស៊ានឆ្នាំ ២០២០-២០២២»។
លោក Aaron Carpene បន្ថែមថា៖ «យើងសង្ឃឹមថា មហោស្រពសិល្បៈអន្តរជាតិឆ្នាំ ២០២១ នេះ នឹងជួយជំរុញភ្ញៀវទេសចរ ឱ្យវិលមកទស្សនាខេត្តសៀមរាបឡើងវិញ។ ដូច្នេះ ក្រុមហ៊ុនដែលគាំទ្រព្រឹត្តិការណ៍នេះ នឹងមានន័យថា ក៏កំពុងគាំទ្រដល់រដ្ឋាភិបាល និងប្រជាពលរដ្ឋកម្ពុជា ឱ្យវិលមករកភាពធម្មតា និងស្ទុះងើបឡើងវិញពីការរាតត្បាតជំងឺកូវីដវិញផងដែរ»៕
ការលេងឧបករណ៍ភ្លេងផ្លយ។ រូបថត ហ្វេសប៊ុក
