បាត់ដំបង: កាលពីរសៀលថ្ងៃទី ២០ ខែវិច្ឆិកា មនុស្សរាប់ពាន់នាក់ប្រមូលផ្តុំគ្នាទាំងផ្ទាល់នៅបរិវេណសាលាហ្វារពន្លឺសិល្បៈ និងតាមអនឡាញ ដើម្បីអបអរសាទរជីវិតសិល្បៈលោក ស្រី បណ្តូល ជាសហស្ថាបនិកនៃសមាគមហ្វារពន្លឺសិល្បៈ ដែលលោកបានចូលរួមបង្កើតឡើងតាំងពី ២៧ ឆ្នាំមុន។
ក្នុងថ្ងៃតែ ១ ក្រុមគ្រួសារលោកបានសហការជាមួយអ្នកអភិរក្សផ្នែកសិល្បៈ លោក យាន រស្មី ដើម្បីសម្រេចបំណងប្រាថ្នារបស់លោក ក្នុងការបើកវិចិត្រសាលសិល្បៈ និងរៀបចំពិព័រណ៍សិល្បៈ ដើម្បីដាក់តាំងស្នាដៃសិល្បៈថ្មីៗនៅផ្ទះរបស់លោកផ្ទាល់ ទីតាំងនៅជាប់នឹងបរិវេណសាលាហ្វារតែម្ដង។
លោក បណ្តូល បានទទួលមរណភាពក្នុងវ័យ ៤៩ ឆ្នាំ នៅខែសីហា ឆ្នាំនេះដោយសារជំងឺកូវីដ ដែលបានបន្សល់ទុកនូវភាពសោកសង្រេង និងមានការរៀបចំពិធីឧទ្ទិសកុសលពីមនុស្សជុំវិញពិភពលោកជូនចំពោះលោក ដែលជាអ្នកជួយស្ដារវិស័យសិល្បៈ និងវប្បធម៌កម្ពុជាក្រោយពីសង្គ្រាម។
អ្នកនាង ម៉ហ្គេន ដារ៉ាស ជាអ្នកសម្របសម្រួលទំនាក់ទំនងនៅហ្វារ ប្រាប់ ភ្នំពេញ ប៉ុស្តិ៍ថា៖ «ស្នាដៃសិល្បៈមួយចំនួនរបស់លោកគ្រូ បណ្តូល ត្រូវបានដាក់តាំងនៅក្នុងកន្លែងតាំងពិព័រណ៍សិល្បៈរបស់ហ្វារផងដែរ ដែលស្ថិតនៅខាងក្នុងអគារឈើរបស់យើង»។
ដារ៉ាស បន្តថា៖ «លើសពីការប្រារឰពិធីគោរពវិញ្ញាណក្ខន្ធជូនចំពោះលោកគ្រូ បណ្តូល យើងក៏ចង់ឱ្យព្រឹត្តិការណ៍នេះលេចធ្លោឡើងជាមួយនឹងសិល្បៈ និងធ្វើឱ្យកេរដំណែលរបស់លោកគ្រូបានទៅដល់សហគមន៍ រួមទាំងបន្តលើកទឹកចិត្តយើងជារៀងរាល់ថ្ងៃ»។
ព្រឹត្តិការណ៍នេះបានបញ្ចប់ដោយការអុចភ្លើងទៀនចំនួន ២៥០ ដើម ដើម្បីបំភ្លឺផ្កាឈូកដ៏ធំមួយ រចនាឡើងនៅចំកណ្តាលបរិវេណសាលាហ្វារ។ គោមក្រដាសត្រូវបានដុតបង្ហោះលើមេឃា អមដោយពន្លឺហ្វូងតារាព្រោងព្រាត ដើម្បីបង្ហាញការអបអរសាទរ និងទទួលយកការបួងសួងពីភ្ញៀវ ដែលមានវត្តមានទាំងអស់។
ពិធីគោរពវិញ្ញាណក្ខន្ធនេះមានភ្ញៀវចូលរួមដោយផ្ទាល់ប្រហែល ៥០០ នាក់ និងមនុស្សជាង ៧ ០០០ នាក់ទៀតបានចូលរួមតាមអនឡាញ។
យោងតាមអ្នករៀបចំបានឱ្យដឹងថា ការប្រារឰពិធីគោរពវិញ្ញាណក្ខន្ធនេះមានកម្មវិធីប្រពៃណីជាច្រើន ដូចជា ការរំឭកអនុស្សាវរីយ៍ ដែលបានចែករំលែកដោយក្រុមគ្រួសាររបស់លោក បណ្ដូល កំណាព្យ ចម្រៀង ផ្សាយផ្ទាល់ការគូរគំនូរ ការសម្តែងសៀក និងសម្តែងរបាំ ដែលបានបង្ហាញឱ្យឃើញអំពីទេពកោសល្យសិល្បៈ ដែលលោកបានជួយបណ្តុះបណ្តាលនៅទូទាំងប្រទេសកម្ពុជា។
អ្នកស្រី អួន ចាន់សោភ័ណ ភរិយារបស់លោក បណ្ដូល ថ្លែងទាំងស្រណោះស្រណោកក្នុងពិធីនោះថា៖ «គាត់ជាបុរសម្នាក់ ដែលតែងតែផ្តល់ដំបូន្មាន ផ្ដល់ភាពរីករាយ និងកក់ក្តៅ ដល់អ្នកជុំវិញគាត់។ អ្វីដែលគាត់ធ្វើបាន គាត់នឹងធ្វើ។ គាត់ធ្វើគ្រប់យ៉ាងដោយមិនគិតពីពេលវេលារបស់ខ្លួន ជាពិសេសសម្រាប់គ្រួសារហ្វារ»។
អ្នកស្រីបានបន្តថា៖ «គាត់បានចាត់ទុកហ្វារជាផ្ទះទី២ របស់គាត់។ គាត់ធ្លាប់ប្រាប់ខ្ញុំជាញឹកញាប់ថា គាត់ចង់ឃើញហ្វាររីកលូតលាស់ធំឡើងរហូតទៅ គាត់មិនចង់បាត់បង់វាទេ។ សេចក្ដីស្រឡាញ់របស់គាត់ចំពោះហ្វារ មិនអាចពិពណ៌នាបានឡើយ»។
លោក អូស្មាន់ ខាវ៉ាចា ជានាយកប្រតិបត្តិនៃអង្គការហ្វារពន្លឺសិល្បៈ បាននិយាយថា លោករីករាយណាស់ដែលក្រុមការងារបានមករួមគ្នា ក៏រំភើបចំពោះវត្តមានលោក សុខ លូ អភិបាលនៃគណៈអភិបាលខេត្តបាត់ដំបង ដែលចូលរួមអបអរសាទរ ក៏ដូចជាការបរិច្ចាគរបស់លោកដល់ជីវិតសិល្បៈ និងស្នាដៃសិល្បៈរបស់លោក បណ្តូល។
លោក ខាវ៉ាចា បានឱ្យដឹងថា៖ «យើងទន្ទឹងរង់ចាំធ្វើការជាមួយគ្នាយ៉ាងជិតស្និទ្ធ ក្នុងការធ្វើឱ្យខេត្តបាត់ដំបងក្លាយជាទីក្រុងសិល្បៈ និងវប្បធម៌នៃប្រទេសកម្ពុជា»។
លោក ស្រី បណ្តូល បានចំណាយពេលស្ទើរតែពេញមួយជីវិតរបស់លោក ដើម្បីអភិវឌ្ឍសាលាសិល្បៈជំនាញសូន្យរូបហ្វារ ក្នុងខេត្តបាត់ដំបង ដែលក្រោយមកបានក្លាយជាប្រភពធនធានមួយសម្រាប់សហគមន៍សិល្បៈនៅទូទាំងប្រទេសកម្ពុជា។
នៅពេលលោក បណ្ដូល នៅមានជីវិត លោកមានក្ដីស្រមៃចង់ឱ្យផ្ទះរបស់លោកប្រែក្លាយជាវិចិត្រសាល និងចង់ដាក់ឈ្មោះតាមកូនស្រីច្បងរបស់លោក ដែលមានឈ្មោះថា «ធិតាភេត្រា»។
លានសិល្បៈសហសម័យភេត្រា នេះមានបេសកកម្មផ្សព្វផ្សាយ លើកកម្ពស់ និងគាំទ្រស្នាដៃសិល្បៈលក្ខណៈផ្ទាល់ខ្លួន ដែលដកស្រង់បទពិសោធចេញពីទម្រង់សិល្បៈ និងប្រធានរឿងផ្សេងៗ។ វិចិត្រសាល នឹងចាប់យកគុណភាព និងឧត្តមភាពក្នុងការអនុវត្ត ដែលស្ញប់ស្ញែងចំពោះសិល្បៈសហសម័យ។
អ្នកអភិរក្សផ្នែកសិល្បៈ និងជាអ្នករៀបចំកម្មវិធី នៅវិចិត្រសាលសិល្បៈត្រជាក់ភ្នែក លោក យាន រស្មី ឱ្យដឹងថា៖ «ខ្ញុំបានធ្វើការជាមួយលោកគ្រូ ស្រី បណ្ដូល ដើម្បីប្រែក្លាយទីធ្លាជាន់ក្រោមនៃផ្ទះរបស់គាត់ទៅជាវិចិត្រសាល ដែលពួកយើងនឹងគ្រប់គ្រង ដោយមានខ្ញុំផ្ទាល់ជាអ្នកមើលការខុសត្រូវគ្រប់កម្មវិធី និងការតាំងពិព័រណ៍ ដែលត្រូវដាក់បង្ហាញនៅវិចិត្រសាល។ កិច្ចសហការនេះធ្វើឡើងតាមរយៈក្របខ័ណ្ឌរបស់ វិចិត្រសាល សិល្បៈត្រជាក់ភ្នែក»។
ការតាំងពិព័រណ៍នោះបានបង្ហាញអំពីស្នាដៃសិល្បៈចុងក្រោយរបស់សហស្ថានិកអង្គការហ្វារ លោក ស្រី បណ្ដូល ក្រោមចំណងជើងថា «សំបុត្រ៖ សន្តិភាព ប្រធានវិស័យភាព និងអំណាច»។
ស្នាដៃសិល្បៈចុងក្រោយនេះ បានបង្ហាញរូបភាពមេដឹកនាំនយោបាយជាតិ និងអន្ដរជាតិ ជាមួយតួអង្គអប្សរា និងសត្វព្រាបស ដែលតួអង្គតំណាងសិល្បៈវប្បធម៌រូបនេះបានហុចស្រោមសំបុត្រដល់មេដឹកនាំនីមួយៗ ដោយចង់បង្ហាញអត្ថន័យពីទម្រង់សិល្បៈ សកម្មភាព និងចេតនាជុំវិញការផ្ដល់ និងទទួលយកអ្វីមួយក្នុងពេលប្រតិបត្ដិ អភិវឌ្ឍ និងបង្ហាញឱ្យឃើញក្នុងទំនាក់ទំនងបុគ្គល វិជ្ជាជីវៈ និងនយោបាយប្រចាំថ្ងៃរបស់យើង។
អ្នកនាង ម៉ហ្គេន ដារ៉ាស បានបញ្ចប់ថា៖ «យើងពិតជាដឹងគុណយ៉ាងក្រៃលែងចំពោះលោកគ្រូ បណ្តូល ដែលបានប្រែការឈឺចាប់ក្នុងវ័យកុមាររបស់លោកឱ្យក្លាយទៅជាបេសកកម្មមួយ ដែលអាចស្តារឡើងវិញនូវអំណោយនៃសិល្បៈ វប្បធម៌ ការអប់រំ និងការច្នៃប្រឌិតដល់ប្រជាជនកម្ពុជា។ យើងសន្យាថានឹងបន្តការងាររបស់លោក ដែលលោកតែងតែប្រកាន់ខ្ជាប់នូវការផ្តល់ឱ្យទៅកាន់អ្នកដទៃ»៕