.jpg)
MV បទ «វីរនារី-Top of The Lady» ទេព បូព្រឹក្ស ១ ថ្ងៃ មានអ្នកគាំទ្រ ១ លានដង។ កញ្ញា ទេព បូព្រឹក្ស ក្នុងឈុត អប្សរានាគ ក្នុង MV បទថ្មី «វីរនារី»។ រូបថត ហ្វេសប៊ុក
ភ្នំពេញៈ ទើបតែបំបែកនូវកំណត់ត្រា ចាយលុយច្រើន ក្នុងការផលិតបទចម្រៀងថ្មី ១ បទ ដែលប្រើដើមទុន ៦០០ លានរៀល កាលពីប៉ុន្មានថ្ងៃមុននោះ ស្រាប់តែការចេញ MV ថ្មីបទ « វីរនារី-Top of The Lady» របស់កញ្ញា ទេព បូព្រឹក្ស ផ្ទុះការគាំទ្រយ៉ាងច្រើនសន្ធឹកសន្ធាប់ ដោយស្រូបបានអ្នកទស្សនាចំនួន ១ លានដង ក្នុងរយៈពេលត្រឹមតែ ១ ថ្ងៃ ប៉ុណ្ណោះនៅលើបណ្តាញសង្គមយូធូប។
នេះបើតាមការអះអាងរបស់កញ្ញា ទេព បូព្រឹក្ស តាមហ្វេសប៊ុក ដែលបង្ហាញនូវទិន្នន័យនៃអ្នកគាំទ្រមានចំនួន ១ លានដង (1M Viewers) កាលពីថ្ងៃទី ២៨ ខែ វិច្ឆិកា ឆ្នាំ ២០២១ ខណៈ MV បទថ្មីរបស់ខ្លួន បង្ហោះចូលក្នុងបណ្តាញសង្គមនៅថ្ងៃទី ២៧ ខែវិច្ឆិកា នោះ។ កញ្ញា ទេព បូព្រឹក្ស បង្ហើរសារថា៖ «មកទីនេះ និយាយដោយមោទនភាព អរគុណដល់បងប្អូនអ្នកគាំទ្រទាំងអស់គ្នា សម្រាប់ការ stream MV វីរនារី ឱ្យទទួលបានការចូលមើលរហូតដល់ទៅ ១ លានដង ក្នុងរយៈពេល ២៤ ម៉ោង ក្នុង YouTube។ ដើម្បីជាការឆ្លើយតប ពួកយើងនឹងធ្វើការបន្ថែម subtitled ជាច្រើនភាសាបន្ថែមទៀត ដើម្បីឱ្យកាន់តែមានភាពទូលំទូលាយ»។
កាលថ្ងៃទី ១៦ ខែ វិច្ឆិកា ឆ្នាំ ២០២១ កន្លងមក បានបំបែកនូវភាពស្ងប់ស្ងាត់របស់តារាចម្រៀងស្រីពូកែក្បាច់រាំ និងស្ទីលតែងខ្លួនប្លែកៗ កញ្ញា ទេព បូព្រឹក្ស ដែលបានលក់រថយន្តផ្ទាល់ខ្លួន ដើម្បីយកប្រាក់ប្រមាណ
៦០០ លានរៀល មកផលិតនូវវីដេអូចម្រៀងថ្មីប្លែកភ្នែក ដោយគ្រាន់តែជាឃ្លីបខ្លីដកស្រង់បទថ្មីមានចំណងជើងថា «វីរនារី-Top of The Lady» ធ្វើឱ្យអ្នកគាំទ្រលាន់មាត់សរសើរថា ក្រោយពីបានទស្សនាហើយព្រឺសម្បុរ និងការរង់ចាំពិតជាមិនខុសបំណងឡើយ។
នាពេលថ្មីៗនេះ មានការបញ្ចេញសារពីក្រុមអ្នកផាត់មុខសម្រាប់ការសម្តែង MV បទ «វីរនារី» ដោយបង្ហើបពីការពេញចិត្តនូវចំនួនទឹកប្រាក់ជាថ្លៃពលកម្មរបស់ខ្លួនផងដែរ។
ចេញពីគណនីហ្វេសប៊ុកឈ្មោះ Mu Zu Make Up បានឱ្យដឹងថា៖ «មិនដឹងថា និយាយយ៉ាងណាឱ្យសមទេ ដឹងត្រឹមថា រំភើបសប្បាយចិត្តជាខ្លាំង តាំងពីថ្ងៃដំបូង ដែលបានផាត់មុខជូនបងស្រី ទេព បូព្រឹក្ស គាត់ជាមនុស្សម្នាក់ដែលឱ្យតម្លៃលើការងារ មិនចេះឆ្មើងឆ្មៃ លេងសើចច្រើនណាស់ គួរឱ្យស្រឡាញ់ អ្វីដែលសំខាន់បងស្រី បានផ្តល់នូវសេចក្តីទុកចិត្ត និងឱកាសដល់រូបខ្ញុំបញ្ចេញស្នាដៃក្នុងបទចម្រៀង Top of the lady (វីរនារី) និងពិតជា នឹកស្មានមិនដល់សោះឡើយ សម្រាប់ការផ្តល់តម្លៃដល់ការងារ ទឹកចិត្តបងស្រីពិតជា បរិសុទ្ធណាស់ អរគុណសម្រាប់កាដូ $ ៤ ០០០!»។
ចំពោះគម្រោងធ្វើ MV ១ បទ ដែលរំលេចនូវតម្លៃវប្បធម៌ខ្មែរ តំណាងឱ្យប្រទេសកម្ពុជា គឺមានក្នុងចិត្តរបស់តារាស្រីរូបនេះ តាំងពី ២ ឆ្នាំមុន ខណៈការងារ Project MV នេះត្រូវបានដំឡើងប្រើពេលរយៈពេល ២ ខែ ជាមួយនឹងក្រុមការងារទាំងអស់សរុបចំនួន ១២៦ នាក់។
នេះបើតាមការបញ្ជាក់ពីម្ចាស់គណនីហ្វេសប៊ុកឈ្មោះ Athika ដែលជាអ្នកធ្វើការងារផលិត MV បទថ្មីរបស់កញ្ញា ទេព បូព្រឹក្ស នោះ៕
