.jpg)
ឈ្លូសភ្នំ (Gazelles) នៅតំបន់អភិរក្សធម្មជាតិក្នុងក្រុងហ្ស៊េរុយសាឡឹម កាលពីថ្ងៃទី២៤ ខែតុលា ឆ្នាំ២០២១។ AFP
ក្រុងហ្ស៊េរុយសាឡឹម៖ កាលពីប៉ុន្មានឆ្នាំមុន មានឈ្លូសភ្នំតែ ៣ក្បាលប៉ុណ្ណោះ ដែលនៅសេសសល់ក្នុងតំបន់បៃតងដែលកាន់តែរួញខ្លីនៃទីក្រុងហ្ស៊េរុយសាឡឹម ដោយឈ្លូសទាំងអម្បាលម៉ានទៀតបានធ្លាក់ខ្លួនជាចំណីពពួកមំសាសត្វ គ្រោះថ្នាក់ចរាចរណ៍ និងការអភិវឌ្ឍទីក្រុង។
បច្ចុប្បន្ន ពពួកសត្វជិតផុតពូជទាំងនេះបានបង្កើនចំនួនឡើងវិញជាមួយសមាជិកប្រមាណ ៨០ក្បាលនៅក្នុងតំបន់ការពារធម្មជាតិតូចមួយក្នុងបរិវេណទីក្រុងធំរបស់អ៊ីស្រាអែល នោះគឺ ឧទ្យាន Gazelle Valley Park។
បង្កើតឡើងកាលពី ៦ ឆ្នាំមុន ដោយក្រុមប្រឹក្សាសាលាក្រុងហ្ស៊េរុយសាឡឹម និងអង្គការសង្គមសម្រាប់កិច្ចការពារធម្មជាតិ (SPN) តំបន់ព្រៃបៃតងស្ថិតនៅខាងក្នុងបរិវេណអភិវឌ្ឍន៍ក្រុងដ៏ធំបំផុតមួយ។
ថ្ងៃនេះ ឧទ្យាន ដែលអនុញ្ញាតឱ្យភ្ញៀវចូលទស្សនាឥតគិតថ្លៃ គឺជាសួនអភិរក្សសត្វឈ្លូសភ្នំតែ ១គត់នៅអ៊ីស្រាអែល ក្រោយជួបវិបត្ដិរងគ្រោះយ៉ាងខ្លាំង។
រូបភាពកាលពីខែតុលា បង្ហាញវត្តមានឈ្លូសភ្នំ (Gazelles) នៅតំបន់អភិរក្សធម្មជាតិក្នុងក្រុងហ្ស៊េរុយសាឡឹម។ AFP
សហជីពអន្ដរជាតិសម្រាប់កិច្ចអភិរក្សធម្មជាតិ បានដាក់ពពួកសត្វឈ្លូសភ្នំក្នុងបញ្ជីក្រហមកាលពីឆ្នាំ ២០១៧ ដោយបានឱ្យដឹងថា ចំនួនរបស់វាកំពុងបន្ដធ្លាក់ចុះដោយសារតែកត្ដាបរបាញ់ ការសម្លាប់លើដងផ្លូវ និងការបាត់បង់ជម្រក។
នាយកគ្រប់គ្រងសួនសត្វ យែល ហាមមេមេន សូឡា បានឱ្យដឹងថា៖ «យើងបានដាក់ប្រភេទសត្វឈ្លូសភ្នំក្នុងបរិស្ថានធម្មជាតិរបស់ពួកវាទៅតាមលទ្ធភាព ដូច្នេះ យើងមិនធ្វើឱ្យពួកវាពឹងអាស្រ័យលើមនុស្សទេហើយយើងអាចដោះលែងពួកវាទៅក្នុងព្រៃវិញនាពេលអនាគត»។
អាមៀរ បាឡាបាន ប្រធានផ្នែកធនធានធម្មជាតិនៅ SPN បាននិយាយថា ឧទ្យាន Gazelle Valley Park ដោយមានស្រះទឹកជាច្រើន បានផ្ដល់អត្ថប្រយោជន៍យ៉ាងច្រើនដល់ទីក្រុងពិសិដ្ឋ។
ជាដែនជម្រករុក្ខជាតិ និងបក្សីព្រៃ វាដើរតួនាទីជាសួតបៃតង និងជាទីកន្លែងកម្សាន្ដដោយការគ្រប់គ្រងសីតុណ្ហភាព ការផលិតខ្យល់អុកស៊ីហ្ស៊ែន និងផ្ដល់ឱ្យពលរដ្ឋបានប្រាស្រ័យទាក់ទងជាមួយធម្មជាតិ៕ AFP/HR
ឈ្លូសភ្នំ (Gazelles) នៅតំបន់អភិរក្សធម្មជាតិក្នុងក្រុងហ្ស៊េរុយសាឡឹម កាលពីថ្ងៃទី២៤ ខែតុលា ឆ្នាំ២០២១។ AFP
