ទីក្រុងកូប៉ិនហាក៖ ក្រុមហ៊ុនផលិតប្រដាប់ក្មេងលេងដ៏ធំបំផុតរបស់ពិភពលោក Lego របស់ដាណឺម៉ាកបាននិយាយកាលពីថ្ងៃអង្គារថា ខ្លួននឹងផ្តល់ឱ្យបុគ្គលិកចំនួន ២ ម៉ឺននាក់របស់ខ្លួននូវថ្ងៃឈប់សម្រាកបន្ថែមចំនួន ៣ ថ្ងៃ និងប្រាក់រង្វាន់បន្ទាប់ពីដំណើរដ៏រដាក់រដុបនៃប្រាក់ចំណូលពេញ ១ ឆ្នាំបានកន្លងផុតទៅនេះ។
ជាក្រុមហ៊ុនផលិតជ័រផ្គុំ និងរបស់ក្មេងលេង ដែលមានការពេញនិយមជាសកលLego មានតម្រូវការសម្រាប់ផលិតផលល្បែងជ័រផ្គុំ ឥដ្ឋប្លាស្ទិកអត្តសញ្ញាណរបស់ខ្លួន បានកើនឡើងក្នុងអំឡុងពេលជំងឺរាតត្បាត រួមជាមួយនឹងការពង្រីកប្រជាប្រិយភាពរបស់ខ្លួនយ៉ាងឆាប់រហ័សនៅក្នុងប្រទេសចិន។
ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា៖ «ក្រុមគ្រួសារ Lego សូមថ្លែងអំណរគុណដល់សហការីទាំងអស់ជាមួយនឹងការឈប់សម្រាកចំនួន ២ថ្ងៃបន្ថែមទៀតនៅចុងឆ្នាំ២០២១នេះ»។
ក្រុមហ៊ុនបានរាយការណ៍ពីប្រាក់ចំណេញសុទ្ធជាង ៦,៣ពាន់លានក្រូន័រដាណឺម៉ាក (៩៥៤លានដុល្លារ) សម្រាប់ឆមាសទី១ នៃឆ្នាំ២០២១។
ប្រាក់ចំណូល Lego បានកើនឡើង ៤៦ ភាគរយដល់ ២៣ពាន់លានក្រូនក្នុងរយៈពេលដូចគ្នានេះ។
សេចក្តីថ្លែងការណ៍ពីក្រុមហ៊ុនបាននិយាយថា៖ «វាជាឆ្នាំដ៏អស្ចារ្យមួយសម្រាប់ក្រុមហ៊ុន Lego ហើយសហការីរបស់យើងបានធ្វើការយ៉ាងលំបាកមិនគួរឱ្យជឿ។ ដូច្នេះប្រាក់រង្វាន់ពិសេស (ដោយមិនបានបញ្ជាក់ចំនួនជាក់លាក់) នឹងត្រូវបានបង់ជូនដល់បុគ្គលិកនៅក្នុងខែមេសា ឆ្នាំ ២០២២»។
Lego ដែលជាក្រុមហ៊ុនផលិតល្បែងក្មេងលេងពីជ័រផ្គុំមានប្រភពពីជនជាតិដាណឺម៉ាក ដោយផ្ដួចផ្ដើមចេញពីគំនិត“លេងបានល្អ" (Leg godt)។ វាត្រូវបានបង្កើតឡើងក្នុងឆ្នាំ ១៩៣២ ដោយលោក ឃើក គ្រីស្ទានសិន ដោយបច្ចុប្បន្នគ្រួសាររបស់គាត់នៅតែបន្តគ្រប់គ្រងក្រុមហ៊ុនដែលមានបុគ្គលិកប្រហែល ២០៤០០នាក់ នៅប្រទេសចំនួន ៤០ ក្នុងពិភពលោក៕ AFP