ក្រុងឡូសអេនជឺលេស៖ កេរដំណែលប្រវត្ដិសាស្ដ្រក្នុងឧស្សាហកម្មកម្សាន្ដត្រូវបានដាក់លក់ដេញថ្លៃនាសប្ដាហ៍នេះ ជាមួយសម្ភារសម្លៀកបំពាក់ និងវត្ថុផ្សេងៗដែលបន្សល់ពីភាពយន្ដ និងល្ខោនភាគទូរទស្សន៍ល្បីៗបំផុតមួយចំនួនកាលពីប៉ុន្មានទសវត្សរ៍មុន។
ក្រុមអ្នកគាំទ្រនឹងមានឱកាសដេញថ្លៃយកសម្ភារបន្សល់ពីភាពយន្ដល្បីៗ ដែលរួមមានឈុតសម្លៀកបំពាក់គ្រងដោយ John Travolta ក្នុងរឿង «Pulp Fiction» ក្ដារលេងទឹករលករបស់លោក Patrick Swayze ក្នុងរឿង «Point Break» និងចង្កឹះវេទមន្ដរបស់យុវជន Ron Weasleyក្នុងរឿង «Harry Potter and the Deathly Hallows» ជាដើម។
នៅមានកាំបិតស្នៀតពីរឿង «Game of Thrones» អាវពន្លឺរបស់ Liam Neeson ក្នុងរឿង «The Phantom Menace» និងកាំភ្លើងយន្ដ ប្រើដោយ Bruce Willis ក្នុងរឿង «Die Hard»។
ការដាក់លក់ដេញថ្លៃ រួមមាន វត្ថុសម្ភារជាង ១ ២០០ មុខ និងសុទ្ធតែជាប្រវត្ដិសាស្ដ្ររបស់ឧស្សាហកម្មកម្សាន្ដ ក៏ដូចជា សម្ភារផ្ទាល់ខ្លួនដែលធ្លាប់ត្រូវបានតារាភាពយន្ដ Marilyn Monroe ពាក់ និងសំណេរអត្ថបទកុនគំរូដើមសម្រាប់វគ្គចុងក្រោយនៃរឿង «M*A*S*H»។
មួករបស់ Michael Keaton ក្នុងរឿង «Batman» ព្រមទាំង វត្ថុនានាពីរឿង «Terminator» និង «A Clockwork Orange» ត្រូវបានដាក់លក់ប្រកួតប្រជែងជាមួយខ្សែរំពាត់របស់ Gal Gadot ក្នុងរឿង «Wonder Woman»។
ក្រុមហ៊ុនដេញថ្លៃ Julien''s Auctions ដែលរៀបចំការលក់ដេញថ្លៃនៅទីក្រុង Beverly Hills នាថ្ងៃព្រហស្បតិ៍ បានឱ្យដឹងថា៖ «ព្រឹត្ដិការណ៍រយៈពេល ២ ថ្ងៃនេះ ផ្ដល់នូវការគាស់កកាយបានវត្ថុល្បីៗពីខ្សែភាពយន្ដហូលីវូដដែលបន្សល់ទុកតាំងពីសម័យរុងរឿងរបស់ហូលីវូដ រហូតដល់ភាពយន្ដទំនើប និងសហសម័យ ក៏ដូចជារឿងភាគទូរទស្សន៍នាពេលបច្ចុប្បន្ន»៕ AFP/HR