ភ្នំពេញៈ ក្រោយពីចេញ MV បទចម្រៀងថ្មី «ទ្វារបេះដូង» ដែលនិពន្ធទំនុកច្រៀងខ្លួនឯង មានបញ្ចូលទម្រង់សិល្បៈខ្មែរបុរាណចម្រុះ និងឧស្សាហ៍បង្ហោះរូបភាព គ្រងឈុតសម្លៀកបំពាក់បុរាណដ៏ស្រស់ស្អាតជារឿយៗនោះ ស្រាប់តែពេលថ្មីៗនេះ អ្នកនាង ពេជ្រ សោភា លើកជាសំណើមួយដល់អ្នកគាំទ្រ ឱ្យឈប់ប្រើរូបភាពខ្លួនបញ្ចូលនៅក្នុងទម្រង់សិល្បៈតន្ត្រីថៃ។
ប្រាកដណាស់ថា តារាចម្រៀងស្រីល្បីនៅហង្សមាសរូបនេះ ពិតជាកម្រឃើញមានការគ្រងឈុតសម្លៀកបំពាក់បែបបុរាណខ្លាំងណាស់ ទើបតែមួយរយៈពេលថ្មីៗប៉ុណ្ណោះ ពោលគឺក្រោយពីចេញបទចម្រៀង «ទ្វារបេះដូង» នោះមក។ នេះបើយោងតាមការសង្កេតរបស់ក្រុមអ្នកតាមដានពីជីវិតឯកជនរបស់អ្នកនាង ពេជ្រ សោភា។
ជាក់ស្តែងអ្នកនាង ពេជ្រ សោភា បង្ហាញអារម្មណ៍ពិតរបស់ខ្លួនតាមហ្វេសប៊ុក ពេលស្លៀកពាក់ឈុតបុរាណជាតួអង្គព្រះនាងសីតា ក្នុងស្នាដៃអក្សរសិល្ប៍រឿង «រាមកេរ្តិ៍» នោះថា៖ «នេះជាលើកទី១ ក្នុងឆាកជីវិតរបស់ខ្ញុំ ក្នុងនាមជាកូនខ្មែរ ១ រូប ដែលបានគ្រងឈុតតួអង្គនាងសីតា ក្នុងទម្រង់ (របាំបុរាណ) រូបរាងកាយ ខ្ញុំពុំដែលគ្រងឈុតបុរាណនេះ ឈុតនេះបានធ្វើឱ្យខ្ញុំចងចាំការលះបង់របស់ដូនតាយើង សិល្បករ សិល្បការិនី បុរាណចាស់ៗ ដែលខិតខំថែរក្សាយ៉ាងយកចិត្តដាក់បន្តដល់ក្មេងៗជំនាន់ក្រោយឱ្យស្គាល់ឈាមជ័រ ពណ៌របស់សិល្បៈខ្មែរ»។
មិនតែប៉ុណ្ណោះតារាចម្រៀងស្រីរូបនេះ ក៏ឆ្លៀតលើកយកសុភាសិតខ្មែរ ១ ឃ្លា មកចោទសួរដល់ក្រុមអ្នកគាំទ្រ ឱ្យជួយផ្តល់ចម្លើយផងដែរថា៖ «ស្លឹកចេកផ្ងារ ស្លឹកចារផ្កាប់ ផែនដីក្រឡាប់ យកធាតុទៅទុកឯណា?» ដែលរំលេចរូបភាពខ្លួន ស្លៀកពាក់ឈុតបុរាណនោះ។
តែមួយរយៈមកនេះ ទំនងជាមានការយករូបភាពទាំងនោះ ទៅប្រើប្រាស់ខុសបំណងរបស់តារាចម្រៀងស្រីឈរជើងយូរនៅហង្សមាសហើយទើបអ្នកនាង ពេជ្រ សោភា បានចេញសារសំណូមពរដល់អ្នកគាំទ្រខ្លួនមួយរំពេច។ ដោយ ពេជ្រ សោភា បង្ហើរសារជាសំណូមពរយ៉ាងខ្លីដូច្នេះថា៖ «ខ្ញុំសុំចិត្តហ្វេនរបស់ខ្ញុំ សូមកុំយករូបភាពខ្ញុំ ប្រើប្រាស់ក្នុងបទភ្លេងរបស់សៀម ឬក្នុងសាច់ភ្លេងរឿងរបស់សៀម (ថៃ)»។
មិនបង្អង់យូរក៏មានអ្នកគាំទ្របែបឈឺឆា្អលពីវប្បធម៌ខ្មែរចេញសារលើកឡើងតបនឹងសារសំណូមពររបស់ ពេជ្រ សោភា ភ្លាមៗថា៖ «ថៃ ឬសៀម ចាំតែចាប់កំហុសខ្មែរយើងទេ រូបពាក់ព័ន្ធនឹងឈុតបុរាណពួកសៀមតែងតែនិយាយថា យើងចម្លងពីវា ថ្នាក់បទចម្រៀងដែលបង ទេព បូព្រឹក្ស ទើបតែចេញ វានៅតែរិះគន់ថា ចម្លងពីគេ យ៉ាប់ណាស់!»។
ក្រុមអ្នកគាំទ្រនេះ បានបន្តទៀតថា៖ «ពិសេសអ្នកដែលចូលចិត្តប្រៀបធៀបប្រទេសកម្ពុជា និងប្រទេសគេ ទាំងដែលខ្លួនជាខ្មែរសោះ បែរជាលើកស្ទួយគេ ភ្លេចដើមកំណើតឯង បើអាចឈប់ទៅ ខ្មែរយើងខ្លះយកឈុតសម្លៀកបំពាក់ប្រពៃណីខ្មែរ ហើយដាក់បទចម្រៀងសៀម (បទចម្រៀងបុរាណ) ពេលខ្លះខ្ញុំអត់យល់ពីពួកគាត់សោះ?»៕