ភ្នំពេញៈ គម្រោង «ចាប៉ី និងអនាគត» ជាស្នាដៃផ្ដួចផ្ដើមឡើងដោយតន្ត្រីករចាប៉ីដងវែងលោក គាត សុគីម ហើយលោកទទួលបានមូលនិធិដំឡើងស្នាដៃ របស់អង្គការសិល្បៈខ្មែរអមតៈ សម្រាប់ត្រៀមសម្ដែងក្នុងកម្មវិធីរដូវវប្បធម៌ «ទង្វើថ្ងៃនេះ ផលតបស្នងថ្ងៃស្អែក» ដែលនឹងចាប់ផ្តើមពីខែមករា ឆ្នាំ ២០២២ ខាងមុខនេះ។
លោក សុគីម ដែលជាតន្ត្រីករ និងជានាយកសាលាភ្លេងមិត្តតន្ត្រី បានបង្ហាញចំណាប់អារម្មណ៍ទាំងរំភើបថា នេះគឺជាឱកាសដ៏ពិសេស ក្នុងការបង្ហាញចាប៉ីដងវែង ក្នុងទម្រង់ច្នៃប្រឌិតថ្មី ដែលភាគច្រើនបំផុតកម្រឃើញចាប៉ីក្នុងទម្រង់ផ្សេងៗណាស់។ លោកបន្តថា៖ «ជាទូទៅ គេស្គាល់ថា ជាអ្នកចាប៉ីគឺត្រូវតែជាអ្នក ដែលចេះច្រៀងផង និងប្រគំផង ព្រោះតែគេមិនបានចាប់អារម្មណ៍ថា តាំងពីយូរលង់់មកហើយចាប៉ីត្រូវបានប្រគំក្នុងទម្រង់ផ្សេងៗដូចជា ភ្លេងការបុរាណ មហោរី និងអារក្សជាដើម។ ហើយបច្ចុប្បន្ននេះ គេក៏អាចយកចាប៉ីទៅបង្កើតជាស្នាដៃថ្មីថែមទៀតផង»។
ស្នាដៃនេះនឹងបង្ហាញអំពីដំណើរវិវឌ្ឍន៍ចាប៉ីដងវែង ចេញពីទម្រង់ភ្លេងបុរាណ និងដំណើររុករកស្វែងយល់អំពីទម្រង់ថ្មីៗនៃតន្ត្រីតាមវប្បធម៌នីមួយៗ យកមករួមបញ្ចូលគ្នាលើឆាកតែមួយ។ គួរបញ្ជាក់ដែរ សមាជិកដែលសម្ដែងក្នុងស្នាដៃនេះ មានចំនួន ៧ រូប ដែលមកពីកម្ពុជា ជប៉ុន ស៊ុយអែត និងអង់គ្លេស ហើយកម្រងបទចម្រៀង ដែលនឹងបង្ហាញគឺបានដកស្រង់ចេញពីតំបន់នានា ជុំវិញពិភពលោករួមមានអាស៊ី អាហ្វ្រិក អឺរ៉ុប និងអារ៉ាប់ផងដែរ។ ជាពិសេស មានបទភ្លេងតែងថ្មី ដោយប្រើប្រាសឧបករណ៍់ចាប៉ីដងវែង ជាគោលផងដែរ។
ស្នាដៃ «ចាប៉ី និងអនាគត» មានគោលបំណងបំផុសគំនិតថ្មីមួយកាន់តែទូលាយលើឧបករណ៍ចាប៉ីដងវែង ដើម្បីទាក់ទាញឱ្យមានគំនិតច្នៃប្រឌិតថ្មីៗអំពីចាប៉ី និងដើម្បីឱ្យទស្សនិកជនខ្មែរទទួលបានអារម្មណ៍ថ្មី និងប្លែកជាមួយកម្រងបទចម្រៀង ដែលមានចម្រុះវប្បធម៌មួយនេះ។
ក្រៅពីស្នាដៃ «ចាប៉ី និងអនាគត» គឺនៅមានស្នាដៃ ៣ ទៀត ដែលនឹងត្រូវចូលរួមសម្ដែងក្នុងកម្មវិធីរដូវវប្បធម៌នេះដែរ រួមមានឈ្មោះ «ផ្ទះកសិដ្ឋានធម្មជាតិ» ជាទម្រង់ល្ខោននិយាយ ឈ្មោះ «សកេរ» ជាទម្រង់របាំសហសម័យបែបឌីជីថល និងឈ្មោះ «Rhythm-ចង្វាក់» ជាទម្រង់តន្ត្រីសហសម័យបែបឌីជីថល។ កម្មវិធីរដូវវប្បធម៌ រៀបចំឡើងដោយអង្គការសិល្បៈខ្មែរអមតៈ ចាប់ពីខែមករា ដល់ខែមីនា ឆ្នាំ ២០២២។
ចង់ដឹងអំពីកម្មវិធីលម្អិត សូមទំនាក់ទំនង ០៨៦ ៨៩៥ ៥៥៦ ឬអ៊ីមែល chandaly@cambodianlivingarts.org៕