ភ្នំពេញៈ ក្រោយពីបង្ហាញមុខមាត់ពិតជាសាធារណៈមកនោះ តារាចម្រៀងប្រុសរលកក្រោយនៅសាន់ដេ សុខ មេសា ហៅ នាយចឺម កាន់តែស្អិតល្មួតនឹងម្ចាស់ចិត្តថ្មី គឺស្រស់ស្អាត សាច់សខ្ចីឈ្មោះ សេង សុឃីម តែពួកគេពុំទាន់មានគម្រោងគិតគូររឿងរកវេលាចូលរោងជ័យនៅឡើយទេ។
នេះបើតាមការបង្ហើបប្រាប់ពីសំណាក់តារាចម្រៀងប្រុសនៅសាន់ដេ នាយ ចឺម ខណៈមហាជនសង្កេតឃើញថា តារាចម្រៀងប្រុសដែលអភិវឌ្ឍខ្លួនពីតារាកំប្លែងរូបនេះ កាន់តែបង្ហាញសម្ព័ន្ធភាពយ៉ាងស្និទ្ធស្នាលខ្លាំងជាមួយម្ចាស់បេះដូងថ្មី ដែលជាតារាស្រីថតផ្សាយស្ប៉តពាណិជ្ជកម្ម និងជាថៅកែលក់ផលិតផលរក្សាសម្រស់នេះជាងគេ បើធៀបនឹងគូមុនៗ។
នាយចឺម ម្ចាស់បទ «ថ្លៃទឹកដោះ» ដែលជាបទថ្មីទើបចេញនៅផលិតកម្មសាន់ដេ ដោយមានវត្តមានគូស្នេហ៍ថ្មីស្រីស្រស់ សេង សុឃីម ថតសម្តែង MV ជាមួយដែរនោះ ប្រាប់ ភ្នំពេញ ប៉ុស្តិ៍ថា៖ «ពួកយើងកំពុងតែត្រូវការប្រើពេលវេលា ដើម្បីមើលចិត្តគ្នាបន្តិចទៀតសិន ហើយរឿងរៀបការ យើងអត់ទាន់គិតនៅឡើយទេបង!»។
ដោយសារមើលឃើញថា គូស្នេហ៍ក្រោយរបស់នាយចឺម មានសាច់-ឈាមស្រស់ថ្លា សខ្ចី និងត្រេមុខដូចកូនកាត់ ហើយពេលខ្លះក៏មានស្លៀកពាក់បែបប្រពៃណីអ៊ិស្លាមទៀតផងនោះ ទើបមានការសង្ស័យមន្ទិលថា ស្រីស្រស់ សេង សុឃីម ទំនងជាកូនកាត់ចិន ឬកូនកាត់ចាម។
តែតារាចម្រៀងប្រុសដែលអភិវឌ្ឍខ្លួនពីតារាកំប្លែង មាឌល្អិតចិត្តធំ សម្បុរស្រអែម តែសម្បូរក្តីស្នេហ៍នាយចឺម បានបញ្ជាក់ប្រាប់ថា៖ «គាត់ជាកូនចៅអ្នកខេត្តកំពង់ចាម ហើយជាកូនកាត់ខ្មែរ-ចិន។ គាត់ជាអ្នកប្រកបមុខជំនួញ និងទទួលថតតែស្ប៉តផ្សាយផលិតផលតែប៉ុណ្ណោះ ហើយមិនទទួលថតសម្តែងនោះទេ»។
បើតាមសង្កេត សម្ព័ន្ធភាពស្នេហ៍ថ្មីរវាងតារាចម្រៀងប្រុសនៅសាន់ដេ ឈ្មោះពិត សុខ មេសា ហៅ នាយចឹម និងស្រីស្អាតសាច់ខ្ចី សុឃីម បានបើកចំហចាប់ពីឃើញ ពួកគេបង្ហាញភាពស្និទ្ធស្នាល និងផ្អែមល្ហែម នៅថ្ងៃមង្គលការតារាចម្រៀងស្រីនៅសាន់ដេ អ្នកនាង វីរៈ និច្ច តាំងពីពាក់កណ្តាលខែតុលា ឆ្នាំ ២០២១។
កាន់តែច្បាស់នោះ នាយចឺម បានរៀបរាប់តាមហ្វេសប៊ុក សារ-ភាពពីបេះដូងខ្លួនថា៖ «មានមនុស្សស្រីជាច្រើន ដែលចូលក្នុងជីវិតបង ដែលឃើញតែផលប្រយោជន៍តែអូន គឺខុសគ្នា មិនអាចប្រៀបធៀបគ្នាបាន។ អូនជាមនុស្សស្រីតែម្នាក់ដែលធ្វើឱ្យបងព្រមឈប់ត្រឹមអូន! អូនជាមនុស្សស្រី ដែលនៅពីក្រោយ បងគ្រប់-ពេល សុំអូនកុំខ្វល់ពីសម្តីអ្នកដទៃ សុំត្រឹមអូនជឿជាក់បង អូនជាគ្រប់យ៉ាងរបស់បង ធ្វើគ្រប់យ៉ាងគឺដើម្បីអូន រឿងអ្វីក៏ដោយ មុន និង-ក្រោយ គេគង់តែដឹងការពិត»។
នាយចឺម តារាចម្រៀងប្រុសនៅ-សាន់ដេ រូបនេះ បានបន្តទៀតថា៖ «អូនមិនខ្លាច នឹងនៅពីក្រោយបងឈរមើលភាពជោគជ័យរបស់បងឡើយ អ្វីដែលអូនខ្លាចគឺពេលបងជោគជ័យ អ្នកនៅពីក្រោយបង មិនមែនជាអូន»៕