ក្រុងរ៉ៃក្យាវិក: ស្រាបៀរនារដូវគ្រិស្តស្មាស់ដែលផលិតពីគ្រាប់សណ្ដែកហោឡាន់តាវ និងជ្រក់ស្ពៃក្ដោបស្វាយ ក្លាយជាភេសជ្ជៈដ៏ពេញនិយមនៅអ៊ីស្លង់ និងលក់ដាច់អស់គ្មានសល់ត្រឹមពេលប៉ុន្មានម៉ោង។
ផលិតនៅសិប្បកម្មបិតស្រាដ៏តូចមួយនៅក្រុងរ៉ៃក្យាវិក បង្កើតរូបមន្តស្រាបៀរ Ora Jolabjor ប្រែថាស្រាបៀរគ្រិស្តស្មាស់ ផលិតដោយទទួលឥទ្ធិពលពីគ្រឿងផ្សំអាហារពេលល្ងាចនៅអ៊ីស្លង់។
ពិធីជប់លៀងគ្រិស្តស្មាស់នៅទីនោះមិនចោលទេ សណ្ដែកហោឡាន់តាវ និងស្ពៃក្ដោបស្វាយ ជាមួយភ្លៅចៀមឆ្អើរ និងដំឡូងបារាំងឆឹងផ្អែម។
ស្រាបៀរថ្មីនេះ ដែលមានផ្ទុកកម្រិតជាតិអាល់កុល ៥,២ ភាគរយ និងបានផ្ដួចផ្ដើមផលិតពីលោក Valgeir Valgeirsson ជាអ្នកជំនាញបិតស្រាបៀរដ៏ល្បីល្បាញ។
លោកសាងកេរ្តិ៍ឈ្មោះតាមរយៈការច្នៃស្រាបៀរ នារដូវបុណ្យគ្រិស្តស្មាស់ ដែលប្រើគ្រឿងផ្សំប្លែកៗ រួមមានសារាយសមុទ្រ គល់ខ្ទឹមស្រស់ និងត្រីក្រៀម។ បុរសពុកចង្កាល្បាយអាចម៍ខ្លា វ័យ ៥១ ឆ្នាំរូបនេះថា៖ «ស្រាបៀរធ្វើពីត្រីកាលណោះ ពិតជាមានរសជាតិចម្លែកបន្តិច»។
ការច្នៃលើកនេះ លោកលាយគ្រាប់សណ្ដែកហោឡាន់តាវជាមួយស្ពៃក្ដោប ស្រូវម៉ាល់ ហប់ និងក្លាំងពូ។
សិប្បកម្មស្រាបៀរលោកអាចផលិតបានប្រមាណ ៥ ម៉ឺនលីត្រ ក្នុង ១ ឆ្នាំ មិនស្មើនឹងទឹក ១ តំណក់នៃសមុទ្រស្រាបៀរផលិតដោយក្រុមហ៊ុនធំៗក្នុងពិភពលោកផង ប៉ុន្តែការចេញលក់ ៦ ពាន់លីត្រដំបូង ប្រើពេលត្រឹមតែប៉ុន្មានម៉ោងប៉ុណ្ណោះ ធ្វើឱ្យលោកត្រូវបន្ថែម ១៨ ០០០ លីត្រទៀត។
នៅអ៊ីស្លង់ដែលមានប្រជាជនសរុប ៣៧ ម៉ឺននាក់ ប្រពៃណីទទួលទានសណ្ដែកហោឡាន់តាវ និងស្ពៃក្ដោបស្វាយ ជាអត្តសញ្ញាណបុណ្យគ្រិស្តស្មាស់នៃប្រទេសនេះ៕ AFP