ក្រុងហ្សឺណែវ៖ វីរុសបំប្លែងខ្លួន អូមីក្រុង ត្រូវបានរកឃើញនៅក្នុង ៣៨ ប្រទេសហើយ តែមិនមានករណីស្លាប់ត្រូវបានរាយការណ៍នោះទេ។ នេះបើយោងតាមអង្គការសុខភាពពិភពលោក ដែលបានឱ្យដឹងកាលពីថ្ងៃសុក្រ ខណៈអាជ្ញាធរនៅទូទាំងប្រទេសខិតខំទប់ស្កាត់ការរីករាលដាលវីរុសបំប្លែងខ្លួនមួយនេះ ដែលអាចស៊ីទាំងការងើបឡើងវិញនៃសេដ្ឋកិច្ចសកលផងដែរ។
សហរដ្ឋអាមេរិក និងអូស្ដ្រាលីបានក្លាយជាប្រទេសចុងក្រោយគេ ក្នុងការបញ្ជាក់ពីវត្ដមានករណីវីរុសបំប្លែងខ្លួន ខណៈអូមីក្រុង បានឆ្លងទៅប្រជាជនអាហ្វ្រិកខាងត្បូងជាង ៣លាននាក់រួចទៅហើយ។
អង្គការសុខភាពពិភពលោកបានព្រមានថា ខ្លួនត្រូវការពេលច្រើនសប្ដាហ៍ទៀតក្នុងការកំណត់ថា តើអត្រាឆ្លងរបស់វីរុសបំប្លែងខ្លួនថ្មីនេះមានច្រើនដល់កម្រិតណា និងអាចបង្កហានិភ័យដល់សុខភាពធ្ងន់ធ្ងរកម្រិតណា ក៏ដូចជាលទ្ធភាពនៃការព្យាបាល និងប្រសិទ្ធភាពរបស់វ៉ាក់សាំងផង។
នាយកផ្នែកគ្រប់គ្រងគ្រាអាសន្នរបស់អង្គការសុខភាពពិភពលោក មីឆែល រីយ៉ាន បាននិយាយថា៖ «យើងនឹងដឹងពីលទ្ធផលដែលមនុស្សគ្រប់រូបកំពុងអន្ទះសាចង់ដឹង»។
អង្គការសុខភាពពិភពលោកបានបន្ដថា ខ្លួនមិនបានឃើញរបាយការណ៍មរណភាពទាក់ទងនឹងវីរុសអូមីក្រុងទេ តែការរីករាលដាលដ៏លឿនរបស់វាបានធ្វើឱ្យអង្គការមួយនេះព្រមានថា វាអាចគ្របដណ្ដប់ លើករណីឆ្លងជាងពាក់កណ្ដាលនៅអឺរ៉ុបក្នុងរយៈពេលប៉ុន្មានខែខាងមុខ។
វីរុសបំប្លែងខ្លួនថ្មីនេះ ក៏អាចពន្យឺតដំណើរការស្ដារសេដ្ឋកិច្ចឡើងវិញ មិនខុសពីអ្វីដែលវីរុសដែលតាធ្លាប់បានបង្កឡើងដែរ។ នេះបើយោងតាមប្រធានមូលនិធិរូបិយប័ណ្ណអន្ដរជាតិ (IMF) គ្រីស្ដាលីនា ចចហ្គែវ៉ា បាននិយាយកាលពីថ្ងៃសុក្រ។
លោកស្រី បានបន្ដថា៖ «វីរុសបំប្លែងខ្លួនថ្មីដែលកំពុងតែផ្ទុះខ្លាំងនេះ អាចបង្អាក់សម្ទុះសេដ្ឋកិច្ច»។
ការសិក្សាបឋមដោយក្រុមអ្នកស្រាវជ្រាវអាហ្វ្រិកខាងត្បូង ជាទីដែលអូមីក្រុង ផ្ទុះឡើងដំបូងគេ កាលពីថ្ងៃទី២៤ ខែវិច្ឆិកា បានលើកឡើងថា វាមានអត្រាឆ្លងខ្ពស់ជាងវីរុសដែលតា ឬ បេតាដល់ទៅ ៣ដងឯណោះ។
ក្រុមវេជ្ជបណ្ឌិតអាហ្វ្រិកខាងត្បូងបានឱ្យដឹងថា វាវាយលុកខ្លាំងលើកុមារអាយុក្រោម ៥ឆ្នាំ ដែលត្រូវបានបញ្ជូនទៅកាន់មន្ទីរពេទ្យក្នុងចំនួនដ៏ច្រើនតាំងពីអូមីក្រុងរីករាលដាល តែពួកគេអះអាងថា មិនទាន់ច្បាស់ថា វាបណ្ដាលមកពីវីរុសបំប្លែងខ្លួនថ្មីនេះឬយ៉ាងណានៅឡើយ។
វ៉ាស៊ីឡា ចាសាត់ មកពីវិទ្យាស្ថានជាតិសម្រាប់ជំងឺឆ្លង បាននិយាយថា៖ «គ្រោះអាក្រក់កើតឡើងលើកុមារអាយុក្រោម ៥ឆ្នាំនេះឈរលើកំពូលតារាងលំដាប់ទី២ បន្ទាប់ពីអត្រាមនុស្សចាស់»។
អូមីក្រុង បានបង្កជាបញ្ហាស្មុគស្មាញចំពោះយុទ្ធនាការបញ្ចប់វិបត្ដិសុខភាពសកល។ ការកើនឡើងនៃវីរុសដែលតា បានបង្ខំឱ្យរដ្ឋាភិបាលនៅអឺរ៉ុបដាក់ចេញវិធានការពាក់ម៉ាស់ រក្សាគម្លាត បម្រាមគោចរ ឬបិទខ្ទប់ ដែលធ្វើឱ្យមុខជំនួញនានាលែងហ៊ានសង្ឃឹមក្នុងឱកាសបុណ្យគ្រិស្ដសា្មស់ខាងមុខនេះរួចទៅហើយ៕ AFP/HR