.jpg)
រូបតំណាង៖ ប៉ូលិសបានទៅដល់មន្ទីរពេទ្យនៅពេលអ្នកជំងឺម្នាក់ជួបហេតុការណ៍មុតគ្រាប់កាំភ្លើងជាប់ក្នុងរន្ធគូទ។
ក្រុងឡុងដ៍៖ បុគ្គលិកពេទ្យនៅចក្រភពអង់គ្លេស ត្រូវធ្វើការយ៉ាងញាប់ដៃញាប់ជើង ក្រោយពីបុរសម្នាក់បានមកដល់បន្ទប់សង្គ្រោះបន្ទាន់ដោយមានគ្រាប់កាំភ្លើងសល់ពីសម័យសង្គ្រាមលោកលើកទី២ ដោតជាប់ក្នុងរន្ធគូទ។
ប៉ូលិសនៅGloucestershire ភាគខាងលិចប្រទេសអង់គ្លេស បាននិយាយថា ប៉ូលិស និងអ្នកជំនាញអាវុធយុទ្ធភណ្ឌ ត្រូវបានខលហៅ តែក្រុមគ្រូពេទ្យបានយកគ្រាប់នោះចេញដោយសុវត្ថិភាពមុនពេលពួកគេមកដល់។
ប៉ូលិសបានឱ្យដឹងក្នុងសេចក្ដីថ្លែងការណ៍ថា៖ «ប៉ូលិសបានទៅដល់មន្ទីរពេទ្យ Gloucestershire Royal Hospital កាលពីព្រឹកថ្ងៃពុធ ក្រោយពីមានការរាយការណ៍ថា អ្នកជំងឺម្នាក់ជួបហេតុការណ៍មុតគ្រាប់កាំភ្លើងជាប់ក្នុងរន្ធគូទប៉ុន្តែគ្រាប់នោះ ត្រូវបានយកចេញមុនពេលប៉ូលិសទៅដល់ ហើយក្រុមអង្គភាពកម្ចាត់គ្រាប់យុទ្ធភណ្ឌមិនទាន់ផ្ទុះ ក៏ត្រូវបានទាក់ទងឱ្យមកមន្ទីរពេទ្យផងដែរ។ ពួកគេបានអះអាងថា គ្រាប់យុទ្ធភណ្ឌនោះខូចប្រសិទ្ធភាពទៅហើយ វាមិនបង្កគ្រោះថ្នាក់ដល់មហាជនឡើយ»។
រូបតំណាង៖ បុគ្គលិកពេទ្យសង្គ្រោះបុរសម្នាក់ដែលរន្ធគូថមានជាប់គ្រាប់កាំភ្លើងសល់ពីសម័យសង្គ្រាមលោកលើកទី២។
អ្នកនាំពាក្យកងកម្លាំងម្នាក់ បានបន្ថែមថា៖ «យើងអាចបញ្ជាក់ថា កងកម្លាំងកម្ទេចគ្រឿងផ្ទុះត្រូវបានហៅឱ្យមកកាន់មន្ទីរពេទ្យ Gloucestershire តាមសំណើរបស់ប៉ូលិសមូលដ្ឋាន»។
កាសែត The Sun ដែលរាយការណ៍ពីឧប្បត្ដិហេតុនេះ បានផ្សាយថា អ្នកជំងឺដែលមិនបង្ហាញអត្ដសញ្ញាណរូបនេះ បានប្រាប់ក្រុមគ្រូពេទ្យថា លោក «រអិលជើងដួលអុកគូទលើគ្រាប់កាំភ្លើងនោះ»។
កាទូសគ្រាប់កាំភ្លើងនោះ មានប្រវែង ១៧គុណនឹង ៦សង់ទីម៉ែត្រ មានចុងស្រួច ជាគ្រាប់ដែលផលិតឡើងសម្រាប់បាញ់ទម្លុះដែករថក្រោះ។
ប្រភពបានបន្ដថា៖ «វាគ្រាន់តែជាដែកធម្មតាប៉ុណ្ណោះ អ៊ីចឹង វាមិនបង្កឱ្យផ្ទុះឡើយ»។
ជនរងគ្រោះត្រូវបានអនុញ្ញាតឱ្យចេញពីមន្ទីរពេទ្យ និងបានធូរស្បើយវិញហើយ៕ AFP/HR
